ជប៉ុននិងណាតូសន្យាថា នឹងឆ្លើយតបយ៉ាងតឹងរ៉ឹងចំពោះការគំរាមកំហែងរបស់ចិន និងរុស្ស៊ី។ ថ្ងៃទី ៣១ ខែមករា ឆ្នាំ ២០២៣ លោក Jens Stoltenberg អគ្គលេខាធិការអង្គការណាតូបានថ្លែងថា ប្រទេសជប៉ុននិងអង្គការសន្ធិសញ្ញា អាត្លង់ទិកខាងជើង ឬហៅកាត់ថា អង្គការណាតូ ត្រូវតែរក្សាការរួបរួមគ្នាយ៉ាងរឹងមាំក្នុងការប្រឈមមុខនឹងការគំរាមកំហែងផ្នែកសន្តិសុខបង្កឡើងដោយប្រទេសចិន កូរ៉េខាងជើង និងសង្គ្រាមរុស្ស៊ីនៅអ៊ុយក្រែន។
អគ្គលេខាធិការនៃសម្ព័ន្ធភាពយោធាអឺរ៉ុប និងសហរដ្ឋអាមេរិករូបនេះ បានព្រមានថា ទីក្រុងប៉េកាំងកំពុងតាម ដានយ៉ាងដិតដល់ទៅលើការវិវឌ្ឍស្ថានការណ៍នៅអ៊ុយក្រែន និងរៀនសូត្រពីបរិបទប្រែប្រួលក្នុងសង្គ្រាមមួយនេះ ដើម្បីរៀនសូត្រ និងជាការត្រៀមក្នុងការសម្រេចចិត្តនាពេលអនាគតរបស់ខ្លួនឱ្យបានត្រឹមត្រូវ។គួរបញ្ជាក់ថា ការថ្លែងបែបនេះ បានធ្វើឡើងអំឡុងពេលលោកមានជំនួបពិភាក្សាគ្នាជាមួយនាយករដ្ឋមន្រ្តីជប៉ុនលោកហ្វូមីអូ គីស៊ីដា (Fumio Kishida) ក្នុងដំណើរទស្សនកិច្ចទៅកាន់តំបន់អាស៊ីក្នុងគោលបំណងជំរុញ និងរឹតចំណងទំនាក់ទំនងជាមួយសម្ព័ន្ធមិត្តប្រជាធិបតេយ្យបន្ថែមទៀត។
លោកបានមានប្រសាសន៍ថា «អ្វីដែលកំពុងកើតឡើងនៅអឺរ៉ុបថ្ងៃនេះក៏អាចនឹងកើតឡើងនៅអាស៊ីបូព៌ានៅថ្ងៃស្អែក។ដូច្នេះយើងត្រូវរក្សាការរួបរួមគ្នាជាធ្លុងមួយដ៏រឹងមាំដោយឈរជាមួយគ្នាដើម្បីសេរីភាពនិងលទ្ធិប្រជាធិប តេយ្យ»។អគ្គលេខាធិការ និងនាយករដ្ឋមន្ត្រីជប៉ុន ក៏បានលើកឡើងអំពីការព្រួយបារម្ភដោយសារការកើនឡើងនៃកិច្ចសហប្រតិបត្តិការរវាងចិននិងរុស្ស៊ីកាន់តែបន្តវិវឌ្ឍន៍ ទៅមុខជាដរាប។មេដឹកនាំទាំង ២នេះបាននិយាយនៅក្នុងសេចក្តីថ្លែងការណ៍រួមថា៖«យើងចង់គូសបញ្ជាក់ឱ្យឃើញពីការព្រួយបារម្ភអំពីកិច្ចសហប្រតិបត្តិការយោធាដែលកំពុងកើនឡើងយ៉ាងខ្លាំង រវាងប្រទេសរុស្ស៊ីជាមួយប្រទេសចិនដូចជាការប្រតិបត្តិការរួមគ្នាក៏ដូចជាសមយុទ្ធយោធារួមគ្នានៅក្នុងតំបន់ជុំវិញប្រទេសជប៉ុន»។
គួររំឭកថា កាលពីប៉ុន្មានថ្ងៃមុនដែលលោក Stoltenberg ដែលកំពុងស្ថិតនៅទីក្រុងសេអ៊ូល ប្រទេសកូរ៉េខាងត្បូងបានស្នើឱ្យកូរ៉េខាងត្បូងបង្កើនការគាំទ្រផ្នែកយោធាដល់ប្រទេសអ៊ុយក្រែនដែលត្រូវបានឈ្លានពានដោយប្រទេសរុស្ស៊ីចាប់តាំងពីដើមឆ្នាំ២០២២មក។ដោយឡែក សម្រាប់ថ្ងៃអង្គារនេះដែលលោក កំពុងធ្វើទស្សនកិច្ចនៅក្នុងប្រទេសជប៉ុនវិញលោកបានសរសើរនូវគោលជំហរដ៏រឹងមាំនិងការគាំទ្រផ្នែកផ្សេងៗជាច្រើនដែលជប៉ុនបានផ្តល់ជូនដល់អ៊ុយក្រែន។
គួរដឹងដែរថា រដ្ឋាភិបាលទីក្រុងតូក្យូបានដាក់ទណ្ឌកម្មទៅលើរុស្ស៊ីដោយចូលរួមជាមួយនឹងដៃគូក្នុងក្របខ័ណ្ឌប្រទេសអភិវឌ្ឍន៍ទាំង ៧ ឬហៅកាត់ថា G7 ហើយក៏បានចាត់វិធានការបញ្ជូនឧបករណ៍ការពារក្នុងសង្គ្រាមជាច្រើន និងផ្តល់កន្លែងជ្រកកោនដល់អ្នកដែលបានភៀសខ្លួនចេញពីជម្លោះនៅក្នុងប្រទេសអ៊ុយក្រែន។
បន្ថែមលើនេះ លោក Stoltenberg បានលើកឡើងថា លោកនិងលោក គីស៊ីដា បានចែករំលែកអំពីក្តីបារម្ភចំពោះអាកប្បកិរិយាដ៏គឃ្លើនរបស់កូរ៉េខាងជើងរាប់ចាប់តាំងពីសកម្មភាពនុយក្លេអ៊ែររហូតដល់ការសាកល្បងមីស៊ីលផ្លោង។ មិនត្រឹមតែប៉ុណ្ណោះ លោកបានឱ្យដឹងថា ប្រទេសចិន មិនមែនជាសត្រូវទេប៉ុន្តែលោកបានព្រមានអំពីការកើនឡើងនូវវត្តមានយោធាចិននៅក្នុងតំបន់អាស៊ីរួមទាំងវត្តមានអាវុធនុយក្លេអ៊ែរការធ្វើទុក្ខបុកម្នេញទៅលើប្រទេសជិតខាងរបស់ខ្លួនដោយការគំរាមកំហែងកោះតៃវ៉ាន់ក៏ដូចជាការផ្សព្វផ្សាយព័ត៌មានមិនពិតអំពីអង្គការណាតូ និងប្រទេសអ៊ុយក្រែន។
រីឯលោកនាយករដ្ឋមន្ត្រី គីស៊ីដា វិញបានលើកឡើងថាប្រទេសជប៉ុននឹងបង្កើតការិយាល័យតំណាងឯករាជ្យមួយសម្រាប់ការសហការដោះស្រាយជាមួយអង្គការណាតូដែលជាផ្នែកនៃកិច្ចខិតខំប្រឹងប្រែងដើម្បីធ្វើឱ្យទំនាក់ទំនងរវាងភាគីទាំង២ កាន់តែស៊ីជម្រៅបន្ថែមទៀត។ លោកបានបន្ថែមថាជប៉ុនក៏នឹងពិចារណាផងដែរអំពីការចូលរួមឱ្យបានទៀងទាត់នៅក្នុងកិច្ចប្រជុំកម្រិតខ្ពស់ដែលរៀបចំឡើងដោយអង្គការសម្ព័ន្ធភាពមួយនេះ។
គួររំឭក ផងដែរថា កាលពីខែធ្នូ ឆ្នាំ ២០២២ ប្រទេសជប៉ុន បានប្រកាសពីការកើនឡើងអស្ថិរភាពក្នុងតំបន់ ដែលនាំទៅរកការផ្លាស់ប្ដូរគោលនយោបាយក្នុងយុទ្ធសាស្ត្រការពារជាតិនិងសន្តិសុខរបស់ខ្លួន ដើម្បីត្រៀមជាស្រេចក្នុងរយៈពេលជាច្រើនទសវត្សរ៍ទៅខាងមុខទៀត។យុទ្ធសាស្ត្រការពារជាតិថ្មីនោះគឺផែនការបង្កើនការចំណាយថវិកាលើវិស័យការពារជាតិរហូតដល់ទៅ ២ ភាគរយនៃផលិតផលក្នុងស្រុកសរុប រហូតដល់ឆ្នាំ ២០២៧ ដែលការធ្វើបែបនេះ ជំរុញឱ្យប្រទេសជប៉ុនហាក់កំពុងដើរស្របតាមគោលការណ៍ណែនាំរបស់សមាជិកអង្គការណាតូ៕
