សហរដ្ឋអាមេរិក និងរុស្ស៊ី បានចោទប្រកាន់គ្នាទៅវិញទៅមកថា គ្មានបំណងជំរុញឱ្យមានកិច្ចចរចាសន្តិភាព ជុំវិញបញ្ហាសង្គ្រាម នៅអ៊ុយក្រែន។ គួរដឹងដែរថា ក្នុងកិច្ចប្រជុំ នៅឯអង្គការសហប្រជាជាតិ (UN) ការអំពាវនាវឱ្យបង្កើតកិច្ចព្រមព្រៀងបទឈប់បាញ់ និងដោះស្រាយ តាមផ្លូវការទូត តែងតែត្រូវបានស្នើឡើង ដើម្បីឈានទៅបញ្ចប់សង្គ្រាមឈ្លានពាន ដោយរុស្ស៊ីអស់រយៈពេល ៩ខែមកហើយ។
ឯកអគ្គរដ្ឋទូតរុស្ស៊ីប្រចាំ នៅ UN លោក Vassily Nebenzia បានប្រាប់ទៅកាន់កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាពមនុស្សធម៌ នៅអ៊ុយក្រែនថា ទីក្រុងម៉ូស្គូ បានកត់សម្គាល់ឃើញមានការចាប់អារម្មណ៍ក្នុងដំណោះស្រាយតាមផ្លូវការទូត ពីសំណាក់បណ្ដារដ្ឋសមាជិក UN ជាច្រើន។
លោកបានលើកឡើងថា៖ «យើងកំពុងមានប្រតិកម្មខ្លាំងៗលើបញ្ហានេះ។ យើងសូមបញ្ជាក់ពីឆន្ទៈរបស់យើង ក្នុងការចូលតុចរចា»។ ប៉ុន្តែលោកនៅតែបញ្ជាក់ពីគោលបំណងថា រុស្ស៊ីចង់លុបបំបាត់មូលហេតុ និងឫសគល់ ដែលបង្ខំឱ្យរុស្ស៊ី ចាប់ផ្តើមប្រតិបត្តិការយោធាពិសេសរបស់ខ្លួន។
ទីក្រុងម៉ូស្គូ ធ្លាប់បានលើកឡើងថា បេសកកម្មរបស់ខ្លួន គឺដើម្បីដកហូតអាវុធ នៅអ៊ុយក្រែន ដើម្បីកុំឱ្យវាក្លាយជាការគំរាមកំហែងដល់ប្រទេសរុស្ស៊ី និងលុបបំបាត់លទ្ធិណាហ្ស៊ីនិយម តាមរយៈការទម្លាក់មេដឹកនាំ ដែលរុស្ស៊ីចាត់ទុកថា ជាអ្នកជាតិនិយម។ បណ្តាប្រទេសលោកខាងលិចជឿថា គោលបំណងពិតរបស់រុស្ស៊ី គឺចង់កម្ចាត់យោធាអ៊ុយក្រែន និងផ្តួលរំលំរដ្ឋាភិបាលដែលគាំទ្រលោកខាងលិច។
ឯកអគ្គរដ្ឋទូតអ៊ុយក្រែនប្រចាំនៅ UN លោក Sergiy Kyslytsya បានលើកឡើងថា៖ «អ៊ុយក្រែនត្រូវការសន្តិភាព ហើយអ៊ុយក្រែន ចង់បានសន្តិភាពច្រើនជាងប្រទេសដទៃទៅទៀត។ វាគឺជាទឹកដីរបស់យើង ដែលត្រូវបានកំពុងឈ្លានពាន។ សូមចងចាំរឿងនេះរាល់ពេលដែលទីក្រុងម៉ូស្គូព្យាយាមបញ្ចុះបញ្ចូលយើងថាវាមិនមែនជាអ្នកឈ្លានពាននោះទេប៉ុន្តែជាជនរងគ្រោះ ដែលតែងតែទទូចចង់បានសន្តិភាព»។
យ៉ាងក៏ដោយ លោក Nebenzia បានចោទប្រកាន់បណ្តាប្រទេសលោកខាងលិចថា គ្មានបំណងជួយស្វែងរកដំណោះស្រាយតាមរយៈការទូត នៅអ៊ុយក្រែននោះទេ ព្រោះពួកគេកំពុងបង្កើនការលក់ និងចែកចាយសព្វាវុធទៅកាន់ទីក្រុងកៀវ។ លោកលើកឡើងថា៖ «អ្វីដែលអ្នកកំពុងឃើញនៅពេលនេះ គឺជាសង្គ្រាមរវាងបស្ចិមប្រទេសប្រឆាំងនឹងរុស្ស៊ី។ នេះគឺជារឿង ដែលធ្វើឱ្យយើងគ្មានជម្រើសផ្សេង ក្រៅពីការបន្តប្រតិបត្តិការយោធាពិសេសរបស់យើង»។
ថ្មីៗនេះ រុស្ស៊ីបាននឹងកំពុងវាយលុកទៅកាន់ហេដ្ឋារចនាសម្ព័ន្ធថាមពលរបស់អ៊ុយក្រែនជាច្រើនដង និងច្រើនកន្លែង។ ប្រធានសម្របសម្រួលកិច្ចការមនុស្សធម៌ និងជំនួយសង្គ្រោះបន្ទាន់របស់ UN លោក Martin Griffiths បានប្រាប់ក្រុមប្រឹក្សាសន្តិសុខ កាលពីថ្ងៃអង្គារថា ការណ៍នេះបានធ្វើឱ្យពលរដ្ឋអ៊ុយក្រែនរាប់លាននាក់គ្មានថាមពលប្រើប្រាស់ ដូចជាការដែលមិនអាចទទួលបានកម្ដៅគ្រប់គ្រាន់ គ្មានអគ្គិសនី និងទឹកប្រើប្រាស់ ដែលធ្វើឱ្យវិបត្តិមនុស្សធម៌កាន់តែធ្ងន់ធ្ងរឡើង។
ឯកអគ្គរដ្ឋទូតរងអាមេរិកប្រចាំ នៅ UN លោកស្រី Lisa Carty បានប្រាប់ក្រុមប្រឹក្សាសមាជិកអចិន្ត្រៃយ៍ និងមិនអចិន្ត្រៃយ៍ទាំង ១៥ប្រទេសថា៖ «ការបន្តបាញ់កម្ទេចហេដ្ឋារចនាសម្ព័ន្ធអ៊ុយក្រែនរបស់ប្រធានាធិបតី លោក ពូទីន គឺជាភ័ស្តុតាង ដែលបង្ហាញថាគាត់មិនមានបំណងពិតប្រាកដ ក្នុងការប្រើប្រាស់វិធីសាស្ត្រចរចារ ឬការទូតនោះទេ។ ផ្ទុយទៅវិញគាត់កំពុងព្យាយាមបំផ្លាញឆន្ទៈរបស់អ៊ុយក្រែន ដោយការទម្លាក់គ្រាប់បែក និងបង្កកពលរដ្ឋអ៊ុយក្រែន ដើម្បីបង្ខំឱ្យចុះចូល»។
ក្រុមប្រឹក្សាសន្តិសុខអង្គការសហប្រជាជាតិ បានជួបប្រជុំជាច្រើនដងរួចមកហើយលើបញ្ហាអ៊ុយក្រែន ចាប់តាំងពីខែកុម្ភៈមក ប៉ុន្តែនៅតែមិនអាចចាត់វិធានការណាមួយប្រកបដោយប្រសិទ្ធភាពនៅឡើយទេ។ នេះគឺដោយសារតែរុស្ស៊ីតែងតែប្រើប្រាស់អំណាចវេតូ (Vetopower) របស់ខ្លួន។
អ្នកស្រី Edwige Koumby Missambo ឯកអគ្គរដ្ឋទូតរងរបស់ប្រទេសហ្គាបុង ប្រចាំនៅ UN បានមានប្រសាសន៍ថា៖ «ភាពច្របូកច្របល់ និងការអស់សង្ឃឹមរបស់ប្រជាជន ដោយសារសង្គ្រាមជាច្រើនខែមកនេះ វាមិនគ្រប់គ្រាន់នោះទេ ដែលគ្រាន់តែមានកិច្ចប្រជុំ ដើម្បីជូនដំណឹងដល់សហគមន៍អន្តរជាតិជាច្រើនដង ហើយមិនបានផ្តល់មធ្យោបាយជាក់លាក់ណាមួយ ក្នុងការបញ្ចប់សង្គ្រាម»។ អ្នកស្រីបញ្ជាក់បន្ថែមថា៖ «វាដល់ពេលដែលត្រូវចរចាបញ្ចប់សង្គ្រាមហើយ»។
កាលពីថ្ងៃសុក្រ ប្រទេសរុស្ស៊ីបានស្នើសុំឱ្យក្រុមប្រឹក្សាជួបប្រជុំម្តងទៀត ដើម្បីពិភាក្សាអំពីអាវុធ ដែលបានមកពីជម្លោះអ៊ុយក្រែន ដែលបានធ្លាក់ទៅក្នុងដៃក្រុមចោរ និងភេរវករ និងតំបន់ផ្សេងទៀត នៅអឺរ៉ុបមជ្ឈិមបូព៌ា និងអាហ្វ្រិក៕
វីដេអូ៖