ប្រភពពី CNA ឱ្យដឹងថា បុគ្គលិករាប់ពាន់នាក់នៅរោងចក្រផលិតទូរស័ព្ទ iPhone របស់ Foxconn ក្នុងប្រទេសចិនបានលាឈប់ពីការងារ តាំងពីសប្តាហ៍មុនដោយសារគោលនយោបាយសូន្យកូវីដដ៏តឹងរ៉ឹង ដែលដាក់ចេញដោយរដ្ឋបាលក្រុងប៉េកាំង។
ប្រធានផ្នែកនិរន្តរភាព និងអភិបាលកិច្ចនៅ SWEDBANK ROBUR លោក PIA GISGARD បានលើកឡើងថា ព្រឹត្តិការណ៍ដែលកើតឡើងនៅរោងចក្រផលិតរបស់ Foxconn បង្កក្ដីព្រួយបារម្ភ ពីសុខភាព សុវត្ថិភាព និងសុខុមាលភាពទូទៅ ព្រមទាំងទស្សនវិស័យសុខដុមរមនានៅកន្លែងធ្វើការ។
លោកបញ្ជាក់ថា៖ «នៅក្នុងគ្រាចលាចលនេះ Apple ចាំបាច់ត្រូវពង្រឹងកិច្ចសន្ទនាជាមួយអ្នកគ្រប់គ្រង Foxconn ឬអាជ្ញាធរចិន បើអាចធ្វើទៅបាន។ ការធ្វើបែបនេះដើម្បីធានាសិទ្ធិការងារ និងស្វែងរកដំណោះស្រាយធ្វើឱ្យស្ថានការណ៍មានស្ថិរភាព»។
លោកបានបន្ថែមថា៖ «ជាជំហានដំបូង យើងបានទាក់ទង Apple ដើម្បីយល់ពីរបៀប ដែលពួកគេគ្រប់គ្រងស្ថានភាពទូទៅ និងដោះស្រាយស្ថានភាព ដែលកំពុងបន្ត និងវិធានការ ដែលពួកគេកំពុងអនុវត្ត»។
ប្រធានទីផ្សារមូលធន ESG & STEWARDSHIP នៅឯ UNion Investment លោក JANNE WERNING ប្រាប់ថា៖ «ហេតុការណ៍ចលាចលការងារនេះ បង្ហាញពីស្តង់ដាការងារ នៅក្នុងខ្សែចង្វាក់ផ្គត់ផ្គង់។ យើងរំពឹងថា Apple ដែលជាអ្នកទិញដ៏សំខាន់មួយនឹងធានាពីឥទ្ធិពលរបស់ខ្លួននៅ Foxconn ។ តាមការរកឃើញរបស់យើង ដូច្នេះ Foxconn ស្ថិតក្នុងស្ថានភាពល្អប្រសើរ បើធៀបនឹងរោងចក្រផ្សេងទៀតនៅចិន»។ យ៉ាងណាក្តី លោកអះអាងថា មានភាពកម្សោយនៅឡើយ បើធៀបនឹងស្តង់ដាអន្តរជាតិ។
អ្នកគ្រប់គ្រងជាន់ខ្ពស់ សម្រាប់ SUMOFUS លោក CHRISTINA O''CONNELL ថា៖ «ការពឹងផ្អែកខ្លាំងរបស់ Apple លើប្រទេសចិន ទាំងទីតាំងផលិត និងទីតាំងលក់ ជាស្ថានភាពគ្រោះថ្នាក់ខ្លាំង»៕