ក្រុមហ៊ុន Amazon បានឱ្យដឹងថាខ្លួនគ្រោងនឹងកាត់បុគ្គលិកចេញជាង ១៨ ០០០ នាក់ នៅខណៈពេលដែលទស្សនវិស័យសេដ្ឋកិច្ចពិភពលោកបន្តធ្លាក់កាន់តែធ្ងន់ធ្ងរទៅៗ។ បុគ្គលិកធ្វើការងារជាច្រើនផ្នែកនឹងរងផលប៉ះពាល់ពីចំណាត់ការនេះ រួមទាំងផ្នែកធនធានមនុស្ស និងហាងអាម៉ាហ្សូន (Amazon Stores)។ នេះបើយោងតាមអនុស្សរណៈដែលនាយកប្រតិបត្តិលោក អេនឌី ចាសស៊ី (Andy Jassy) បានចែករំលែកជាមួយបុគ្គលិក។
កាលពីខែវិច្ឆិកា លោក ចាសស៊ី ធ្លាប់បាននិយាយថា ការកាត់បន្ថយចំនួនបុគ្គលិកនៅក្រុមហ៊ុនអេឡិចត្រូនិកយក្សនឹងបន្តរហូតដល់ដើមឆ្នាំ ២០២៣។
បើតាមនាយកប្រតិបត្តិក្រុមហ៊ុន Amazon ដដែលនេះ ការកាត់បន្ថយបុគ្គលិកនឹងជួយក្រុមហ៊ុនឱ្យបន្តនូវឱកាសរយៈពេលវែងជាមួយនឹងការរៀបចំខ្ទង់ចំណាយដែលប្រសិទ្ធភាពល្អជាងមុន តែទន្ទឹមនេះ លោកបានចាត់ទុកចំណាត់ការបញ្ឈប់បុគ្គលិកនេះថា ជាការសម្រេចចិត្តដ៏លំបាកមួយ។ ក្រុមហ៊ុន Amazon នឹងចាប់ផ្តើមជូនដំណឹងដល់បុគ្គលិកដែលរងផលប៉ះពាល់ចាប់ពីថ្ងៃទី ១៨ ខែមករាខាងមុខ។
គួរជ្រាបថា អាជីវកម្មរបស់ Amazon ដំបូងឡើយបានរីកដុះដាលក្នុងអំឡុងពេលការរាតត្បាតនៃជំងឺកូវីដ ១៩ ដោយសារអ្នកប្រើប្រាស់ ពឹងផ្អែកលើការទិញទំនិញផ្សេងៗសព្វគ្រប់បែបយ៉ាងតាមអ៊ីនធឺណិត។
ទោះជាយ៉ាងណាក៏ដោយ នៅឆ្នាំនេះ ក្រុមហ៊ុនកំពុងប្រឈមមុខនឹងការវិលត្រលប់ទៅរកទម្លាប់ទិញទំនិញដោយផ្ទាល់ ក៏ដូចជាការកើនឡើងអតិផរណាដែលបានកាត់បន្ថយតម្រូវការរបស់អ្នកប្រើប្រាស់តាមអនឡាញយ៉ាងខ្លាំង។ ភាគហ៊ុនរបស់ក្រុមហ៊ុនបានធ្លាក់ចុះប្រមាណ ៥០% កាលពីឆ្នាំទៅមិញ។
ក៏ដូចជាលោក ចាសស៊ី ដែរ ស្ថាបនិក និងនាយកប្រតិបត្តិផ្នែកបច្ចេកវិទ្យាមួយចំនួនទៀត បានទទួលស្គាល់តាំងពីពេលនោះមកថា ពួកគេបានបរាជ័យក្នុងការគណនាតម្រូវការរបស់អ្នកប្រើប្រាស់ក្នុងអំឡុងនិងក្រោយពេលនៃការរីករាតត្បាតកូវីដ។
មេតាដែលជាក្រុមហ៊ុនមេរបស់ហ្វេសប៊ុក ថ្មីៗនេះបានប្រកាសកាត់បន្ថយបុគ្គលិកចំនួន ១១ ០០០ នាក់ ដែលជាចំនួនដ៏ធំបំផុតនៅក្នុងប្រវត្តិសាស្ត្ររបស់ក្រុមហ៊ុន។ ធ្វីធើរវិញ ក៏បានប្រកាសកាត់បន្ថយបុគ្គលិកយ៉ាងច្រើនផងដែរបន្ទាប់ពីលោក Elon Musk បានទិញក្រុមហ៊ុននេះក្នុងតម្លៃ ៤៤ ពាន់លានដុល្លារ។
មិនខុសគ្នាប៉ុន្មាននោះទេ នៅសប្តាហ៍នេះ Salesforce ដែលជាក្រុមហ៊ុនកម្មវិធី cloud-based របស់អាមេរិកបាននិយាយថានឹងកាត់បន្ថយបុគ្គលិករបស់ខ្លួនចំនួន ១០%៕