ប្រជាជនដើរនៅជិតផ្លូវដែលបាក់បណ្ដាលមកពីទឹកជំនន់ដោយសារភ្លៀងធ្លាក់ខ្លាំង បន្ទាប់ពីព្យុះស៊ីក្លូន Freddy នៅក្នុងក្រុង Blantyre នៃប្រទេសម៉ាឡាវី កាលពីថ្ងៃទី ១៣ ខែមីនា ឆ្នាំ ២០២៣។AFP
ប្រទេសម៉ូសំប៊ិក និងម៉ាឡាវីកំពុងទទួលរងគ្រោះដោយព្យុះត្រូពិក Freddy ជាលើកទី២ ដែលបណ្តាលឱ្យមនុស្សជាង ១០០ នាក់បានបាត់បង់ជីវិត និងរាប់រយនាក់ផ្សេងទៀតរងរបួស កាលពីថ្ងៃចន្ទកន្លងទៅនេះ ចាប់តាំងពីចុងសប្តាហ៏មុនមក។
ព្យុះត្រូពិក Freddy ត្រូវបានគេស្គាល់ថា ជាព្យុះដ៏ធំមួយក្នុងចំណោមព្យុះធំៗទាំងអស់ដែលមិនធ្លាប់មាន នៅអឌ្ឍគោលខាងត្បូង ហើយវាក៏អាចក្លាយទៅជាព្យុះស៊ីក្លូនត្រូពិចផងដែរ។ នេះបើយោងទៅតាមអង្គការឧតុនិយមពិភពលោក។
ព្យុះ Freddy បានវាយលុកប្រទេស Mozambique កាលពីថ្ងៃសៅរ៏ដោយបានបំផ្លិចបំផ្លាញហេដ្ឋារចនាសម្ព័ន្ធ និងបង្កជាទឹកជំនន់ជនលិចយ៉ាងសន្ឋោសន្ឋៅនៅជុំវិញកំពង់ផែ Quelimane និងបានសម្លាប់មនុស្សអស់១០នាក់មុននិងធ្វើដំណើរទៅកាន់ប្រទេសម៉ាឡាវី អមជាមួយនឹងភ្លៀងធ្លាក់យ៉ាងខ្លាំង។
លោក Charies Kalemba នាយកនៃនាយកដ្ឋានគ្រប់គ្រងគ្រោះមហន្តរាយបាននិយាយកាលពីថ្ងៃចន្ទថា ព្យុះនេះបានសម្លាប់មនុស្សអស់ ៩៩ នាក់នៅក្នុងប្រទេសម៉ាឡាវី ដែលក្នុងនោះ ៨៥ នាក់ស្ថិតនៅក្នុងមជ្ឈមណ្ឌលពាណិជ្ជកម្មនៅទីក្រុង Blantyre អំឡុងពេលដែលព្យុះកំពុងបក់បោក។
ទន្ទឹមនឹងនោះដែរលោកស្រី Marion Pechayre នាយកប្រចាំប្រទេសនៃគ្រូពេទ្យគ្មានព្រំដែនបានប្រាប់សារព័ត៌មានរ៉យទ័រតាមទូរស័ព្ទថា សាកសពយ៉ាងហោចណាស់ ៦០ នាក់និងអ្នករងរបួស ២០០ នាក់ទៀតបានដឹកមកកាន់មន្ទីរពេទ្យកណ្តាលទីក្រុង Blantyreនាពេលរសៀល។ អ្នកស្រីបានបន្ថែមទៀតថា អ្នករងរបួសទាំងអស់គ្រោះថ្នាក់បណ្តាលមកពីការបាក់ដើមឈើ បាក់ដី និងទឹកជំនន់ និងរលំផ្ទះ។
លោក Peter Kalaya អ្នកនាំពាក្យប៉ូលិសក៏បានប្រាប់រ៉យទ័រផងដែរថា ក្រុមជួយសង្គ្រោះកំពុងស្វះស្វែងរក មនុស្សនៅក្នុងទីក្រុង២ ទៀត គឺទីក្រុងChilobweនិងNdirande នៃប្រទេសម៉ាឡាវីដោយសារទីក្រុងនេះបានទទួលរងឥទ្ធិពលភ្លៀងធ្លាក់ខ្លាំងជាងគេកាលពីថ្ងៃចន្ទនេះ។
លោកបានបន្តថាមិនតែប៉ុណ្ណោះក្រុមហ៊ុនអគ្គិសនីរបស់ប្រទេសម៉ាឡាវីEgencoត្រូវបានផ្អាកការផ្តល់ថាមពលផងដែរដើម្បីការពារវារីអគ្គីសនីសំខាន់ៗរបស់ខ្លួនពីខ្យល់ព្យុះ។
ចំណែកលោក Guy Taylorប្រធានផ្នែកតស៊ូមតិទំនាក់ទំនងនិងភាពជាដៃគូជាសម្រាប់អង្គការ Unicef បានប្រាប់សារព័ត៌មានរ៉យទ័រថា៖«យើងបានសង្កេតឃើញអគារនិងគ្លីនិកជាច្រើនត្រូវបានបំផ្លាញ ផ្ទះប្រជាជនដួលរលំដោយសារខ្យល់កន្ត្រាក់ទឹកជំនន់ជនលិចមុននិងខ្យល់ព្យុះបានមកដល់ ហើយវាបានបង្កើតហានិភ័យជាច្រើនដល់ដំណាំនិងបង្កើតជំងឺឆ្លងតាមទឹក»។
សូមបញ្ជាក់ផងដែរថា ប្រទេសម៉ូសំប៊ិក ប្រទះឃើញបរិមាណទឹកភ្លៀងច្រើនជាងឆ្នាំមុនៗ ក្នុងរយៈពេល ៤សប្តាហ៏កន្លងមកនេះ ស្របពេលដែលប្រទេសម៉ាឡាវីកំពុងប្រយុទ្ធប្រឆាំងនឹងជំងឺអាសន្នរោគ(Chorela)ដ៏សាហាវបំផុតក្នុងប្រវត្តិសាស្ត្រខ្លួនដោយទីភ្នាក់ងារអង្គការសហប្រជាជាតិបានព្រមានថា ស្ថានភាពនេះនឹងអាក្រក់ៗទៅ៕
