បន្ទាប់ពីកើតមានករណីកុមារជាង ៣០០ នាក់បានស្លាប់ ដោយសារពួកគេបានញ៉ាំស៊ីរ៉ូក្អក ដែលមានមេរោគរួចមកនោះអង្គការសុខភាពពិភពលោក WHO បានអំពាវនាវឱ្យមានការចាត់វិធានការបន្ទាន់ ដើម្បីបោសម្អាតឱសថគ្មានស្តង់ដា និងក្លែងក្លាយនៅជុំវិញពិភពលោក។
អង្គការសុខភាពពិភពលោកបាននិយាយនៅក្នុងសេចក្តីថ្លែងការណ៍មួយថា យ៉ាងហោចណាស់មានប្រទេសចំនួន៧ បានរាយការណ៍អំពីឧប្បត្តិហេតុដែលពាក់ព័ន្ធនឹងការប្រើថ្នាំក្អកដោយគ្មានវេជ្ជបញ្ជាសម្រាប់កុមារក្នុងនៅ៤ខែចុងក្រោយនេះ។
ប្រភពដដែលបន្តថា៖« ករណីកុមារស្លាប់ ជាង ៣០០ករណី ត្រូវបានកត់ត្រានៅក្នុងប្រទេសចំនួន៣រួមមាន ហ្គាំប៊ី ឥណ្ឌូនេស៊ី និងអ៊ូសបេគីស្ថាន ។ កុមារដែលស្លាប់ច្រើនបំផុតក្នុងចំណោមក្មេងដែល តូចៗក្រោមអាយុ៥ឆ្នាំ» ។
អង្គការនេះបញ្ជាក់ថាទឹកស៊ីរ៉ូក្អកដែលផលិតនៅឥណ្ឌាមានសារធាតុdiethylene glycol និង ethylene glycol កម្រិតខ្ពស់ដែលជាកម្រិតគ្រោះថ្នាក់និងមានមេរោគនៅក្នុងនោះផង។
អង្គការសុខភាពពិភពលោកបានព្រមានថា៖«សារធាតុកខ្វក់ទាំងនេះ គឺជាសារធាតុគីមីពុលដែលប្រើជាសារធាតុដែលអាចបណ្តាលឱ្យក្មេងស្លាប់សូម្បីតែផឹកវាក្នុងបរិមាណតិចតួចក៏ដោយ» ។
ទីភ្នាក់ងារសុខភាពរបស់អង្គការសហប្រជាជាតិបានចេញការជូនដំណឹងជាលើកដំបូងអំពីការស្លាប់កុមារដែលគេឃើញនៅក្នុងប្រទេស ហ្គាំប៊ីកាលពីខែតុលា។ ១ ខែបន្ទាប់មានករណីបែបនេះកើតឡើង ប្រទេសឥណ្ឌូនេស៊ី និងប្រទេសអ៊ូសបេគីស្ថាន។
របាយការណ៍ បានព្រមានឱ្យប្រើប្រាស់ស៊ីរ៉ូក្អកដែលផលិតដោយក្រុមហ៊ុនឥណ្ឌាឈ្មោះMarion Biotech និង Maiden Pharmaceuticals ព្រោះតែពាក់ព័ន្ធនឹងករណីមរណភាពរបស់កុមារ។
WHO បានអំពាវនាវដល់ប្រទេសនានាឱ្យបង្កើនកិច្ចខិតខំប្រឹងប្រែងក្នុងការស្វែងរក និងដកថ្នាំដែលមានមេរោគចេញពីទីផ្សារ ព្រមទាំងបង្កើនការឃ្លាំមើលនៅក្នុងខ្សែច ង្វាក់ផ្គត់ផ្គង់និងបញ្ចេញសញ្ញាអាសន្នជាបន្ទាន់ ប្រសិនបើប្រទេសទាំងនោះរកឃើញផលិតផលដែលមិនត្រូវស្ដង់ដាណាមួយនោះ។
ទីភ្នាក់ងារអង្គការសហប្រជាជាតិបានសង្កត់ធ្ងន់ថា«នេះមិនមែនជាឧប្បត្តិហេតុដាច់ដោយឡែកនោះទេ» ដោយជំរុញឱ្យភាគីទាំងអស់ត្រូវចាត់វិធានការជាបន្ទាន់និងមានប្រសិទ្ធភាពតាមដែលអាចធ្វើទៅបាន។
WHO និយាយថា អ្នកផ្គត់ផ្គង់ និងអ្នកចែកចាយផលិតផលវេជ្ជសាស្រ្តត្រូវពង្រឹងកិច្ចការត្រួតពិនិត្យ ដើម្បីប្រយុទ្ធប្រឆាំងឱសថក្លែងក្លាយនិងត្រូវអនុញ្ញាតឱ្យលក់តែឱសថណាដែលមានអាជ្ញាប័ណ្ណប៉ុណ្ណោះ៕
