![](https://pppkhmer.sgp1.digitaloceanspaces.com/image/main/field/image/np_file_147353.jpg)
គ្រូពេទ្យធ្វើតេស្ដស្វែងរកមេរោគកូវីដ ១៩ នៅប្រទេសចិន នាពេលកន្លងទៅ។ រូបថត AFP
អង្គការសុខភាពពិភពលោក (WHO) លើកឡើងថា ជំងឺកូវីដ ១៩ នៅតែជាគ្រាអាសន្នខាងសុខភាពសាធារណៈ សកល ប៉ុន្តែការរីករាលដាល បានឈានដល់ចំណុចរបត់ហើយ ដែលពិភពលោក គួរតែត្រៀមវិធានការទប់ទល់។
ទីភ្នាក់ងារសារព័ត៌មានបរទេស បានរាយការណ៍ គណៈកម្មាធិការសង្គ្រោះបន្ទាន់ស្តីពី បទប្បញ្ញត្តិសុខភាពអន្តរជាតិ (International Health Regulations Emergency Committee) របស់អង្គការសហប្រជាជាតិ ធ្វើការពិភាក្សាគ្នាអំពីការផ្ទុះឡើងនៃវីរុសកូវីដ នៅថ្ងៃសុក្រ ទី ២៧ ខែមករា ឆ្នាំ២០២៣ ហើយបានព្រមព្រៀងគ្នាថា ស្ថានភាពមេរោគមរណៈនេះ គួរតែត្រូវបានរក្សាទុកជាគ្រាអាសន្នផ្នែកសុខភាពសាធារណៈសកល (PHEIC) តទៅទៀត។
ប៉ុន្តែយោងតាមសេចក្តីថ្លែងការណ៍ ដែលបានចេញផ្សាយកាលពីថ្ងៃចន្ទ ទី ៣០ ខែមករា គណៈកម្មាធិការប្រឹក្សារបស់ WHO បានឱ្យដឹងថា ពួកគេបានជំរុញឱ្យ WHO ស្នើយន្ត ការជ្រើសរើសផ្សេងទៀត ដើម្បីឱ្យពិភពលោក និងប្រទេសនានា បន្តយកចិត្តទុកដាក់លើជំងឺកូវីដ ១៩ បន្ទាប់ពី PHEIC ត្រូវបានលុបចោល។
គណៈកម្មាធិការបានលើកឡើងថា៖ «ការធ្វើឱ្យមនុស្សជុំវិញពិភពលោកមានកម្រិតភាពស៊ាំខ្ពស់ ទាំងពីការឆ្លង និង/ឬការចាក់វ៉ាក់សាំង អាចទប់ស្កាត់ផលប៉ះពាល់របស់វីរុស SARSCoV2 ទាំងផ្នែកនៃការធ្លាក់ខ្លួនឈឺ និងការស្លាប់ ប៉ុន្តែស្ទើរតែគ្មានការងឿងឆ្ងល់ទេថា វីរុសនេះ នឹងនៅតែជាធាតុបង្កជំងឺអចិន្រៃ្តយ៍៍នៅ ក្នុងខ្លួនមនុស្ស និងសត្វ នាពេលអនាគតដ៏ខ្លីខាងមុខ ដូច្នេះវិធានការសុខភាពសាធារណៈរយៈពេលវែង គឺជារឿងចាំបាច់ណាស់»។
គណៈកម្មាធិការបានបន្ថែមថា៖ «ក្នុងខណៈពេលដែលការលុបបំបាត់វីរុសប្រភេទនេះពីខ្លួនមនុស្ស និងសត្វ ទំនងជាមិនអាចធ្វើទៅបាន ការកាត់បន្ថយផលប៉ះពាល់ធ្ងន់ធ្ងរនៃការមានជំងឺ និងការស្លាប់ ជាអ្វីដែលអាចធ្វើបាន ហើយគួរតែជាអាទិភាព នាពេលបន្ទាប់»។
ប្រធាន WHO លោក Tedros Adhanom Ghebre yesus បានណែនាំប្រទេស នានា ឱ្យបន្តចាក់វ៉ាក់សាំងដល់ប្រជាជនរបស់ខ្លួនតទៅទៀត និងរួមបញ្ចូលការចាក់វ៉ាក់សាំងកូវីដ ទៅក្នុងការថែទាំសុខភាពជាប្រចាំ ធ្វើឱ្យកាន់តែប្រសើរឡើង ចំពោះការគ្រប់គ្រងថែរក្សាជំងឺ រក្សាប្រព័ន្ធសុខភាពសាធារណៈឱ្យកាន់តែរឹងមាំ ដើម្បីកុំឱ្យកើតការភ័យស្លន់ស្លោដដែលឡើងវិញ នៅពេលដែលចំនួននៃការឆ្លងកើនឡើង និងមានការធ្វេសប្រហែស នៅពេលដែលករណីឆ្លងថយចុះ ប្រឹងប្រែងប្រយុទ្ធនឹងការរីករាលដាលនៃព័ត៌មានក្លែងក្លាយ និងកែសម្រួលវិធានការធ្វើដំណើរអន្តរជាតិទៅតាមកម្រិតនៃហានិភ័យ៕