ថ្ងៃទី ២០ ខែមីនា ឆ្នាំ ២០២៣ វិមានក្រឹមឡាំង បានឱ្យដឹងថា ប្រធានាធិបតី វ្ល៉ាឌីមៀរ ពូទីន នឹងផ្ដល់ជូនប្រធានាធិបតីចិនលោក ស៊ី ជីនភីង នូវការបំភ្លឺលម្អិតអំពីគោលជំហររបស់ប្រទេសរុស្ស៊ី ជុំវិញបញ្ហាជម្លោះនៅអ៊ុយក្រែន ក្នុងអំឡុងពេលទស្សនកិច្ចផ្លូវរដ្ឋរបស់លោក ស៊ី ទៅកាន់ប្រទេសរុស្ស៊ី។
ក្នុងអំឡុងពេលនៃការហៅទូរស័ព្ទជជែកជាមួយអ្នកសារព័ត៌មាន អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov)បានលើកឡើងថា ៖ «មេដឹកនាំទាំង២នឹងពិភាក្សាអំពីប្រធានបទស្ដីអំពីផែនការសន្តិភាពសម្រាប់អ៊ុយក្រែន ដែលបានដាក់ស្នើឡើងដោយទីក្រុងប៉េកាំងកាលពីខែមុន»។
លោក ប៉េស្កូវ បានបន្ថែមថា៖ «រវាងលោក ពូទីន និងលោក ស៊ី បើទោះបីជាស្ថិតក្នុងកាលៈទេសៈណាក៏ដោយ ប្រធាន បទដែលបានរកឃើញនៅក្នុងផែនការនេះ នឹងមិនត្រូវបានចៀស រួចនោះឡើយក្នុងការលើកយកមកពិភាក្សាក្នុងអំឡុងពេលនៃការផ្លាស់ប្តូរទស្សនៈគ្នាទៅវិញទៅមកស្តីពីបញ្ហានៅអ៊ុយក្រែន»។
អ្នកនាំពាក្យវិមានក្រឹមឡាំងរូបនេះបានបន្តថា៖«ជាការពិតណាស់ ការបកស្រាយបំភ្លឺអំពីគោលជំហររបស់រុស្ស៊ីនឹងត្រូវបានធ្វើឡើងដោយប្រធានាធិបតីលោក ពូទីន ដើម្បីឱ្យប្រធានាធិបតី ស៊ីអាចយល់បានអំពីទិដ្ឋភាពទូទៅដោយផ្ទាល់នៃស្ថានភាពបច្ចុប្បន្នពីភាគីរុស្ស៊ី»។
យ៉ាងណាក៏ដោយ ផែនការទាំង ១២ ចំណុចរបស់ចិនដែលបានស្នើឡើងឱ្យមានការសន្ទនារវាងភាគីទាំង២ មិនមានការផ្ដល់ជូននូវដំណោះស្រាយណាមួយជាក់លាក់ក្នុងការបង្ហាញផ្លូវទៅរកការបញ្ចប់សង្រ្គាមនោះទេ។ គួរដឹងដែរថា ឥឡូវនេះ សង្គ្រាមរវាងរុស្សីនិងអ៊ុយក្រែន បានអូសបន្លាយពេលវេលាដល់ខែទី១៣ ហើយ។
ចំពោះភាគីអ៊ុយក្រែនវិញ ប្រទេសនេះបានស្វាគមន៍ចំពោះផែនការសន្តិភាពរបស់ចិនប្រកបដោយការប្រុងប្រយ័ត្នខ្ពស់ ប៉ុន្តែសហរដ្ឋអាមេរិកបានច្រានចោលទាំងស្រុង ដោយសារតែចិនបានបដិសេធ មិនបានធ្វើការថ្កោលទោសការឈ្លានពានរបស់រុស្ស៊ីទៅលើទឹកដីអ៊ុយក្រែន។
លោក ស៊ី បានធ្វើដំណើរទៅដល់ទីក្រុងម៉ូស្គូនៅវេលាម៉ោង ១រសៀល (ម៉ោងនៅទីក្រុងម៉ូស្គូ)ដើម្បីចូលជួបពិភាក្សាក្រៅផ្លូវការផ្ទាល់ជាមួយលោក ពូទីន កាលពីរសៀលថ្ងៃចន្ទ បន្ទាប់មកទទួលទានអាហារពេលល្ងាចរួមគ្នា។ ដោយឡែក សម្រាប់ការចរចាជាផ្លូវការគ្រោងនឹងធ្វើឡើង នៅថ្ងៃអង្គារនេះ។
គួរកត់សម្គាល់ថា នៅពេលដែលមានការសាកសួរថាតើចិនអាចក្លាយជាអន្តរការីរវាងទីក្រុងម៉ូស្គូ និងទីក្រុងវ៉ាស៊ីនតោនដែរឬទេនោះ លោក ប៉េស្គូវបានបដិសេធចំពោះការផ្ដល់ចម្លើយដោយផ្ទាល់។
លោកបានមានប្រសាសន៍ថា ៖ «នៅពេលនេះ យើងឃើញមានការខិតខំប្រឹងប្រែងជាបន្តបន្ទាប់ ដើម្បីទប់ស្កាត់មិន ឱ្យភាពតានតឹងកាន់តែអាក្រក់ទៅ។ ទីក្រុងវ៉ាស៊ីនតោន ក្រសួងការបរទេស រួមទាំងក្រុមប្រឹក្សាសន្តិសុខជាតិសហរដ្ឋអាមេរិកក៏បាននិងកំពុងនិយាយអំពីបញ្ហានេះដោយបើកចំហ និងជាផ្លូវការផងដែរ»។
កន្លងមក ទីក្រុងម៉ូស្គូតែងតែបានធ្វើការចោទប្រកាន់សហរដ្ឋអាមេរិក និងបណ្ដាប្រទេសលោកខាងលិចថា បានផ្ដល់អាវុធយ៉ាងច្រើនសន្ធឹកសន្ធាប់ទៅឱ្យអ៊ុយក្រែនក្នុងគោលបំណងធ្វើឱ្យផែនការយុទ្ធសាស្ត្ររបស់រុស្ស៊ីត្រូវបរាជ័យ។
យ៉ាងណាក៏ដោយ ទីក្រុងវ៉ាស៊ីនតោន និងសម្ព័ន្ធមិត្តដទៃទៀតបានឆ្លើយតបថាពួកគេកំពុងបំពាក់បំប៉នគ្រឿងសព្វាវុធដល់អ៊ុយក្រែន ដើម្បីការពារខ្លួនប្រឆាំងនឹងការឈ្លានពានរបស់រុស្ស៊ីដែលតែងតែរករឿងឥតឈប់ឈរនិងបានដណ្តើមយកទឹកដីអ៊ុយក្រែនយ៉ាងគឃ្លើនទៀតផង។
លោក ប៉េស្កូវបានបញ្ជាក់បន្ថែមថា៖ «សហរដ្ឋអាមេរិកកំពុងប្រកាន់ខ្ជាប់នូវគោលជំហររបស់ខ្លួន ក្នុងគោលបំណងចង់បង្កជម្លោះបន្ថែមទៀត ដោយមិនបានព្យាយាមកាត់បន្ថយភាពតានតឹងឱ្យប្រសើរឡើងនោះទេ តែបែរជានាំគ្នាដឹកជញ្ជូនអាវុធចូលទៅក្នុងប្រទេសអ៊ុយក្រែនទៅវិញ»៕