អារ៉ាប៊ីសាអ៊ូឌីត និងចិន បានចុះហត្ថលេខាលើកិច្ចព្រមព្រៀងមួយចំនួននឹងគ្នារួមមាន កិច្ចព្រមព្រៀងលើថាមពល និងការវិនិយោគផ្ទាល់រវាងប្រទេសទាំង ២។ សមិទ្ធផលនេះ លេចចេញជារូបរាងឡើង បន្ទាប់ពីមេដឹកនាំនៃប្រទេសទាំង ២ បានជួបប្រជុំគ្នានៅទីក្រុងរីយ៉ាដ នាថ្ងៃព្រហស្បតិ៍ ទី ៨ ធ្នូ ក្នុងជំនួបកំពូលមួយដែលបង្ហាញពីទំនាក់ទំនងដ៏ស៊ីជម្រៅ និងរីកចម្រើនលើសពីប្រេងតែមួយមុខ។
រាជទាយាទអារ៉ាប៊ីសាអ៊ូឌីតព្រះអង្គម្ចាស់ ម៉ូហាមេដ បេនសាលម៉ាន និងប្រធានាធិបតីចិនលោក ស៊ី ជីនពីង បានចុះហត្ថលេខាលើកិច្ចព្រមព្រៀងខាងលើ នៅព្រះបរមរាជវាំងអារ៉ាប៊ីសាអ៊ូឌីត។ កិច្ចព្រមព្រៀងនេះ រួមបញ្ចូលទាំងពីកិច្ចព្រមព្រៀងភាពជាដៃគូយុទ្ធសាស្ត្រ និងផែនការស្រុះស្រួលគ្នាមួយរវាងចក្ខុវិស័យឆ្នាំ ២០៣០ របស់អារ៉ាប៊ីសាអ៊ូឌីត ដែលមានបំណងកាត់បន្ថយសេដ្ឋកិច្ចដែលពឹងផ្អែកខ្លាំងលើប្រេង និងគំនិតផ្តួចផ្តើមខ្សែក្រវាត់ និងផ្លូវរបស់ទីក្រុងប៉េកាំង។ អនុស្សរណៈនៃការយោគយល់គ្នានៃភាគីទាំង ២ ក៏ត្រូវបានចុះហត្ថលេខាផងដែរលើថាមពលអ៊ីដ្រូសែន ថាមពលពន្លឺព្រះអាទិត្យ ការវិនិយោគផ្ទាល់ និងលើផ្នែកលំនៅឋាន។
បើតាមទីភ្នាក់ងារសារព័ត៌មានរដ្ឋអារ៉ាប៊ីសាអ៊ូឌីត (SPA) ថ្នាក់ដឹកនាំនៃប្រទេសទាំង ២ បានពិនិត្យមើលពីទិដ្ឋភាពនៃភាពជាដៃគូ និងកិច្ចខិតខំប្រឹងប្រែងសម្របសម្រួលរួមគ្នា ហើយបានពិភាក្សាផងដែរពីឱកាសក្នុងការវិនិយោគធនធានដែលមាននៅក្នុងប្រទេសទាំង ២។
អារ៉ាប៊ីសាអ៊ូឌីត គឺជាប្រទេសនាំចេញប្រេងដ៏ធំបំផុតរបស់ពិភពលោក ហើយចិនវិញ គឺជាអតិថិជនកំពូលរបស់អារ៉ាប៊ីសាអ៊ូឌីត ដែលជាហេតុធ្វើឱ្យទំនាក់ទំនងរបស់ប្រទេសទាំង ២ មានសារៈសំខាន់ចំពោះទីផ្សារប្រេងឆៅ។ ប៉ុន្តែ ទាំងចិន និងអារ៉ាប៊ីសាអ៊ូឌីត ក៏កំពុងប្រឹងប្រែងពង្រីកបន្តិចម្តងៗ នូវល្បាយថាមពលរបស់ពួកគេ។
គួរជ្រាបថា អារ៉ាប៊ីសាអ៊ូឌីត បានទទួលស្វាគមន៍យ៉ាងកក់ក្តៅ ចំពោះវត្តមានរបស់ប្រធានាធិបតីចិនលោក ស៊ី នៅក្នុងទីក្រុងរីយ៉ាដ ក្នុងអំឡុងនៃដំណើរទស្សនកិច្ចរយៈពេល ៣ ថ្ងៃរបស់លោក។ ដំណើរទស្សនកិច្ចរបស់លោកស៊ីនេះ ធ្វើឡើងនៅជួនចំពេលដែលទំនាក់ទំនងរវាងសហរដ្ឋអាមេរិក និងអារ៉ាប៊ីសាអ៊ូឌីត ជួបភាពតានតឹងនឹងគ្នា។
កាលពី ២ ខែមុន អាមេរិកបានខឹងសម្បានឹងអារ៉ាប៊ីសាអ៊ូឌីត ដែលបានសម្រេចកាត់បន្ថយការផលិតប្រេងក្នុងចំនួនដ៏ច្រើន ដោយមិនខ្វល់ពីការទាមទាររបស់លោកប្រធានាធិបតី ចូ បៃដិន។ ខុសផ្ទុយពីអាមេរិក ចិនបែរជាបានសរសើរជំហររបស់អារ៉ាប៊ីសាអ៊ូឌីតនេះទៅវិញ៕