.jpg)
ប្រធានាធិបតីរុស្ស៊ី លោក វ្ល៉ាឌីមៀ ពូទីន (ស្តាំ) ស្តាប់អភិបាលក្រុង Sevastopol លោក Mikhail Razvozhayev នៅពេលលោកទៅទស្សនាមជ្ឈមណ្ឌលសិល្បៈ និងសិប្បកម្មកុមារ ជាផ្នែកមួយនៃឧទ្យានប្រវត្តិសាស្ត្រ និងបុរាណវិទ្យា Chersonesos Taurica ក្នុងខួបលើកទី៩នៃការបោះឆ្នោតប្រជាមតិស្តីពីស្ថានភាពរដ្ឋនៅគ្រីមា និង Sevastopol និងការបង្រួបបង្រួមរបស់ខ្លួនជាមួយរុស្ស៊ី។ AFP
នៅថ្ងៃទី១៩ មីនា ប្រព័ន្ធផ្សព្វផ្សាយរដ្ឋរុស្ស៊ីបានរាយការណ៍ថា ប្រធានាធិបតីរុស្ស៊ី លោក វ្ល៉ាឌីមៀរពូទីន បានធ្វើដំណើរទស្សនកិច្ចដ៏គួរឱ្យភ្ញាក់ផ្អើលមួយទៅកាន់ទីក្រុង Mariupol។
នេះជាដំណើរទស្សនកិច្ចលើកដំបូង របស់មេដឹកនាំវិមានក្រឹមឡាំង ទៅកាន់ទឹកដីរបស់អ៊ុយក្រែន ដែលអ្នកឃ្លាំមើលសង្កេតឃើញថា រុស្ស៊ី ប្រើគ្រប់មធ្យោបាយដើម្បីដណ្ដើមយកចាប់តាំងពីការចាប់ផ្តើមសង្គ្រាមឈ្លានពានអ៊ុយក្រែនរួចមក។
ប្រភពដដែលផ្សាយថា ដំណើរទស្សនកិច្ចនេះកើតឡើង បន្ទាប់ពីលោកពូទីន បានធ្វើដំណើរទៅកាន់តំបន់គ្រីមាកាលពីថ្ងៃសៅរ៍ដោយប្រារព្ធខួបលើកទី៩ នៃកាត់បញ្ចូលទឹកដីគ្រីមាពីអ៊ុយក្រែនមករុស្ស៊ី។ បើគិតម្យ៉ាងទៀតទស្សនកិច្ចនេះធ្វើឡើង ត្រឹមតែ២ ថ្ងៃប៉ុណ្ណោះបន្ទាប់ពីតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោកពូទីន។
ទីក្រុង Mariupol បានធ្លាក់ដល់ដៃរុស្ស៊ីកាលខែឧសភា ឆ្នាំមុន ទាហានរុស្ស៊ីបើកការឈ្លានពានដោយបង្ហូរឈាមយ៉ាងស្វិតស្វាញជាទីបំផុតក្នុងចំណោមសមរភូមិទាំងអស់នៃសង្គ្រាមឈ្លានពាននេះ។ ការដណ្ដើម បានទីក្រុងនេះជាជ័យជម្នះដ៏សំខាន់លើកដំបូងរបស់រុស្ស៊ី បន្ទាប់ពីកងទ័ពរុស្ស៊ី បានបរាជ័យក្នុងការដណ្តើមយករដ្ឋធានី Kyiv។
សារព័ត៌មានរុស្ស៊ី ផ្សាយថា លោកពូទីន បានជិះឧទ្ធម្ភាគចក្រទៅកាន់ទីក្រុង Mariupol។ លោកពូទីន បានបើកឡាន បានធ្វើដំណើរជុំវិញស្រុកជាច្រើននៃទីក្រុង ដោយឈប់និងនិយាយជាមួយអ្នកស្រុកទៀតផង។
តុលាការព្រហ្មទណ្ឌអន្តរជាតិ ICC បានចេញដីកាចាប់ខ្លួនពូទីន កាលពីថ្ងៃសុក្រដោយចោទប្រកាន់គាត់ពីឧក្រិដ្ឋកម្មសង្រ្គាមនៃការនិរទេសកុមាររាប់រយនាក់ចេញពីប្រទេសអ៊ុយក្រែនដោយខុសច្បាប់។
ប្រព័ន្ធផ្សព្វផ្សាយរុស្ស៊ីបានរាយការណ៍ទៀតថា លោក Putin បានចូលលេងគ្រួសារក្នុងផ្ទះមួយរបស់ពលរដ្ឋនៅសង្កាត់ Nevsky ក្នុងទីក្រុង Mariupol ជាសង្កាត់លំនៅឋាន ថ្មីដែលសាងសង់ដោយយោធារុស្ស៊ី។
ទីភ្នាក់ងារព័ត៌មាន Interfax បានដកស្រង់ប្រភពពសារព័ត៌មានរបស់វិមានក្រឹមឡាំងថា ៖«ប្រមុខរដ្ឋ(ពូទីន) ក៏បានពិនិត្យមើលឆ្នេរសមុទ្រ Mariupol នៅក្នុងតំបន់នៃក្លិបទូកក្តោង អគារមហោស្រព កន្លែងគួរឱ្យចងចាំនៃទីក្រុង» ។
ប្រព័ន្ធផ្សព្វផ្សាយរុស្ស៊ី បានរាយការណ៍ថា លោកពូទីនក៏បានជួបជាមួយមេបញ្ជាការកំពូលនៃប្រតិបត្តិការយោធារបស់គាត់នៅក្នុងប្រទេសអ៊ុយក្រែន រួមទាំងអគ្គសេនាធិការ Valery Gerasimov ដែលទទួលបន្ទុកកិច្ចការសង្គ្រាមនៅអ៊ុយក្រែន ទៀតផង៕
វីដេអូ៖
