រុស្ស៊ីដែលកំពុងរងទណ្ឌកម្មយ៉ាងខ្លាំងមិនធ្លាប់ជួបប្រទះពីបស្ចិមប្រទេស បន្ទាប់ពីការលើកទ័ពចូលឈ្លានពានប្រទេសអ៊ុយក្រែន បានដាក់ចេញបញ្ជីទំនិញ ដែលខ្លួនត្រូវការ សម្រាប់វិស័យឧស្សាហកម្មទៅកាន់ប្រទេសឥណ្ឌា ដែលនៅរក្សាមិត្តភាពទាំងជាមួយរុស្ស៊ី និងពួកបស្ចិមប្រទេស។
ការរក្សាមិត្តភាពជាមួយប្រទេសរុស្ស៊ី ខណៈដែលប្រទេសជាច្រើន ក្នុងពិភពលោកថ្កោលទោសរុស្ស៊ី ព្រោះតែសង្គ្រាម នៅអ៊ុយក្រែននោះ ត្រូវបានគេមើលឃើញថា ប្រទេសឥណ្ឌាឆ្លៀតឱកាសនេះ ដើម្បីបង្កើនពាណិជ្ជកម្មជាមួយមហាអំណាចរុស្ស៊ី កាត់បន្ថយឱនភាពពាណិជ្ជកម្ម។
តាមការចុះផ្សាយរបស់ទីភ្នាក់ងារព័ត៌មានរ៉យទ័រ ដែលទទួលបាន បញ្ជីទំនិញ ដែលរុស្ស៊ីដាក់ស្នើទៅប្រទេសឥណ្ឌា រដ្ឋាភិបាលទីក្រុងម៉ូស្គូ បានបញ្ជូនបញ្ជីផលិតផល ៥០០ ប្រភេទ ដែលខ្លួនត្រូវការពីរដ្ឋាភិបាលទីក្រុងញូវដែលី ដែលភាគច្រើនជាសម្ភារ និងគ្រឿងបន្លាស់បម្រើឱ្យវិស័យឧស្សាហកម្ម។ ទោះបីយ៉ាងណាក្ដី វាមិនទាន់ច្បាស់ថា តើទំនិញប៉ុន្មានប្រភេទ ដែលនៅទីបំផុត ឥណ្ឌានឹងត្រូវនាំចេញ និងក្នុងបរិមាណប៉ុន្មាននោះឡើយ ប៉ុន្តែប្រភពរដ្ឋាភិបាលឥណ្ឌាបាននិយាយថា សំណើនេះ គឺមិនធម្មតា នៅក្នុងវិសាលភាពរបស់ប្រភេទមុខទំនិញនីមួយៗឡើយ។
ប្រភពស្និទ្ធនឹងកិច្ចការពាណិជ្ជកម្មដែលរ៉យទ័របានដកស្រង់សម្ដី បាននិយាយថា ប្រទេសឥណ្ឌាមានបំណងចង់ជំរុញពាណិជ្ជកម្ម តាមរបៀបនេះ ខណៈដែលខ្លួនព្យាយាមបង្រួមឱនភាពពាណិជ្ជកម្ម ដែលរីកប៉ោងជាមួយរុស្ស៊ី។ ទោះជាយ៉ាងណាក៏ដោយ ក្រុមហ៊ុនមួយចំនួន បានសម្តែងការព្រួយបារម្ភអំពីការធ្លាក់ចុះខ្លាំង ដោយសារទណ្ឌកម្មរបស់លោកខាងលិចដ៏មានសក្តានុពល។
ឥណ្ឌា ទោះបីពេលខ្លះរិះគន់រុស្ស៊ីរឿងបង្កសង្គ្រាម នៅអ៊ុយក្រែនក៏ពិតមែន ប៉ុន្តែឥណ្ឌាដែលជាមហាអំណាច នៅតំបន់អាស៊ី និងមានសេដ្ឋកិច្ចធំទី ៥ ក្នុងពិភពលោក តែងតែស្រូបយកផលិតផលពីរុស្ស៊ីជាបន្តបន្ទាប់ ដូចជាប្រេង ជីកសិកម្ម និងធ្យូងថ្មជាដើម។ នេះបើតាម CNN។
តាមប្រភពចុះផ្សាយនានាមាន BBC ជាដើម បានលើកឡើងថា ក្រោយសង្គ្រាម នៅអ៊ុយក្រែន ចាប់ផ្តើម រុស្ស៊ីចាប់ផ្តើមរងទណ្ឌកម្មភ្លាមៗ ហើយឥណ្ឌាបន្តទទួលទិញប្រេងពីរុស្ស៊ី ដែលមានតម្លៃទាបជាងរុស្ស៊ីលក់ទៅឱ្យទីផ្សារអឺរ៉ុប ចន្លោះពី ២០ ទៅ ៣០ ដុល្លារ ក្នុង ១បារ៉ែល ហើយបើតាមរ៉យទ័រ ប្រភពឧស្សាហកម្ម នៅទីក្រុងម៉ូស្គូ ដែលបានបដិសេធមិនបញ្ចេញឈ្មោះ ដោយសារតែភាពរសើបនៃបញ្ហានេះ បានប្រាប់ថា ក្រសួងឧស្សាហកម្ម និងពាណិជ្ជកម្មរបស់រុស្ស៊ីបានស្នើសុំឱ្យក្រុមហ៊ុនធំៗ ផ្គត់ផ្គង់ចំនួនវត្ថុធាតុដើម និងឧបករណ៍សម្ភារ ដែលភាគីដៃគូត្រូវការ។
ប្រភពនោះបានបន្ថែមថា ការពិភាក្សាបន្ថែមទៀតនឹងត្រូវការ ដើម្បីយល់ព្រមលើលក្ខណៈជាក់លាក់ និងបរិមាណ ហើយការផ្គត់ផ្គង់មិនត្រូវបានកំណត់ ចំពោះប្រទេសឥណ្ឌានោះទេ។ ប្រភពចំនួន ២ របស់ឥណ្ឌា បានឱ្យដឹងថា សំណើរបស់រុស្ស៊ី ត្រូវបានធ្វើឡើងជាច្រើនសប្តាហ៍មុនដំណើរទស្សនកិច្ចរបស់រដ្ឋមន្ត្រីការបរទេសឥណ្ឌា លោក Subrahmanyam Jaishankar ទៅកាន់ទីក្រុងម៉ូស្គូ ចាប់ពីថ្ងៃទី ៧ ខែវិច្ឆិកា។ ភ្លាមៗនោះ គេមិនទាន់ដឹងច្បាស់អំពីអ្វីដែលត្រូវបានបញ្ជូន ដោយក្រុងញូវដែលីទៅកាន់ប្រទេសរុស្ស៊ី ក្នុងអំឡុងពេលនៃដំណើរទស្សនកិច្ចនេះទេ។
រដ្ឋាភិបាលរបស់នាយករដ្ឋមន្ត្រី ណារ៉េនដ្រា ម៉ូឌី (Narendra Modi) មិនបានចូលរួមជាមួយបណ្តាប្រទេសលោកខាងលិច ក្នុងការរិះគន់ទីក្រុងម៉ូស្គូ ដោយបើកចំហ ចំពោះសង្គ្រាម នៅអ៊ុយក្រែននោះទេ ហើយបានបង្កើនការទិញប្រេងរបស់រុស្ស៊ីយ៉ាងខ្លាំង ដែលបានរារាំងវាពីផលប៉ះពាល់មួយចំនួននៃទណ្ឌកម្ម។ ក្នុងអំឡុងទស្សនកិច្ច នៅទីក្រុងម៉ូស្គូ លោក Jaishankar បាននិយាយថា ឥណ្ឌាចាំបាច់ត្រូវជំរុញការនាំចេញទៅរុស្ស៊ី ដើម្បីធ្វើឱ្យមានតុល្យភាពពាណិជ្ជកម្មទ្វេភាគី ដែលឥឡូវនេះ កំពុងងាកទៅរករុស្ស៊ី។
ដំណើរទស្សនកិច្ចរបស់រដ្ឋមន្ត្រីការបរទេសឥណ្ឌា ត្រូវបានអមដំណើរ ដោយមន្ត្រីជាន់ខ្ពស់ទទួលបន្ទុកកសិកម្ម ប្រេង និងឧស្ម័នធម្មជាតិ កំពង់ផែ និងការដឹកជញ្ជូន ហិរញ្ញវត្ថុ សារធាតុគីមី និងជី និងពាណិជ្ជកម្ម ដែលគាត់បានប្រាប់ថា បង្ហាញពីសារៈសំខាន់នៃទំនាក់ទំនងជាមួយរុស្ស៊ី។
ការដាក់ទណ្ឌកម្មរបស់លោកខាងលិចបានធ្វើឱ្យការផ្គត់ផ្គង់ផលិតផលសំខាន់ៗមួយចំនួន នៅក្នុងប្រទេសរុស្ស៊ីចុះខ្សោយ។ ក្រុមហ៊ុនអាកាសចរណ៍ កំពុងជួបប្រទះនឹងការខ្វះខាតគ្រឿងបន្លាស់យ៉ាងខ្លាំង ព្រោះយន្តហោះស្ទើរតែទាំងអស់ផលិត ដោយបរទេស។គ្រឿងបន្លាស់រថយន្តក៏មានតម្រូវការផងដែរ ដោយក្រុមហ៊ុនផលិតរថយន្តទូទាំងពិភពលោក បានចាកចេញពីទីផ្សាររបស់រុស្ស៊ី។
ប្រភពនៅក្នុងឧស្សាហកម្មលក់រថយន្តរបស់រុស្ស៊ី បានឱ្យដឹងថា ក្រសួងពាណិជ្ជកម្ម បានបញ្ជូនបញ្ជីនៃគ្រឿងបន្លាស់រថយន្ត ដែលចាំបាច់ទៅកាន់ក្រសួង និងទីភ្នាក់ងាររដ្ឋ ដែលត្រូវគ្នា ក្នុងប្រទេសផ្សេងទៀត រួមទាំងឥណ្ឌាផងដែរ។ សម្រាប់យន្តហោះ និងឧទ្ធម្ភាគចក្រ រុស្ស៊ីបានស្នើសុំទំនិញ ៤១ មុខ រួមទាំងគ្រឿងបន្លាស់ឧបករណ៍ចុះចត ប្រព័ន្ធប្រេងឥន្ធនៈ ប្រព័ន្ធទំនាក់ទំនង និងប្រព័ន្ធពន្លត់អគ្គិភ័យ អាវការពារជីវិត និងសម្បកកង់យន្តហោះជាដើម៕
វីដេអូ៖