តៃវ៉ាន់នៅថ្ងៃទី ១៤ ខែមីនា ឆ្នាំ ២០២៣ បានធ្វើការបង្ហាញយន្តហោះគ្មានមនុស្សបើក ឬហៅថា ដ្រូនសម្រាប់ការវាយប្រហារចល័តជាលើកដំបូងរបស់ខ្លួនដែលជ្រាដូនមានភាពស្រដៀងទៅនឹងគំរូរបស់សហរដ្ឋអាមេរិកដែលបានប្រើក្នុងសមរភូមិប្រយុទ្ធរបស់អ៊ុយក្រែនប្រឆាំងនឹងរុស្ស៊ី ខណៈដែលចិនកំពុងដំឡើងសម្ពាធយោធាទៅលើកោះមួយនេះកាន់តែខ្លាំងឡើង។
តៃវ៉ាន់មានប្រជាជនសរុប ២៣,៥ លាននាក់ ហើយពួកគេទាំងអស់កំពុងរស់នៅក្រោមការគំរាមកំហែងដោយឥតឈប់ឈរពីសំណាក់ចិនដីគោកដែលអាចនឹងធ្វើការឈ្លានពានកោះតៃវ៉ាន់ ហើយចិនក៏តែងតែអះអាងថា ដែនកោះតៃវ៉ាន់ដែលគ្រប់គ្រងដោយរដ្ឋាភិបាលប្រជាធិបតេយ្យមួយនេះជាផ្នែកមួយនៃទឹកដីរបស់ខ្លួន។ មិនត្រឹមតែប៉ុណ្ណោះចិនបានប្ដេជ្ញាថា នៅថ្ងៃណាមួយខ្លួននឹងរឹបអូសយកកោះនេះដោយប្រើប្រាស់កម្លាំងយោធា ប្រសិនបើកាលៈទេសៈចាំបាច់។
ក្រោមការដឹកនាំរបស់លោកប្រធានាធិបតី ស៊ី ជីនភីង ការឈ្លានពានពីសំណាក់ទីក្រុងប៉េកាំង ជាពិសេសទៅលើដែនអាកាសរបស់តៃវ៉ាន់ បានកើតមានឡើងជាញឹកញាប់ក្នុងប៉ុន្មានឆ្នាំចុងក្រោយនេះ។ហើយការឈ្លានពានរបស់រុស្ស៊ីទៅលើអ៊ុយក្រែន ក៏បានបំភ័យដល់តៃវ៉ាន់កាន់តែខ្លាំងដែលថា ប្រទេសចិន អាចនឹងធ្វើសកម្មភាពឈ្លានពានស្រដៀងនឹងរុស្ស៊ី។
កាលពីថ្ងៃអង្គារ វិទ្យាស្ថានវិទ្យាសាស្ត្រ និងបច្ចេកវិទ្យាជាតិជុងសាន (Chung-Shan) ដែលគ្រប់គ្រងដោយយោធា ឬហៅកាត់ថា NCSIST បានធ្វើការបង្ហាញយន្តហោះគ្មានមនុស្សបើកដែលអាចផ្ទុកគ្រាប់បែកជាមួយខ្លួនរបស់វាបាន និងដែលស្រដៀងទៅនឹង ដ្រូនប្រភេទ Switchblade 300 ដែលផលិតដោយសហរដ្ឋអាមេរិក ហើយបច្ចុប្បន្ននេះវាត្រូវបានកំពុងនឹងប្រើប្រាស់ដោយទាហានអ៊ុយក្រែន។
យោងតាមវិទ្យាស្ថាន NCSIST បានឱ្យដឹងថា យន្តហោះគ្មានមនុស្សបើកនេះអាចប្រើបានតែម្ដងប៉ុណ្ណោះ ពោលគឺត្រូវបានរចនាឡើងក្នុងទំហំតូចល្មមអាចដាក់ចូលក្នុងកាបូបស្ពាយបាន ហើយអាចហោះនៅលើអាកាសបានរយៈពេល ១៥ នាទី។លោក ជី លីពីន (Chi Lipin) ប្រធានផ្នែកស្រាវជ្រាវប្រព័ន្ធអាកាសចរណ៍របស់វិទ្យាស្ថាន NCSIST បានលើកឡើងថា «ដោយសារតែវាមានទម្ងន់ស្រាល និងអាចចល័តបាន ដូច្នេះវាប្រៀបបានទៅនឹងគ្រាប់បែកដៃដ៏ធំមួយដែលអាចហោះហើរបាន»។
លោកបានបន្ថែមថា៖ «វាមានប្រសិទ្ធភាពក្នុងការវាយប្រហារគោលដៅនៅជិតឆ្នេរសមុទ្ររបស់ពួកយើង»។ លោកក៏បានធ្វើការកត់សម្គាល់ផងដែរថា ចម្ងាយដែល្រដូននេះ អាចហោះបានជាអតិបរមាគឺរហូតដល់ទៅ ១០ គីឡូម៉ែត្រ។ ប្រធានផ្នែកស្រាវជ្រាវរូបនេះបានបញ្ជាក់ថា តៃវ៉ាន់កំពុងអភិវឌ្ឍយន្តហោះគ្មានមនុស្សបើកសម្រាប់វាយប្រហារធ្វើអត្តឃាត ជំនាន់ក្រោយរបស់ខ្លួន រួមទាំងមានបច្ចេកវិទ្យាល្អប្រសើរជាងមុន ដែលអាចប្រើប្រាស់បានក្នុងការវាយប្រហារទៅកាន់គោលដៅស្ថិតនៅរយៈចម្ងាយឆ្ងាយ។
គួរបញ្ជាក់ផងដែរថា យន្តហោះគ្មានមនុស្សបើកសម្រាប់វាយប្រហារនេះ អាចហោះនៅលើអាកាសបាន ខណៈដែលខ្លួនរបស់វាអាចផ្ទុកគ្រឿងផ្ទុះ ផ្សេងៗមុនពេលធ្លាក់ចូលទៅបំផ្ទុះគោលដៅទៅតាមការចង់បានរបស់អ្នកបញ្ជា។
ភាពតានតឹងបានកើនឡើងខ្លាំងកាលពីឆ្នាំមុន បន្ទាប់ពីទីក្រុងប៉េកាំងបានចាប់ផ្តើមធ្វើសមយុទ្ធយោធាដើម្បីជាការឆ្លើយតបនឹងដំណើរទស្សនកិច្ចរបស់ប្រធានសភាអាមេរិកលោកស្រី ណានស៊ី ប៉េឡូស៊ី (Nancy Pelosi) ទៅកាន់ទីក្រុងតៃប៉ិ។ កាលនោះ វាគឺជាព្រឹត្តិការណ៍មួយដែលអ្នកជំនាញមួយចំនួនបានមើលឃើញថាជាការធ្វើសមយុទ្ធមួយក្នុងគោលបំណងហាត់សមមុនឈ្លានពានទៅលើកោះតៃវ៉ាន់។
ដោយឡែក ក្រុមសម្ព័ន្ធមិត្តជិតខាងបានជំរុញឱ្យកោះតៃវ៉ាន់ប្រកាន់យកនូវយុទ្ធសាស្ត្រមួយដែលអាចធ្វើឱ្យមានការលំបាកសម្រាប់យោធារបស់ចិនក្នុងការឈ្លានពាន ហើយវាគឺជាយុទ្ធសាស្ត្រមួយដែលត្រូវធ្វើការពង្រឹងការការពារឱ្យបានរឹងមាំ ដូចទៅនឹងយុទ្ធសាស្ត្ររបស់កងកម្លាំងអ៊ុយក្រែនដែលធ្លាប់បានប្រើប្រាស់ក្នុងការប្រយុទ្ធប្រឆាំងនឹងរុស្ស៊ី។យុទ្ធសាស្ត្រនោះសង្កត់ធ្ងន់ទៅលើការទិញប្រព័ន្ធអាវុធចល័ត និងអាវុធដែលមានតម្លៃធូរថ្លៃ ហើយត្រូវបណ្តុះបណ្តាលជនស៊ីវិលឱ្យចេះប្រយុទ្ធក្នុងសមរភូមិសង្គ្រាម៕