ទីប្រឹក្សាសន្តិសុខជាតិអាមេរិកសម្រាប់តំបន់ឥណ្ឌូ-ប៉ាស៊ីហ្វិក លោក ជែក ស៊ូល្លីវ៉ាន (Jake Sullivan) នៅថ្ងៃព្រហស្បតិ៍នេះបានអះអាងថា សហរដ្ឋអាមេរិកកំពុងធ្វើការដាក់ទណ្ឌកម្មថ្មីប្រឆាំងនឹងកូរ៉េខាងជើង ខណៈពេលដែលទីក្រុងព្យុងយ៉ាង កំពុងឆ្ពោះទៅមុខជាមួយនឹងការអភិវឌ្ឍកាំជ្រួចដែលត្រូវបានហាមឃាត់ និងជាសញ្ញានៃការសាកល្បងនុយក្លេអ៊ែរថ្មី។
សហរដ្ឋអាមេរិកបានប្រើទណ្ឌកម្មសេដ្ឋកិច្ចប្រឆាំងកូរ៉េខាងជើង ជាយូរមកហើយ ប៉ុន្តែការដាក់ទណ្ឌកម្មកន្លងមកគ្មានប្រសិទ្ធភាពក្នុងការទប់ស្គាត់កូរ៉េខាងជើងពីការអភិវឌ្ឍកម្មវិធីនុយក្លេអ៊ែរនោះទេ។
ថ្លែងប្រាប់សន្និសីទមួយនៅទីក្រុងសេអ៊ូលដែលរៀបចំដោយមជ្ឈមណ្ឌលសិក្សាយុទ្ធសាស្ត្រ និងអន្តរជាតិដែលមានមូលដ្ឋាននៅសហរដ្ឋអាមេរិក និងក្រុមហ៊ុនប្រព័ន្ធផ្សព្វផ្សាយ JoongAng កូរ៉េខាងត្បូង លោក ស៊ូល្លីវ៉ាន បញ្ជាក់ថា៖«យើងមានកញ្ចប់វិធានការទណ្ឌកម្មថ្មីដែលនឹងកើតឡើងដូចដែលយើងនិយាយ»។
នៅពេលថ្លែងតាមរយៈការតភ្ជាប់វីដេអូពីចម្ងាយ លោក ស៊ូល្លីវ៉ាន មិនបានរៀបរាប់លម្អិតអំពីទណ្ឌកម្មដែលអាមេរិកប្រុងដាក់ប្រឆាំងកូរ៉េខាងជើងទេ ប៉ុន្តែបាននិយាយថា ទីក្រុងវ៉ាស៊ីនតោនបានប្តេជ្ញាចិត្តក្នុងការប្រើប្រាស់សម្ពាធ និងការទូតដើម្បីទាញកូរ៉េខាងជើងឱ្យបោះបង់ឃ្លាំងអាវុធនុយក្លេអ៊ែររបស់ខ្លួន។
បន្ទាប់ពីកូរ៉េខាងជើងបាញ់មីស៊ីលជាច្រើនគ្រាប់ រួមទាំងមីស៊ីលឆ្លងទ្វីបផងនោះ សហរដ្ឋអាមេរិកបង្ហាញអំពីការបង្កើនកិច្ចសហប្រតិបត្តិការជាមួយសម្ព័ន្ធរបស់ខ្លួននៅក្នុងតំបន់ មានកូរ៉េខាងត្បូង និងជប៉ុន ក្នុងការបង្កើនសមយុទ្ធយោធារួមគ្នា ដើម្បីបង្ហាញសាច់ដុំតបទៅកូរ៉េខាងជើងវិញ។
ប្រទេសកូរ៉េខាងជើង ជារឿយៗបាននិយាយថា ការរំសាយអាវុធនុយក្លេអ៊ែរគឺនៅក្រៅតុ ហើយបានចោទប្រកាន់សហរដ្ឋអាមេរិក និងសម្ព័ន្ធមិត្តរបស់ខ្លួនថាបានអនុវត្តគោលនយោបាយ «អរិភាព» រួមទាំងការដាក់ទណ្ឌកម្ម ដែលបានធ្វើឱ្យប្រទេសនេះគ្មានជម្រើសក្រៅពីពង្រីកយោធារបស់ខ្លួននោះទេ។
លោក ស៊ូល្លីវ៉ាន បាននិយាយថា ទីក្រុងវ៉ាស៊ីនតោនមិនមានចេតនាអាក្រក់ចំពោះកូរ៉េខាងជើងទេ ហើយបើកចំហសម្រាប់កិច្ចពិភាក្សាដោយគ្មានលក្ខខណ្ឌមុន។
សហរដ្ឋអាមេរិកបានដាក់ចេញទណ្ឌកម្មជាយូរមកហើយ ប៉ុន្តែមិនបានបញ្ឈប់កម្មវិធីមីស៊ីល និងអាវុធនុយក្លេអ៊ែរដែលកាន់តែទំនើបរបស់កូរ៉េខាងជើងនោះទេ ហើយចិន និងរុស្ស៊ីបានរារាំងកិច្ចខិតខំប្រឹងប្រែងនាពេលថ្មីៗនេះ ដើម្បីដាក់ទណ្ឌកម្មបន្ថែមទៀតរបស់អង្គការសហប្រជាជាតិ ដោយនិយាយថាពួកគេគួរតែត្រូវបានបន្ធូរបន្ថយដើម្បីចាប់ផ្តើមកិច្ចពិភាក្សា និងជៀសវាងការប៉ះពាល់ដល់មនុស្សធម៌៕
វីដេអូ៖