អតីតនាយករដ្ឋមន្ត្រីប៉ាគីស្ថាន លោក Imran Khan ថ្លែងក្នុងបទសម្ភាសន៍ជាមួយសារព័ត៌មាន AFP នៅ និវេសនដ្ឋានរបស់លោកក្នុងទីក្រុង Lahore កាលពីថ្ងៃទី១៥ ខែមីនា ឆ្នាំ ២០២៣។ AFP
តុលាការប្រទេសប៉ាគីស្ថាន បានចេញបញ្ជាឱ្យតាមចាប់ខ្លួនអតីតនាយករដ្ឋមន្រ្តីលោក Imran Khan កាលពីថ្ងៃអង្គារកន្លងទៅនេះ ប៉ុន្តែត្រូវបានផ្អាកបន្ទាប់ពីក្រុមបាតុករគាំទ្រលោកបានបង្កអំពើហិង្សាប៉ះពាល់ដល់សុវត្ថិភាពរបស់សមត្ថកិច្ច។
យោងតាមរដ្ឋមន្រ្តីក្រសួងព័ត៌មាន លោក Amir Mir បានប្រាប់ទៅកាន់សារព័ត៌មានរ៉យទ័រថា កិច្ចខិតខំប្រឹងប្រែងរបស់ប៉ូលិ សត្រូវបានពន្យារពេលកាលពីថ្ងៃពុធ បន្ទាប់ពីផ្ទុះការប៉ះទង្គិចជាមួយនឹងក្រុមអ្នកគាំទ្រនៅជុំវិញលំនៅឋានរបស់លោក Khan នៅពេលដែលលោក បានសុំឱ្យពួកគេជួយការពារគាត់ពីប្រតិបត្តិការចាប់ខ្លួននេះ។
លោក Khan ត្រូវបានគេចោទប្រកាន់ថាជាអ្នកលក់អំណោយរបស់រដ្ឋដោយខុសច្បាប់ក្នុងអំឡុងពេលកាន់តំណែងរបស់ខ្លួន ក្នុងចន្លោះឆ្នាំ២០១៨ ដល់២០២២ប៉ុន្តែត្រូវបានបដិសេធ ដោយលោកអះអាងថា លោកមិនធ្វើនោះទេ។
ការប៉ះទង្គិចគ្នានេះបានបណ្តាលឱ្យប៉ូលិសជាង ៦០ នាក់ និងបាតុករ៨នាក់ រងរបួស ចំណែកបាតុករ១៥នាក់ទៀតត្រូវបានចាប់ខ្លួន។ ក្រុមប៉ូលិសបានចោទប្រកាន់ពួកអ្នកគាំទ្រលោក Khanដោយប្រើប្រាស់គ្រាប់បែកសាំង ម៉ាស៊ីនបំប្លែង និងដុតរថយន្ត ដើម្បីប្រឆាំងទៅនឹងពួកគេ។ជាមួយគ្នានោះដែរ លោក Khan បានពណ៌នាសកម្មភាពនេះថាជាភាពអនាធិបតេយ្យ ដោយលើកឡើងថា ខ្លួនមិនមានការគ្រប់គ្រងទៅលើពួកបាតុករទេ។
លោកបាននិយាយថា៖«ពួកនៅខាងក្រៅមិនស្តាប់ខ្ញុំទេ នៅពេលដែលភាពអនាធិបតេយ្យនិងការបាញ់ផ្លោងនេះកើតឡើង ពួកគេលែងស្តាប់ខ្ញុំហើយ ខ្ញុំអត់មានការគ្រប់គ្រងទៅលើពួកគេនោះទេ»។ ក្រៅពីនេះអតីតរដ្ឋមន្ត្រីក្រសួងព័ត៍មាន លោក Fawad Chaudhry ដែលជាជំនួយការជិតស្និទ្ធលោក Khanក៏បាននិយាយគាំទ្រលោកផងដែរថាពួក គេមិនអាចគ្រប់គ្រងអ្នកគាំទ្ររបស់ខ្លួនបាននោះទេ ហើយលោកបានបន្តទៀតថា លោកមានការព្រួយបារម្ភដល់លោក Khan ដោយសារកន្លងមកលោកត្រូវបានគេប៉ុនប៉ងធ្វើឃាត ស្របពេលរដ្ឋមន្រ្តីក្រសួងមហាផ្ទៃកំពុងធ្វើការគំរាមកំហែងទៅលើរូបលោក។
លោក Muneeb Farooq អ្នកវិភាគនយោបាយ១រូប បាននិយាយថា ប្រសិនបើលោក Khan ត្រូវបានចាប់ខ្លួននោះរដ្ឋាភិបាលត្រូវការពារសុវត្ថិភាពរបស់គាត់ ហើយរដ្ឋាភិបាលមិនអាចប៉ះពាល់រូបលោកបាននោះទេ ពីព្រោះគាត់មិន មែនជាមនុស្សធម្មតាឡើយ ហើយលោក Khan ក៏ដើរតួនាទីយ៉ាងសំខាន់នៅក្នុងអំណាចប្រជាធិបតេយ្យរបស់ប្រទេសផងដែរ។
គួរបញ្ជាក់ឱ្យដឹងផងដែរថា ការប្រឆាំងគ្នាផ្នែកនយោបាយជារឿងធម្មតាទៅហើយនៅក្នុងប្រទេសប៉ាគីស្ថាន ដែលមិនមាននាយករដ្ឋមន្រ្តីណាមួយបានដឹកនាំអណត្តិរបស់ខ្លួនពេញលេញទេ។ក្នុងនោះផងដែរ លោក Khan បន្ទាប់ពីត្រូវបានបណ្តេញចេញពីតំណែង ក្នុងការបោះឆ្នោតសភាឆ្នាំមុន លោកបានបង្កភាពចលាចល ដោយដឹកនាំអ្នកគាំទ្ររបស់លោកធ្វើបាតុកម្មឱ្យទាមទារការបោះឆ្នោតម្តងទៀត គ្រានោះផងដែរ លោកត្រូវបានគេបាញ់ប្រហារ និងរងរបួសយ៉ាងធ្ងន់ធ្ងរពីជនមិនស្គាល់មុខ៕
