ក្រុម​តា​លី​បង់ បាន​ចាប់ខ្លួន​ស្ត្រី​ចំនួន ៥ នាក់​ដែល​ចូលរួម​ក្នុង​ការតវ៉ា​មួយ​នៅក្នុង​រដ្ឋធានី​កាប៊ុល​ប្រទេស​អាហ្វហ្គានីស្ថាន ដើម្បី​ប្រឆាំងនឹង​ការហាម​ប្រាម​ស្ត្រី​មិនឱ្យ​ចូលរៀន​នៅ​សាកលវិទ្យាល័យ។​ ​

សេចក្តីសម្រេច​របស់រ​ដ្ឋា​ភិ​បា​លតា​លី​បង់ ហាម​ស្ត្រី​មិនឱ្យ​ចូលរៀន​នៅ​សាកលវិទ្យាល័យ​នេះ បង្ក​ឱ្យមាន​ការតវ៉ា​ជាថ្មី​។ តាមរយៈ​វីដេអូ​នៅលើ​ប្រព័ន្ធ​ផ្សព្វផ្សាយ​សង្គម គេ​ឃើញ​ស្ត្រី​អាហ្វហ្គានីស្ថាន ជាង ២០ នាក់​ពាក់​ហ៊ីយ៉ាប​ដើរ​តាម​ដងផ្លូវ​ក្នុង​ទីក្រុង​កាប៊ុល ដោយ​លើក​បដា និង​ស្រែក​ពាក្យស្លោក​ក្នុងន័យ​ថា​៖ «​កុំ​ខ្លាច​អី យើង​នៅ​ជាមួយគ្នា​» ហើយ «​សិទ្ធិ​គឺ​សម្រាប់​អ្នក​រាល់គ្នា ឬ​គ្មាន​សម្រាប់​នរណាម្នាក់!»។​

​ប្រព័ន្ធ​ផ្សព្វផ្សាយ​ក្នុងស្រុក បាន​រាយការណ៍​ថា បាតុករ និង​អ្នកកាសែត​មួយចំនួន​ត្រូវបាន​ចាប់ខ្លួន អំឡុង​ពេល​នៃ​ការតវ៉ា​កាលពី​ថ្ងៃ​ព្រហស្បតិ៍​ម្សិលមិញ។​

​អ្នក​តវ៉ា​ម្នាក់ បានឱ្យដឹងថា​ស្ត្រី​មួយចំនួន​ត្រូវបាន​ប៉ូលិស​ចាប់ខ្លួន​។ ស្ត្រី​អ្នក​តវ៉ា​ដដែល​នេះ បាន​ប្រាប់​ទៀតថា មាន​ស្ត្រី​ពីរនាក់​ត្រូវបាន​ដោះលែង​មកវិញ ប៉ុន្តែ​អ្នកខ្លះ​ទៀត​នៅជាប់​ឃុំ​នៅឡើយ។​

​គួរ​ជ្រាបថា ការហាមឃាត់​ស្ត្រី​អា​ហ្វ​ហ្គា​នី​ស្ថាន​មិនឱ្យ​ចូលរៀន​នៅ​សាកល​វិទ្យាល័យ គឺជា​គោលនយោបាយ​ចុងក្រោយ​បង្អស់ ដែល​ដាក់​កំហិត​លើ​ការអប់រំ​របស់​ស្ត្រី ចាប់តាំងពី​ក្រុម​តាលីបង់​បាន​វិលត្រឡប់​ទៅកាន់​អំណាច​កាលពី​ឆ្នាំមុន​មក។​

​បម្រាម​ថ្មី​នេះ ត្រូវបាន​អនុវត្ត​ភ្លាមៗ ក្រោយ​ការប្រកាស​របស់​រដ្ឋមន្ត្រី​ក្រសួង​អប់រំ​ឧត្តមសិក្សា កាលពី​ថ្ងៃ​អង្គារ។ តាមរយៈ​សេចក្តីប្រកាស ទាំង​សាកលវិទ្យាល័យ​រដ្ឋ និង​ឯកជន​ត្រូវបដិសេធ​មិន​ទទួលយក​និស្សិត​ភេទ​ស្រី​ឱ្យចូល​រៀន​ឡើយ។​

​ការហាម​ប្រាម​ថ្មី​នេះ ក៏បាន​បង្កឱ្យមាន​រល​ក​នៃ​ការ​ថ្កោលទោស​ជាខ្លាំង​ពី​អង្គការ​សហប្រជាជាតិ ក្រុម​ប្រទេស​លោក​ខាងលិច និង​ពី​បណ្តា​ប្រទេស​ដែល​កាន់​សាសនា​អ៊ិស្លាម​ជាច្រើន​ផងដែរ​។ តួយ៉ាង តួកគី និង​អារ៉ាប៊ីសាអ៊ូឌីត បាន​ជំរុញ​ឱ្យ​ក្រុម​តាលីបង់​ដក​ការ​បម្រាម​នេះ​ចេញ​វិញ។

​រដ្ឋមន្ត្រីការបរទេស​តួ​ក​គី លោក Mevlut Cavusoglu បាន​និយាយថា​បម្រាម​មិនឱ្យ​ស្ត្រី​ចូលរៀន​នៅ​សាកល​វិទ្យាល័យ មិនមែនជា​ផ្នែក​មួយ​នៃ​សាសនា​អ៊ិស្លាម​ទេ ហើយ​ការធ្វើ​បែបនេះ​គឺ​គ្មាន​មនុស្សធម៌​ឡើយ៕