នៅមិនដល់ ៣ ខែ​ទៀត​ទេកា​រ​បោះឆ្នោត​ជាតិ​ថៃ​នឹង​ចូល​មកដល់។​ បក្ស​នយោបាយ​នៅ​ក្នុ​ង​រាជា​ណា​ចក្រ​ថៃ បាន​ចេញ​ផ្សព្វផ្សាយ​ពី​គោល​នយោបាយ​នានា​ដែលបក្ស​ខ្លួន​សន្យាថា​ នឹង​អនុវត្ត​ប្រសិន​បើ​ជាប់ឆ្នោត​បាន​ដឹកនាំ​រាជ​រដ្ឋាភិបាល។​

ក្នុងនោះ ​គណបក្ស​ភឿថៃ​ជា​បក្ស​ប្រឆាំង​ធំ​ជាង​គេមួយ​របស់​ប្រទេស​នេះ ​បាន​ចេញ​គោល​នយោបាយ​ដ៏​សំខាន់​មួយ​ខុសប្លែក​ពី​រដ្ឋបាល​របស់​លោក​ ប្រាយុធ​ ចាន់អូចា​ លើការងារអភិវឌ្ឍន៍​តំបន់​ទេសចរណ៍​នៅថៃ។​កាសែត​ដឹណេសិនថៃ​ ផ្សាយថា​ប្រតិបត្តិករ​អាជីវកម្ម​ទេសចរណ៍​នៅ​ទីក្រុង​ប៉ាតាយ៉ា​នៅថ្ងៃទី​១៩​ ខែមីនា​ បាន​បញ្ជូន​តំណាង​ទៅ​ជួប​សមាជិក​ជាន់​ខ្ពស់​នៃ​គណបក្ស​ភឿថៃ​ដើម្បី​ពិភាក្សា​អំពី​របៀប​ដែលរ​ដ្ឋាភិបាល​ បន្ទាប់​គួរ​តែ​អភិវឌ្ឍ​ន៍រមណីយ​ដ្ឋាន​មាត់សមុទ្រ​ដ៏​ល្បីល្បាញ​មួយនេះ​។​

ក្រុមម្ចាស់​អាជីវកម្ម​និង​អ្នក​ជំនួញ​ផ្នែក​ទេសចរណ៍​ទាំងនោះ ​បាន​ជួប​មេ​ដឹកនាំ​បក្សភឿថៃ​ លោក ​Cholnan Srikaew និ​ង ​Prommin Lertsuridej​ ប្រធាន​គណៈក​ម្មាធិការកិ​ច្ចការ​សេដ្ឋកិច្ច​របស់​គណបក្ស។​ក្នុង​ជំនួប​នោះ​ក៏​មាន​វត្តមាន​អភិបាល​ក្រុង​ប៉ាតាយ៉ា ​Poramet Ngampichet​ និង ​Sonthaya Khunpluem ​មេដឹកនាំ​ក្រុម ​Palang Chon ​ដ៏​មាន​ឥទ្ធិពល​ ដែល​បាន​ចាកចេញ​ពី​គណបក្ស​កាន់​អំណាច​ទៅចូល​រួម​ជា​មួយ​ភឿថៃ​។​

តំណាង​ធុរកិច្ច​បាន​អំពាវនាវ​ឱ្យ​មាន​ការ​កែ​លម្អ​អាកាស​យានដ្ឋាន ​U-Tapao ដើម្បី​បង្កើន​ចំនួន​ភ្ញៀវ​ទេសចរ​មក​ប៉ាតាយ៉ា។​ពួកគេ​ក៏​បានអំពាវនាវ​ឱ្យ​រដ្ឋាភិបាល​បក្ស​ភឿថៃ​ កំណត់​តំបន់​ប៉ាតាយ៉ា​ឡើងវិញ​(ភ្លើងលឿង ​ក្រហម​ខៀវ)​ ដើម្បី​ផ្តល់​អាទិភាព​ដល់​វិស័យ​ទេសចរណ៍។​

ពួកគេ ​បាន​និយាយថា​ការ​កំណត់​តំបន់​នៅ​ប៉ាតាយ៉ា​ដែល​អនុវត្ត​សព្វ​ថ្ងៃនេះ​ មិន​ឆ្លើយតប​នឹង​ស្ថានភាព​ជាក់​ស្ដែង ព្រោះការ​កំណត់​នោះ​ ធ្វើ​ឡើង​កាល​ពី២០​ឆ្នាំមុន​មកម្ល៉េះ។​ អា​ជីវករ​ថៃ ក៏​ចង់​បិទបារ៍​នៅក្រោយ​ម៉ោង២​រំលង​អាធ្រាត្រ​​ ខណៈ​ដែលច្បាប់​ថៃ​បច្ចុប្បន្ន​តម្រូវឱ្យ​បារ៍​នៅប៉ាតាយ៉ា​ទាំងអស់​ត្រូវ​បិទទ្វារ​នៅ​ត្រឹម​ម៉ោង២​រំលង​អាធ្រាត្រ​។

តំណាង​គណបក្ស​ប្រឆាំង​ភឿថៃ ​លោក​ Prommin ​បាន​និយាយថា ​ភឿថៃ​ នឹង​ធ្វើ​វិមជ្ឈការ​អំ​ណាច​រដ្ឋបាល​ដល់​ទីក្រុង​ទេសចរណ៍​ ដូច​ជា​ប៉ាតាយ៉ា ​ប្រសិន​បើខ្លួន​បាន​ជាប់ឆ្នោត​ ដឹកនាំ​រដ្ឋាភិបាល​ ដើម្បី​ធានា​ថា អា​ជីវកម្ម​ដែល​ពឹងផ្អែក​លើភ្ញៀវ​ទេសចរ​នឹង​ទទួល​បាន​ការ​គាំទ្រកាន់​តែ​ប្រសើរ​ឡើង​។

លោក​បន្ត​ថា ភឿ​ថៃ​បាន​លើក​បញ្ហា​ទេសចរណ៍​ជាមួយ​រដ្ឋាភិបាល​ជា​ច្រើន​លើក​មក​ហើយ​ដែល​មិន​បាន​ផល។

គណបក្ស​ភឿថៃ ​គ្រោងនឹង​ប្រែក្លាយ​ទី​ក្រុងបាងកក​ ឈៀងម៉ៃ ​សុងក្លា ​និង​ប៉ាតាយ៉ា ​ទៅជា ​«តំបន់​អាជីវកម្មថ្មី» ដើម្បី​លុប​ចោល​ការ​រឹតបន្តឹង​ដែល​រារាំង​ដល់​ការអភិវឌ្ឍ​សេដ្ឋកិច្ច​តំបន់​ទាំង​អស់នោះ​៕