ការវាយប្រហារ​ជា​ញឹកញាប់ និង​ទ្រង់ទ្រាយ​ធំ​ពី​សំណាក់​កងទ័ព​រុស្ស៊ី​ទៅលើ​ហេដ្ឋារចនាសម្ព័ន្ធ​ស៊ីវិល​របស់​អ៊ុយ​ក្រែ​ន ជាពិសេស​បណ្ដាញ​ថាមពល បានធ្វើឱ្យ​ប្រជាជន​ស៊ីវិល​រាប់លាន​នាក់​រស់នៅ​ដោយ​គ្មាន​ភ្លើង ដើម្បី​កម្ដៅ និង​បំភ្លឺ ហើយ​និង​ទឹក​ប្រើប្រាស់ ខណៈ​រដូវរងា​ក៏​ឈានចូល​មកដល់ ហើយ​សីតុណ្ហភាព​ចាប់ផ្ដើម​ធ្លាក់ចុះ​ក្រោម​សូន្យ​។

​រូបភាព​បែបនេះ ត្រូវបាន​អ្នកនយោបាយ ក៏ដូចជា​ប្រព័ន្ធ​ផ្សព្វផ្សាយ​អ៊ុយ​ក្រែ​ន និង​បស្ចិម​លោក បាន​ពិពណ៌នា​ថា រុស្ស៊ី​កំពុង​បង្ក​ស្ថានភាព​សង្គ្រាម​ដ៏​វេទនា និង​ធំ​បំផុត​មួយ ដែល​ជន​ស៊ីវិល​អឺរ៉ុប​មិន​ធ្លាប់​ជួបប្រទះ​អស់​រយៈពេល​ជាច្រើន​ទសវត្សរ៍​មកហើយ​។ ពិតណាស់ សកម្មភាព​យោធា​របស់​រុស្ស៊ី ត្រូវបាន​អ៊ុយ​ក្រែ​ន និង​សម្ព័ន្ធមិត្ត​លោកខាងលិច​មួយចំនួន​ថ្កោលទោស​ថា ជា​ឧក្រិដ្ឋកម្ម​សង្គ្រាម ហើយ​ថា ក្រុង​ម៉ូស្គូ កំពុង​ព្យាយាម​យក​រដូវរងា​ធ្វើជា​អាវុធ ក្នុង​ជម្លោះ ដែល​ខ្លួន​ចាញ់​ប្រៀប ចាប់តាំងពី​ដើមខែ​កញ្ញា ពោលគឺ​បន្ទាប់ពី​ក្រុង​កៀវ ចាប់ផ្ដើម​ប្រតិបត្តិការ​វាយបក​។​

​ការវាយប្រហារ​លើ​ហេ​ដ្ឋា​​រចនាសម្ព័ន្ធ​ថាមពល​ទ្រង់ទ្រាយ​ធំ ដែល​រុស្ស៊ី​ប្រើ​ជា​យុទ្ធសាស្ត្រ​ថ្មី និង​អនុវត្ត​យ៉ាង​ញឹកញាប់ ចាប់តាំងពី​ខែតុលា រហូតមកទល់​ពេលនេះ បានបង្ហាញ​ពី​ការ​ពួតដៃគ្នា​កាន់តែខ្លាំង​របស់លោក​ខាងលិច ក្នុង​ការបន្ត​ផ្ដល់ជំនួយ​ដល់​អ៊ុយ​ក្រែ​ន និង​បន្ថែម​មន្ទិល​​សង្ស័យ​ជុំវិញ​រយៈពេល​ដែល​សង្គ្រាម​នឹង​បន្ត​អូសបន្លាយ​យ៉ាង​រ៉ាំរ៉ៃ បើទោះបីជា​អ្នកវិភាគ​មួយចំនួន លើកឡើងថា វា​ជា​យុទ្ធសាស្ត្រ​របស់​ក្រុង​ម៉ូស្គូ ក្នុង​ការដាក់​សម្ពាធ​ឱ្យ​ក្រុង​កៀវ​ចរចា​ក្ដី​។

​ក្នុង​កិច្ចសន្ទនា​តាម​ទូរស័ព្ទ​ជាមួយ​អធិការបតី​អាល្លឺម៉ង់ លោក អូ​ឡា​ហ្វ សូល​ហ្ស៍ កាលពី​ថ្ងៃ​សុក្រ​ទី​​ ២ ខែវិច្ឆិកា ប្រធានាធិបតី​រុស្ស៊ី លោក វ្ល៉ា​ឌី​មៀរ ពូ​ទីន បាន​អះអាងថា ការវាយប្រហារ​របស់​ទីក្រុង​ម៉ូស្គូ​លើ​ហេដ្ឋារចនាសម្ព័ន្ធ​របស់​អ៊ុយ​ក្រែ​ន គឺ​មិនអាច​ចៀស​រួច ដើម្បី​ឆ្លើយតប​នឹង​ការបង្ក​ហេតុ​របស់​ក្រុង​កៀវ ដោយ​លោក​សំដៅលើ​ការ​បំផ្ទុះ​ស្ពាន​ឆ្លងទៅ​ឧបទ្វីប​គ្រី​មា ក្នុង​ខែតុលា​។ នេះ​បើតាម​ទីភ្នាក់ងារ​ព័ត៌មាន AFP​។​

​មកទល់ពេលនេះ សង្គ្រាម​ឈ្លានពាន​អ៊ុយ​ក្រែ​ន​ពី​សំណាក់​រុស្ស៊ី បានអូសបន្លាយ​អស់​រយៈពេល​ជិត ១០ ​ខែ​ហើយ ហើយ​បើ​យោងតាម​ទិន្នន័យ​ផ្លូវការ​ពី​អង្គការសហប្រជាជាតិ​គិត​ត្រឹម​ចុងខែ​វិច្ឆិកា សង្គ្រាម​នេះ​បានសម្លាប់​ជីវិត​ជន​ស៊ីវិល​ប្រមាណ​ជាង ៦ ៦០០ ​នាក់ ដែល​ក្នុងនោះ​មាន​ក្មេងៗ​ជាង ៤០០​ នាក់​។

​តែ​យ៉ាងណាក្ដី រុស្ស៊ី​តែងតែ​ទទូច​បង្ហាញ​ពី​ភាព​ស្អាតស្អំ​ដដែលៗ​ថា រាល់​ប្រតិបត្តិការ​យោធា​របស់ខ្លួន​ធ្វើឡើង ដោយ​មិន​កំណត់​គោលដៅ​លើ​ជន​ស៊ីវិល​នោះទេ ហើយ​ក៏បាន​អះអាង​ផងដែរ​ថា ការវាយប្រហារ​លើ​ហេ​ដ្ឋា​រចនាសម្ព័ន្ធ​អ៊ុយ​ក្រែ​ន​របស់​កងទ័ព​រុស្ស៊ី ធ្វើ​ឡើងលើ​តែ​ប្រព័ន្ធ​បញ្ជាការ​​យោធា​អ៊ុយ​ក្រែ​ន និង​កន្លែង​ថាមពល​ពាក់ព័ន្ធ​ប៉ុណ្ណោះ​។​

​កាលពី​ថ្ងៃ​ព្រហស្បតិ៍ ទី​ ១ ខែធ្នូ រដ្ឋមន្ត្រីការបរទេស​រុស្ស៊ី លោក Sergei Lavrov បាន​លើកឡើងថា រលក​នៃ​ការ​ផ្លោង​មី​ស៊ី​ល​រាប់រយ​គ្រាប់​ទៅលើ​ហេដ្ឋារចនាសម្ព័ន្ធ​របស់​អ៊ុយ​ក្រែ​ន ធ្វើឡើង​ក្នុង​បំណង​បង្អង់​ការដឹកជញ្ជូន​ការផ្គត់ផ្គង់​សព្វាវុធ​ពី​លោកខាងលិច​ឱ្យ​ក្រុង​កៀវ​។​

​ប៉ុន្តែ​ការអះអាង​នេះ ផ្ទុយគ្នា​យ៉ាង​ឆ្ងាយ​ពីអ្វី ដែល​អ៊ុយ​ក្រែ​ន កំពុង​ជួបប្រទះ ជាពិសេស គឺ​មនុស្ស​រាប់លាន​នាក់ គ្មាន​អគ្គិសនី​គ្រប់គ្រាន់​។ បើតាម​លោក​ប្រ​ធានា​​ធិបតី វ៉ូ​ឡូ​ឌី​មៀរ ហ្សេ​ឡេ​ន​ស្គី ការវាយប្រហារ​របស់​រុស្ស៊ី នៅក្នុង​ខែវិច្ឆិកា​កន្លងទៅ បាន​កាត់ផ្ដាច់​បណ្ដាញ​ថាមពល​របស់​អ៊ុយ​ក្រែ​ន​ប្រហែល​ពាក់កណ្ដាល និង​ធ្វើឱ្យ​ប្រជាជន​ជាង ១០​ លាន​នាក់ គ្មាន​ភ្លើង​ប្រើប្រាស់ ហើយ​ខណៈ​ដែល​រដូវរងា​កាន់តែ​ត្រជាក់​ខ្លាំង​ឡើងៗ លោក ហ្សេ​ឡេ​ន​ស្គី បាន​អះអាងថា ប្រជាជន​អ៊ុយ​ក្រែ​ន​ជាង ៦​ លាន​នាក់ នៅតែ​ប្រឈម​នឹង​បញ្ហា​នេះ​នៅឡើយ​។

​អ្នកជំនាញ និង​រដ្ឋាភិបាល​លោកខាងលិច​ផ្សេងៗ បានបង្ហាញ​ទស្សនៈ​ថា ការវាយប្រហារ​របស់​រុស្ស៊ី ដែល​ធ្វើឱ្យ​ប្រជាជន​ស៊ីវិល​រាប់លាន​នាក់​គ្មាន​ភ្លើង​ប្រើប្រាស់ ក្នុង​រដូវរងា​នាពេលនេះ គឺជា​យុទ្ធសាស្ត្រ​បំបាក់ស្មារតី និង​បំភ័យ​ប្រជាជន​អ៊ុយ​ក្រែ​ន​។​

​ចក្រភព​អង់គ្លេស បានលើកឡើង ថា ការវាយប្រហារ​ទំនងជា​ផ្នែក​ ១ ​នៃ​យុទ្ធសាស្ត្រ ដែល​រុស្ស៊ី​ប្រើ​នៅក្នុង​ជម្លោះ​មុនៗ ដើម្បី​បំបាក់ស្មារតី​ប្រជាជន ហើយ​បង្ខំ​ឱ្យ​មេដឹកនាំ​ទាល់ច្រក​។ ប៉ុន្តែ​ដោយ​មិនបាន​ប្រើ​យុទ្ធសាស្ត្រ​នេះ​ពី​ដំណាក់​កាល​ដំបូង វា​ក៏​មិនសូវមាន​ប្រសិទ្ធភាព ដោយសារ​អ៊ុយ​ក្រែ​ន ដែល​បន្ត​ទទួល​ជំនួយ​សព្វាវុធ មនុស្សធម៌ និង​ការទូត​ពី​លោក​ខាង​​លិច នៅ​តាំងចិត្ត​បន្ត​ប្រយុទ្ធ​។

​យ៉ាងណាមិញ ការខូចខាត​ហេដ្ឋារចនាសម្ព័ន្ធ​នេះ បានធ្វើឱ្យ​វិបត្តិ​មនុស្សធម៌​ទាំង​ក្នុង និង​ក្រៅ​ស្រុក​កាន់តែ​ធ្ងន់ធ្ងរ​ទៅៗ ហើយ​អ្វីដែល​មន្ត្រី​ក្រុង​កៀវ​អំពាវនាវ​នៅពេលនេះ គឺ​ជំនួយ​ពី​សម្ព័ន្ធមិត្ត​របស់ខ្លួន មិន​ថា សព្វាវុធ​ទំនើបៗ ឬ​តម្រូវការ​ផ្សេងៗ​ទៀត ដូចជា​ម៉ាស៊ីនភ្លើង​ជាដើម​។ មិន​ត្រឹមតែ​ប៉ុណ្ណោះ អ៊ុយ​ក្រែ​ន​ថែមទាំង​ព្រមាន​ពី​ការបន្ត​វាយប្រហារ​របស់​រុស្ស៊ី ដែល​នឹង​ធ្វើឱ្យ​កង្វះ​ភ្លើង​របស់​អ៊ុយ​ក្រែ​នប​ន្ត​អូសបន្លាយ​រយៈពេល​យូរ ទោះបីជា​អ្នក​បច្ចេកទេស​ខំប្រឹង​ត​បណ្ដាញ​ភ្លើង​មកវិញ​តាម​លទ្ធភាព​ក៏ដោយ​។

​កាលពី​ពាក់កណ្ដាល​ខែវិច្ឆិកា វិមាន​ក្រឹម​ឡាំង បាន​លើកឡើងថា មូលហេតុ​ដែល​ជន​ស៊ីវិល​អ៊ុយ​ក្រែ​ន​ត្រូវ​ប្រឈម​នឹង​ការ​ដាច់​ភ្លើង គឺ​ដោយសារតែ​ប្រទេស​នេះ​បដិសេធ ក្នុង​ការចរចា​ជាមួយ​រុស្ស៊ី​។ អ្នកនាំពាក្យ​វិមាន​ក្រឹម​ឡាំង លោក ឌី​មី​ទ្រី ប៉េ​ស្កូវ បាន​ថ្លែងថា​៖ «​ការ​គ្មាន​ឆន្ទៈ​របស់​ភាគី​អ៊ុយ​ក្រែ​ន ក្នុងការ​ដោះស្រាយ​បញ្ហា ឬ​ចាប់ផ្តើម​ការចរចា និង​ការបដិសេធ​រក​ដំណោះស្រាយ​រួម បង្ក​ជា​ផលវិបាក​នេះ (​ការ​ដាច់​ភ្លើង​) ដល់​ពួកគេ​»​។

​ការលើកឡើង​នេះ ហាក់ដូច​ជា​រុស្ស៊ី​ចង់​បង្ហើប​ថា ខ្លួន​ចង់ឱ្យ​អ៊ុយ​ក្រែ​ន​ចូល​តុ​ចរចា​បញ្ចប់​ជម្លោះ ប៉ុន្តែ​វា​ពិបាក​នឹង​ទៅរួច​ព្រោះ​ភាគី​ទាំង​ ២ មាន​លក្ខខណ្ឌ​រៀងៗ​ខ្លួន ដែលមាន​លក្ខណៈ​ផ្ទុយគ្នា​ស្រឡះ​។ កាលពី​ថ្ងៃ​សុក្រ វិមាន​ក្រឹម​ឡាំង បានចង្អុលបង្ហាញ​ថា ខ្លួន​គ្មាន​ចំណាប់អារម្មណ៍ សម្រាប់​កិច្ចពិភាក្សា​ពី​អ៊ុយ​ក្រែ​ន​ទេ បន្ទាប់ពី​ប្រធានាធិបតី​អាមេរិក លោក ចូ បៃ​ដិ​ន លើកឡើងថា លោក​សុខចិត្ត​អង្គុយ​ជាមួយ​លោកពូ​ទីន ប្រសិន​មេដឹកនាំ​រុស្ស៊ី ចង់​បញ្ចប់​ការប្រយុទ្ធ​គ្នា​នេះ​។

​ប្រតិកម្ម​ទៅ​លោក បៃ​ដិ​ន លោក ប៉េ​ស្កូវ នៃ​វិមាន​ក្រឹម​ឡាំង បាន​ប្រាប់​អ្នកសារព័ត៌មាន​ថា​៖ «​លោក (​បៃ​ដិ​ន​) បាន​និយាយថា ការចរចា​អាចធ្វើ​ទៅបាន លុះត្រាតែ​លោក ពូ​ទីន ដកខ្លួន​ចេញពី​អ៊ុយ​ក្រែ​ន​។ ប្រតិបត្តិការ​យោធា​ពិសេស​នៅតែ​បន្ត ព្រោះ​ក្រុង​ម៉ូស្គូ​មិនអាច​ទទួលយក​លក្ខខណ្ឌ​នេះ​បានទេ​»​។​

​គួរ​បញ្ជាក់ថា ក្នុងជំនួប​ជាមួយ​សម​ភាគី​បារាំង លោក​ប្រធានាធិបតី អេ​ម៉ា​ណូអែល ម៉ា​ក្រុង កាលពី​ថ្ងៃ​ព្រហស្បតិ៍ លោក បៃ​ដិ​ន បាន​លើកឡើងថា រុស្ស៊ី​ត្រូវតែ​ចេញពី​អ៊ុយ​ក្រែ​ន​។ ការទាមទារ​ឱ្យ​កងទ័ព​រុស្ស៊ី ត្រូវ​ដកចេញ​ពី​អ៊ុយ​ក្រែ​ន​ទាំងអស់នេះ គឺជា​ជំហរ​ដ៏​តឹងរ៉ឹង​របស់​រដ្ឋាភិបាល​ក្រុង​កៀវ ក្នុង​ការបន្ត​ប្រយុទ្ធ ដែល​មេដឹកនាំ​នៃ​សម្ព័ន្ធមិត្ត​បស្ចិម​លោក​តែង​និយាយ នៅពេល​ត្រូវ​សួរ​ពី​ដំណោះស្រាយ ដើម្បី​បញ្ចប់​ជម្លោះ​។

​បន្ថែម​ពី​ការបញ្ជាក់​ជាថ្មី​ពី​ជំហរ​ថ្កោលទោស​រុស្ស៊ី ចំពោះ​ការ​វាយ​​ប្រហារ​ហេដ្ឋារចនាសម្ព័ន្ធ​ស៊ីវិល និង​ជន​ស៊ីវិល​អ៊ុយ​ក្រែ​ន លោក ម៉ា​ក្រុង ថ្លែង​នៅពេល​ឈរ​ធ្វើ​សន្និសីទកាសែត​ជាមួយ​លោក បៃ​ដិ​ន ថា នៅពេល​អ៊ុយ​ក្រែ​ន​កំណត់​លក្ខខណ្ឌ សម្រាប់​កិច្ច​ព្រមព្រៀង​សន្តិភាព​រួចរាល់ លោក​សុខចិត្ត​ទៅ​និយាយ​ផ្ទាល់​ជាមួយ​លោក ពូ​ទីន ជាថ្មី​។​

​គួរ​បញ្ជាក់ថា ជំនួយ​យោធា គឺជា​ចំណុច​ចម្រូងចម្រាស​គ្នា​ដ៏​ធំ រវាង​លោកខាងលិច និង​រុស្ស៊ី ជុំវិញ​ការអូសបន្លាយ​នៃ​សង្គ្រាម​។ ប៉ុន្តែ​ការវាយប្រហារ​ហេ​ដ្ឋា​រចនា​សម្ព័ន្ធ​ស៊ីវិល​អ៊ុយ​ក្រែ​ន បានបង្ហាញ​ពី​ការ​សាមគ្គី​គ្នា​កាន់តែខ្លាំង ក្នុង​ប្លុក​ណា​តូ លើ​ជំនួយ ដើម្បីឱ្យ​ក្រុង​កៀវ «​ការពារ និង​រំដោះខ្លួន​» ប្រឆាំងនឹង​រុស្ស៊ី​។ រាប់​តាំងពី​រុស្ស៊ី ចាប់ផ្ដើម​ឈ្លានពាន​នៅ​ចុងខែ​កុម្ភៈ លោកខាងលិច​បានផ្ដល់​ជំនួយ​យោធា​យ៉ាង​មហាសាល រួមមាន​សព្វាវុធ​ធុន​ធ្ងន់ ស្រាល និង​ទំនើប រួមទាំង​ការ​បង្វឹក​បង្ហាត់​កងទ័ព​អ៊ុយ​ក្រែ​ន​ជាដើម​។

យ៉ាងណាក៏ដោយ អ្នកវិភាគ​បាន​មើលឃើញថា ការចរចា​សន្តិភាព​នឹងមិន​ងាយ​សម្រេចបាន​ឆាប់ៗ​នោះទេ ដោយសារតែ​មានឱកាស​តិចតួច ហើយ​នោះ​មានន័យថា រដូវរងា​ដ៏​វេទនា នឹង​បន្ត​មាន​សម្រាប់​ប្រជាជន​អ៊ុយ​ក្រែ​ន ហើយ​តម្រូវការ​សម្រាប់​ជំនួយ​របស់​សហរដ្ឋអាមេរិក និង​សម្ព័ន្ធមិត្ត ក៏​នឹង​កាន់តែ​កើនឡើង​ខ្លាំង​ឡើងៗ​តាម​នោះដែរ​៕

វីដេអូ៖