ជប៉ុនដែលជារឿយៗ តែងបង្ហាញកង្វល់ខ្លាំងលើមធ្យោបាយការពារជាតិក្នុងឆ្នាំនេះ បន្ទាប់ពីរុស្ស៊ីឈ្លានពានអ៊ុយក្រែន និងការកើនឡើងឥទ្ធិពលរបស់ចិន ក្នុងតំបន់ ទីបំផុតបានលាតត្រដាងនូវផែនការចំណាយដ៏ខ្ពស់សម្រាប់វិស័យយោធា។
កាលពីថ្ងៃចន្ទ នៅមុន ១ ថ្ងៃនៃការឆ្លើយនៅរដ្ឋសភា នាយករដ្ឋមន្ត្រីជប៉ុន លោក ហ្វូមិអុ គីស៊ីដា (Fumio Kishida) បានប្រាប់គណៈរដ្ឋមន្ត្រីរបស់លោកឱ្យបង្កើនការចំណាយលើវិស័យការពារជាតិដល់ ២% នៃផលិតផល ក្នុងស្រុកសរុប (GDP) នៅឆ្នាំ ២០២៧ ដែលជាការកើនឡើងខ្ពស់មិនធ្លាប់មាន ដោយជប៉ុនកម្រិតការចំណាយលើវិស័យយោធាប្រហែល ១% ប៉ុណ្ណោះ។ នេះយោងតាមបណ្តាញសារព័ត៌មានជប៉ុននានា។
ជប៉ុនបានចាប់ផ្តើមកែលម្អយុទ្ធសាស្ត្រការពារជាតិ និងសន្តិសុខ ដើម្បីដោះស្រាយការគំរាមកំហែងកាន់តែខ្លាំងឡើងពីប្រទេសចិន ក៏ដូចជាការផ្លាស់ប្តូរលក្ខណៈភូមិសាស្ត្រនយោបាយ បន្ទាប់ពីការលុកលុយរបស់រុស្ស៊ីលើអ៊ុយក្រែន។
ក្នុងកិច្ចប្រជុំកំពូលសន្តិសុខតំបន់ឥណ្ឌូប៉ាស៊ីហ្វិក ដែលរៀបចំឡើង កាលពីខែមិថុនា ឆ្នាំនេះ នៅប្រទេសសិង្ហបុរី នាយករដ្ឋមន្ត្រីជប៉ុនរូបនេះ បានប្រកាសពីផែនការចាប់ដៃគូជាមួយប្រទេសក្នុងតំបន់ ដោយផ្តល់ជំនួយសន្តិសុខ សម្រាប់បណ្តាប្រទេសឥណ្ឌូ-ប៉ាស៊ីហ្វិក សម្រាប់សន្តិសុខដែនសមុទ្រចំនួន $២ ពាន់លាន រយៈពេល ៣ ឆ្នាំខាងមុខ។
ជំនួយទឹកប្រាក់ដ៏សម្បើមនោះ នឹងផ្តោតលើសកម្មភាពពង្រឹងទូកល្បាត និងហេដ្ឋារចនាសម្ព័ន្ធដឹកជញ្ជូនតាមសមុទ្រ រួមទាំងការវិនិយោគលើធនធានមនុស្សចាំបាច់ ដូចជាការបណ្តុះបណ្តាល និងការអប់រំ។ នេះបើផ្អែកតាម Japantimes បណ្តាញសារព័ត៌មានមានមូលដ្ឋាន នៅប្រទេសជប៉ុន។
កាលពីខែសីហា រដ្ឋមន្ត្រីការពារជាតិជប៉ុន លោក Yasukazu Hamada បានដាក់សំណើថវិកាចំនួន $៤០ ពាន់លាន ដែលជាចំនួនកើនឡើងខ្ពស់មិនធ្លាប់មានក្នុងវិស័យយោធា។ ទឹកប្រាក់កើនឡើងនេះ គឺស្របនឹងអ្វី ដែលជប៉ុនដាក់ចេញនូវគោលនយោបាយការពារជាតិមួយចំនួន។
ផ្អែកតាមការផ្សាយរបស់ AFP កាលពីថ្ងៃចន្ទ លោក Hamada បានប្រាប់អ្នកសារព័ត៌មានបន្ទាប់ពីកិច្ចពិភាក្សាជាមួយនាយករដ្ឋមន្ត្រីថា៖ «យើងនឹងចាត់វិធានការថវិកា ដើម្បីបង្កើនការចំណាយលើវិស័យការពារជាតិ និងផ្សេងទៀតដល់ ២% នៃ GDP បច្ចុប្បន្ន នៅឆ្នាំ ២០២៧»។
ការចំណាយលើវិស័យការពារជាតិរបស់ប្រទេសជប៉ុន ត្រូវបានកំណត់ប្រហែល ១% នៃ GDP ឬតិចជាងនេះអស់រយៈពេលជាច្រើនទសវត្សរ៍មកហើយ ប៉ុន្តែគណបក្សប្រជាធិបតេយ្យសេរីរបស់លោក គីស៊ីដា បានបង្ហាញពីផែនការ ក្នុងការជំរុញតួលេខនេះឱ្យកាន់តែជិតទៅនឹងស្តង់ដារបស់អង្គការណាតូចំនួន ២%។ នេះបើតាម AFP។
ការកើនឡើងសម្ពាធពីប្រទេសចិន រួមទាំងសមយុទ្ធយោធា និងវត្តមានទូក នៅជុំវិញកោះ ដែលមានជម្លោះជាមួយជប៉ុន ក៏ដូចជាការឈ្លានពានរបស់រុស្ស៊ីមកលើប្រទេសជិតខាងរបស់ខ្លួន បានជួយកសាងការគាំទ្រសម្រាប់ការចំណាយកើនឡើង ក្នុងវិស័យយោធារបស់រដ្ឋាភិបាល លោក គីស៊ីដា។
ប្រព័ន្ធផ្សព្វផ្សាយក្នុងស្រុក បាននិយាយថា គោលដៅមួយនៃការចំណាយបន្ថែម គឺសមត្ថភាព «ប្រឆាំងការផ្លោងពីចម្ងាយ» ជាអាវុធដែលអាចកំណត់គោលដៅទីតាំងបាញ់មីស៊ីលរបស់សត្រូវ ហើយត្រូវបានពិពណ៌នា ដោយទីក្រុងតូក្យូថា ជា«អ្នកការពារ»។
កូរ៉េខាងជើង តាមរយៈការបាញ់កាំជ្រួចជាបន្តបន្ទាប់ រួមទាំងមួយចំនួន ដែលហោះរំលងប្រទេសជប៉ុន បានជួយជំរុញផែនការបង្កើនការចំណាយលើវិស័យយោធារបស់ជប៉ុន អាចទៅរួចផងដែរ។ ការស្ទង់មតិដែលចេញផ្សាយដោយទីភ្នាក់ងារព័ត៌មានក្យូដូ បានបង្ហាញថា ជាង ៦០% នៃអ្នកឆ្លើយតបពេញចិត្តនឹងការទទួលបាន «សមត្ថភាពប្រឆាំងការផ្លោង»។ ថ្លែងនៅក្នុងសភា លោក Kishida ថា សមត្ថភាពប្រឆាំងការបាញ់ផ្លោង គឺជាជម្រើស ១ ក្នុង ចំណោមជម្រើសជាច្រើន ដែលត្រូវបានថ្លឹងថ្លែង៕