.jpg)
អ្នកស្រី Traisulee Taisaranakul អ្នកនាំពាក្យរដ្ឋាភិបាលថៃ។ ហ្វេសប៊ុក
កាសែតដឹណេសិនថៃផ្សាយថា មនុស្សជិត ៣ ពាន់នាក់ស្នើសុំទិដ្ឋាការរយៈពេលវែង បន្ទាប់ពីថៃដាក់ដំណើរការទិដ្ឋាការប្រភេទនេះបានរយៈពេល ៤ ខែ។ នេះបើតាមប្រសាសន៍របស់អ្នកស្រី Traisulee Taisaranakulអ្នកនាំពាក្យរដ្ឋាភិបាលថៃ។
អ្នកស្រី Traisulee Taisaranakul មានប្រសាសន៍ប្រាប់អ្នកកាសែតថា គិតត្រឹមខែមិនា ឆ្នាំ ២០២៣ មានជនបរទេសជាអ្នកមានទ្រព្យសម្បត្តិ និងជាអ្នកជំនាញជិត ៣ ០០០ នាក់ បានដាក់ពាក្យសុំទិដ្ឋាការស្នាក់នៅរយៈពេលវែង (LTR) ថ្មីរបស់ប្រទេសថៃក្នុងរយៈពេល ៤ ខែដំបូង។
ទិដ្ឋាការប្រភេទវែងមានរយៈពេល១០ឆ្នាំត្រូវបានថៃប្រកាសកាលពីថ្ងៃទី ១ ខែវិច្ឆិកាឆ្នាំ ២០២២ ដើម្បីទាក់ទាញក្រុមហ៊ុន ឬមនុស្សមានទេពកោសល្យ និងពហុជាតិសាសន៍បរទេសមកកាន់ប្រទេសថៃ។
អ្នកស្រីTraisulee លើកឡើងថាជនបរទេសសរុបចំនួន ២៩២០នាក់បានដាក់ពាក្យសុំទិដ្ឋាការ LTR ពីក្រុមប្រឹក្សាវិនិយោគ (BOI) ចន្លោះពីថ្ងៃទី១ ខែវិច្ឆិកាដល់ថ្ងៃទី២៨ខែកុម្ភៈឆ្នាំនេះ។
អ្នកស្រីបញ្ជាក់ថា ក្នុងចំណោមអ្នកដែលបានដាក់ពាក្យមាន ១៩៥នាក់ ជាអ្នកមានទ្រព្យសម្បត្តិស្កុកស្ដម មនុស្ស ចំនួន ១០១១នាក់ ជានិវត្តន៍ជន មនុស្សចំនួន៧៧១នាក់ជាអ្នកចង់ទៅធ្វើការនៅប្រទេសថៃ មនុស្សចំនួន៣៩០នាក់ ជាបុគ្គលដែលមានជំនាញ និង ៥៥៣នាក់ ជាអ្នករស់នៅក្នុងបន្ទុក។
អ្នកស្រីបន្ថែមថា អ្នកសុំទិដ្ឋាការច្រើនជាងគេអ្នកមកពីអឺរ៉ុបចំនួន៩៤០នាក់ តាមពីក្រោយដោយអ្នកមកសហរដ្ឋអាមេរិក៥១៧នាក់ និងអ្នកមកពីប្រទេសចិន៣២៥នាក់ ក្រៅពីនេះមានមនុស្សមកពីប្រទេសផ្សេងៗទៀត។
អ្នកស្រីបញ្ជាក់ថា៖« ការផ្តល់ទិដ្ឋាការ ប្រភេទនេះ ដើម្បីទាក់ទាញបុគ្គលបរទេសដែលមានជំនាញ និងពហុជាតិសាសន៍ មកប្រទេសថៃ គឺជាការជំរុញសក្តានុពលនៃកម្លាំងពលកម្មថៃ។ អ្នកទាំងនោះនឹងជួយបង្កើនសមត្ថភាពប្រកួតប្រជែងរបស់ប្រទេសថៃ។ជនបរទេសដែលមានទេពកោសល្យ និងក្រុមហ៊ុនពហុជាតិសាសន៍អាចផ្តល់ចំណេះដឹង និងការច្នៃប្រឌិតសម្រាប់ជនជាតិថៃដែលធ្វើការជាមួយពួកគេ»។
លោកស្រីបានបន្ថែមថា ប្រទេសជាច្រើនបានឃើញសក្តានុពលរបស់ប្រទេសថៃ ក្នុងអំឡុងកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅទីក្រុងបាងកកកាលពីខែវិច្ឆិកាឆ្នាំមុន។
អ្នកស្រីTraisulee បាននិយាយថា ក្រុមប្រឹក្សាវិនិយោគថៃ បានប្រគល់សិទ្ធិទៅឱ្យក្រុមហ៊ុនពហុជាតិ ជាង ៥០០ដើម្បីបង្កើតទីតាំងស្នាក់ការតំបន់របស់ពួកគេ ក្នុងប្រទេសថៃ។
លោកស្រីបន្តថា ក្រុមហ៊ុនចម្រុះជាតិសាសន៍ទាំង៥ ដែលបង្កើតទីស្នាក់ការកណ្តាលក្នុងប្រទេសថៃ រួមមានក្រុមហ៊ុនមកពីប្រទេសជប៉ុន សហរដ្ឋអាមេរិក សិង្ហបុរី ហុងកុង និងប្រទេសបារាំង។ក្នុងនោះមានក្រុមហ៊ុនល្បីៗដូចជា Agoda, Huawei Technologies, Arcelik Hitachi, Ajinomoto, Nissin Foods, Alstom, Toyota Motor និង Nippon Steel៕
