.jpg)
សមយុទ្ធបាញ់មីស៊ីលចេញពីនាវាមុជទឹក ត្រូវបានកូរ៉េខាងជើងធ្វើឡើង នៅឈូងសមុទ្រ Gyeongpo កាលពីថ្ងៃទី១២ ខែមីនា ឆ្នាំ២០២៣។ AFP
នៅព្រឹកថ្ងៃចន្ទទីភ្នាក់ងារព័ត៌មានរដ្ឋកូរ៉េខាងជើង KCNA បានផ្សាយថា ប្រទេសកូរ៉េខាងជើង សាកល្បងកាំជ្រួចបាញ់ចេញពីនាវាមុជទឹកចំនួន ២ គ្រាប់ កាលពីថ្ងៃទី ១២ ខែមីនា ដើម្បីបង្ហាញការឆ្លើយតបចំពោះសមយុទ្ធយោធារវាងសហរដ្ឋអាមេរិក និងកូរ៉េខាងត្បូង។
ក្រុមអ្នកឃ្លាំមើលកត់សម្គាល់ពាក្យ«យុទ្ធសាស្ត្រ» ដែលសារព័ត៌មានរដ្ឋកុម្មុយនីស្តមួយនេះប្រើជាធម្មតាដើម្បីពិពណ៌នាអំពីអាវុធពាក់ព័ន្ធនឹងថាមពលនុយក្លេអ៊ែរ។ សារព័ត៌មាន KCNA បាននិយាយថា ការបាញ់សាកល្បងកាំជ្រូចនេះជោគជ័យដូចការរំពឹងទុក។
អគ្គសេនាធិការចម្រុះកងទ័ពកូរ៉េខាងត្បូង បាននិយាយថា យោធាខ្លួនប្រុងប្រយ័ត្នខ្ពស់ ហើយទីភ្នាក់ងារស៊ើបការណ៍សម្ងាត់របស់ប្រទេសនេះ កំពុងធ្វើការជាមួយសមភាគីអាមេរិក ដើម្បីវិភាគពីភាពជាក់លាក់នៃការបាញ់កាំជ្រូចរបស់កូរ៉េខាងជើងលើកនេះ។
កងទ័ពកូរ៉េខាងត្បូង និងអាមេរិកនៅថ្ងៃចន្ទទី១៣ មីនា នឹងចាប់ផ្តើមសមយុទ្ធរួមគ្នារយៈពេល ១១ថ្ងៃ ដែលមានឈ្មោះហៅថា Freedom Shield 23។
KCNA បាននិយាយថា ការបាញ់កាំជ្រូចពីនាវាមុជទឹកនេះ ធ្វើឡើង ក្នុងគោលបំណងបង្ហាញពីការប្តេជ្ញាចិត្តរបស់កូរ៉េខាងជើងក្នុងការគ្រប់គ្រងស្ថានការណ៍មួយ ដែល KCNA បាននិយាយថា «ចក្រពត្តិនិយមអាមេរិក និងកងកម្លាំងអាយ៉ងកូរ៉េខាងត្បូងកំពុងធ្វើសមយុទ្ធត្រៀមឈ្លានពានកូរ៉េខាងជើង»។
KCNA បាននិយាយថា កាំជ្រួចនេះ បានបាញ់ចេញពីនាវាមុជទឹក "8.24 Yongung" នៅក្នុងទឹកនៅឆ្នេរសមុទ្រភាគខាងកើតនៃឧបទ្វីបកូរ៉េនៅព្រឹកព្រលឹមថ្ងៃអាទិត្យ។ របាយការណ៍របស់ KCNA បាននិយាយថា កាំជ្រួចបានធ្វើដំណើរចម្ងាយប្រហែល ១ ៥០០ គីឡូម៉ែត្រ មុនពេលវាយប្រហារគោលដៅមួយនៅក្នុងសមុទ្រ។
សារព័ត៌មានAPរាយការណ៍ថា កាលពីថ្ងៃព្រហស្បតិ៍សប្តាហ៍មុន លោក គីម ជុងអ៊ុន បានអង្កេតដោយផ្ទាល់លើសមយុទ្ធបាញ់គ្រាប់ពិតដែលក្លែងធ្វើការវាយប្រហារលើអាកាសយានដ្ឋានកូរ៉េខាងត្បូង។ លោកថែមទាំង បានបញ្ជាឱ្យយោធារបស់គាត់រក្សាសមត្ថភាព «ឆ្លើយតបយ៉ាងលើសលប់»ចំពោះសកម្មភាពរបស់សត្រូវទៀតផង៕
វីដេអូ៖
