ក្រសួងការពារជាតិរុស្ស៊ី និងប្រមុខរដ្ឋបាលប្រធានាធិបតីអ៊ុយក្រែន បាននិយាយថា ប្រទេសទាំង ២ បានដោះដូរអ្នកទោស ៥០ នាក់ នៅថ្ងៃព្រហស្បតិ៍ ទី ១ ធ្នូ ឆ្នាំ ២០២២។ នេះ គឺជាការដោះដូរអ្នកទោសគ្នាចុងក្រោយរវាងភាគីទាំង ២។
នៅថ្ងៃព្រហស្បតិ៍ មន្ត្រីជាន់ខ្ពស់រុស្ស៊ីដែលឈរជើងនៅក្នុងតំបន់ដូណេត (Donetsk) ដែលជាតំបន់កាន់កាប់មួយផ្នែកដោយអ៊ុយក្រែន បាននិយាយថា ទីក្រុងមូស្គូ និងទីក្រុងកៀវ នឹងដោះដូរឈ្លើយសឹកសង្គ្រាមឱ្យគ្នាទៅវិញទៅមកចំនួន ៥០ នាក់។
លោក អេឌ្រី យ៊ែរម៉ាក (Andrei Yermak) ប្រធានរដ្ឋបាលប្រធានាធិបតីអ៊ុយក្រែន បានរាយការណ៍អំពីការដោះលែងអ្នកការពារអ៊ុយក្រែនចំនួន ៥០ នាក់ ហើយបាននិយាយថាការដោះដូរអ្នកទោសសង្គ្រាមនឹងបន្តរហូតទាល់តែប្រជាជនអ៊ុយក្រែនទាំងអស់ត្រូវបានរំដោះឱ្យមានសេរីភាព។ «អ្នកការពារនៃម៉ារីយ៉ូប៉ូល និង អាហ្សូវស្តល បានត្រឡប់មកវិញ និងអ្នកដែលត្រូវបានចាប់ខ្លួនផងដែរ នៅក្នុងសមរភូមិក្នុងតំបន់គោលដៅ ដូណេត លូហាន និងហ្សាប៉ូរីចា»។
នេះ ជាសារដែលលោក យ៊ែរម៉ាក បានសរសេរនៅលើកម្មវិធីផ្ញើសារតេឡេក្រាម។
ចំណែក ភាគីរុស្ស៊ីវិញនិយាយថាខ្លួននឹងដឹកបញ្ជូនអ្នកទោសដែលត្រូវបានដោះលែងទៅកាន់ទីក្រុងមូស្គូ ដើម្បីពិនិត្យសុខភាព និងការស្តារនីតិសម្បទា។
ប្រមុខរដ្ឋបាលប្រធានាធិបតីអ៊ុយក្រែន បានឱ្យដឹងដែរថា ចំនួនអ្នកទោសសង្គ្រាមអ៊ុយក្រែនខ្លះដែលត្រូវបានដោះលែងកាលពីថ្ងៃព្រហស្បតិ៍ ត្រូវបានឃុំទុកនៅក្នុងមជ្ឈមណ្ឌលឃុំឃាំងអូឡេនីវកា (Olenivka)។
អ្នកទោសអ៊ុយក្រែនរាប់សិបនាក់ដែលត្រូវបានឃុំខ្លួន ដោយពួកបំបែកខ្លួនដែលគាំទ្រដោយទីក្រុងមូស្គូនៅក្នុងទីក្រុងអូឡេនីវកាជិតតំបន់ដូណេត ត្រូវបានសម្លាប់នៅក្នុងការវាយប្រហារមួយកាលពីខែកក្កដា៕