បាតុករ និងប៉ូលីសក្រិក ពេលប៉ះទង្គិចដោយហឹង្សាបណ្តាលឱ្យមានអ្នកស្លាប់ កាលពីថ្ងៃទី ៥ ខែមីនា ២០២៣។ AFP
បាតុករ និងប៉ូលិសក្រិក ប៉ះទង្គិចគ្នានៅបាតុកម្មមួយទាក់ទងនឹងរឿងរថភ្លើងបុកគ្នា។ មនុស្សម្នារាប់ពាន់នាក់ បានចុះតវ៉ាតាមដងផ្លូវ កាលពីថ្ងៃអាទិត្យ ដោយអ្នកខ្លះបានគប់ដបសាំង និងដុតធុងសំរាមជាច្រើនដាក់ប៉ូលិសខណៈដែលក្រុមប៉ូលិសក្រិកបានបាញ់ឧស្ម័នបង្ហូរទឹកភ្នែក និងគប់គ្រាប់បែកបំផ្ទុះឧស្ម័ន ដើម្បីបំបែកបាតុករ។
មនុស្សជាង ១២ ០០០ នាក់ បានប្រមូលផ្តុំគ្នាឈរតវ៉ានៅពីមុខសភាប្រទេសក្រិក ដើម្បីទាមទាររដ្ឋអំណាចទទួលខុសត្រូវចំពោះ ឧបទ្ទវហេតុរថភ្លើង២បានបុកគ្នា បណ្ដាលឱ្យមនុស្សជិត ៦០ នាក់ស្លាប់ កាលពីសប្ដាហ៍មុន។ ពួកគេទាំងនោះបាននាំគ្នាស្រែកព្រមៗគ្នាថា៖«ឧក្រិដ្ឋកម្មនេះមិនត្រូវបានគេបំភ្លេចឡើយ»។
ក្រុមអ្នកតវ៉ាអះអាងថា គ្រោះមហន្តរាយរថភ្លើងបុកគ្នា បណ្ដាលមកពីកង្វះស្លាកសញ្ញាត្រឹមត្រូវ សម្រាប់បញ្ជាចរាចរណ៍ផ្លូវដែក និង ភាពអន់ថយនៃប្រតិបត្តិការជួយសង្គ្រោះជនរងគ្រោះបន្ទាប់ពីឧបទ្ទវហេតុនេះ។
នាយករដ្ឋមន្ត្រីប្រទេសក្រិក លោក Kyriakos Mitsotakis បានបង្ហោះសារនៅលើហ្វេសប៊ុកកាលពីថ្ងៃអាទិត្យនេះថា៖ «ក្នុងនាមខ្ញុំជានាយករដ្ឋមន្ត្រី ខ្ញុំជំពាក់អ្នករាល់គ្នា ប៉ុន្តែសម្រាប់ក្រុមគ្រួសារដែលបាត់បង់សាច់ញាតិ ខ្ញុំសុំទោស។ ការស៊ើបអង្កេតកំពុងបន្តដើម្បីស្វែងរកយុត្តធម៌សម្រាប់អ្នកទាំងអស់គ្នា»។
លោកបានបន្ថែមទៀតថា ប្រទេសក្រិកស្នើសុំជំនួយពីសហភាពអឺរ៉ុបក្នុងការកែលម្អស្ថានភាពផ្លូវដែកសារជាថ្មីក្នុងពេលឆាប់ៗនេះ៕
