ប្រធានាធិបតី ​អ៊ុយក្រែន ​លោក​ វ្ល៉ូឌីមៀរ ហ្សេលេនស្គី​ បាន​ថ្លែង​កាល​ពី​ថ្ងៃយប់​​ថ្ងៃ​ទី​២២ ខែមីនា​ ថា​ អ៊ុយក្រែន​នឹង​​សង​សឹក​​​គ្រប់​គ្រាប់​​ដែល​រុស្ស៊ី​ បាញ់​មក​លើ​ប្រទេស​របស់​ខ្លួន​ បន្ទាប់​ពី​រុស្ស៊ី​បើក​ការ​វាយប្រហារ​ដោ​យ​ដ្រូន និង​មីស៊ីល​​​ចុង​ក្រោយ​ ដោយ​សម្លាប់​ជន​ស៊ី​វិល​​យ៉ាង​ហោច​​ណាស់​ ៩នាក់​។ ​

​លោក​ ហ្សេលេនស្គី​ បាន​ថ្លែង​យ៉ាង​ដូច្នេះ​ថា​៖ «​យើង​ពិត​ជា​នឹង​ឆ្លើយ​តប​រាល់​ការ​វាយ​ប្រហារ​របស់​អ្នក​ឈ្លា​ន​ពាន​លើ​ទី​ក្រុង​របស់​យើង​​។ ​រាល់​ការ​វាយ​ប្រហារ​របស់​រុស្ស៊ី ​នឹង​រង​ការ​ឆ្លើយ​តប​ផ្នែក​យោធា​ នយោបាយ​ និង​​ផ្លូវ​ច្បាប់​»​។

ការ​ថ្លែង​​​របស់​លោក​ ហ្សេលេនស្គី​ នេះ​ធ្វើ​ឡើងបន្ទាប់​​រុស្ស៊ី​បើក​ការ​វាយ​ប្រហារ​ដោយ​ដ្រូន​នៅ​ព្រឹក​ព្រលឹម​ថ្ងៃ​ពុធ​លើ​អន្តេវាសិកដ្ឋាន​ចំនួន​​២​ និង​មហាវិទ្យាល័យ​​១​ នៅ​​ទីក្រុង​ Rzhyshchiv ដែល​ស្ថិត​នៅ​ចម្ងាយ​ប្រមា​ណ​ ៦៤ គីឡូម៉ែត្រ​ពី​​ភាគ​ខាង​ត្បូង​នៃ​រដ្ឋ​ធានី​កៀវ​។ ការ​វាយ​ប្រហារ​នេះ​ ​​បណ្ដាល​ឱ្យ​មនុស្ស ៨ នាក់​ស្លាប់​ និង​​ ៧ នាក់​ផ្សេង​ទៀត​រង​របួស​​។

​​ប៉ុន្មាន​ម៉ោង​ក្រោយ​មក​រុស្ស៊ី​​បាន​បើក​ការ​វាយ​ប្រហារ​ដោយ​មីស៊ីល​​នៅ​ទីក្រុង​ហ្សាប៉ូរីចា​ ដែល​​ធ្វើ​ឱ្យ​ខូត​ខាតអគារ​លំនៅ​ដ្ឋាន​ចំនួន​​២ ​ដែល​សម្លាប់​មនុស្ស​យ៉ាង​ហោច​ណាស់​ម្នាក់​ ខណៈ​ ៣៣ នាក់​ផ្សេង​ទៀត​ ត្រូវ​បញ្ជូ​ន​ទៅ​មន្ទីរពេទ្យ​។ ​

លោក​ ហ្សេលេនស្គី បាន​​ពណ៌នា​ការ​វាយ​ប្រហារ​លើ​ទីក្រុង​ហ្សាប៉ូរីចា​ ថា​ជា​​ជា​ទង្វើ​ «​​ព្រៃ​ផ្សៃ​បំផុ​ត»​។ លោ​ក​​បាន​​បន្ថែម​​​​ថា​ ការ​​វាយ​​ប្រហារ​​កាល​​ពី​​ថ្ងៃ​​ពុធ​ ​បាន​​បង្ហាញ​​​ថា​ ​ក្រុង​ម៉ូស្គូ​​ មិន​​ចាប់​​អារម្មណ៍​​ចំពោះ​​សន្តិភាព​នោះ​​​​ទេ​។​

​បើ​តាម​ការ​ចុះ​ផ្សាយ​របស់​សារព័ត៌មាន​ផ្សេង​ៗ​ ​​បន្ថែម​ពី​លើ​ការ​វាយ​ប្រហារ​ ពោល​គឺ​នៅ​​យប់​ថ្ងៃ​ពុធ​ គេ​ឮ​​សំឡេង​​ស៊ីរ៉ែន​បាន​បន្លឺ​ឡើង​ពេញ​រដ្ឋ​ធានី​កៀវ​ និង​តំបន់​ភាគ​ខាង​ជើង​នៃ​ប្រទេស​អ៊ុយក្រែន​។​ យោធា​អ៊ុយក្រែន ​បាន​និយាយ​ថា​ ខ្លួន​បាន​បាញ់​ទម្លាក់​ដ្រូន ​​​Shahed ដែល​ផលិត​ដោយ​អ៊ីរ៉ង់​ចំនួន​ ១៦គ្រឿង​ ក្នុង​ចំណោម​ ២១​គ្រឿង​ ដែល​រុស្ស៊ី​បាន​បាញ់​បង្ហោះ​។

គួរ​គូស​បញ្ជាក់​ថា​ ការ​វាយ​ប្រហារ​របស់​រុស្ស៊ីចុង​ក្រោយ ធ្វើ​ឡើង​ទន្ទឹម​នឹង​ពេល​ដែល​​ «មិត្ត​សម្លាញ់​» របស់​លោក​​​ប្រធានា ធិបតី​​រុស្ស៊ី វ្ល៉ាឌីមៀរ ​ពូទីន​ ​គឺ​​មេដឹកនាំ​ចិន​ លោក​ ស៊ី ជីនពីង​ បាន​បញ្ចប់​ទស្សនកិច្ច​ទៅ​ក្រុងម៉ូ​ស្គូ​របស់​ខ្លួន​ ហើយ​វិញ​ត្រឡប់​ទៅ​ក្រុង​ប៉េកាំង​​វិញ​។ មេ​ដឹកនាំ​ទាំង​២​នេះ​​ សុទ្ធ​សឹង​តែ​បង្ហាញ​​ពី​ផែនការ​សន្តិភាព​ ខណៈ​ដែល​ការ​វាយ​ប្រហារ​របស់​រុស្ស៊ី​នៅ​អ៊ុយក្រែន​កំពុង​បន្ត​។

​ទីក្រុង​ប៉េកាំង​កន្លង​មក​ បាន​ស្នើ​ផែនការ​សន្តិភាព​សម្រាប់​អ៊ុយក្រែន​ ដែល​លោក​ខាង​លិច​ភាគ​ច្រើន​ច្រាន​ចោល​ថា​ជា​រឿង​មិន​ច្បាស់​លាស់​បំផុត​ និង​ជា​ផែន​ការ​ដើម្បី​​ទុក​ពេល​ឱ្យ​លោក​ ពូទីន​ ប្រមែ​ប្រមូល​កម្លាំង​ទ័ព​។

ជុំ​វិញ​បញ្ហា​នេះ​ លោក ហ្សេលេនស្គី បាន​​​បង្ហោះ​សារ​លើ​បណ្ដាញ​សង្គម​ធ្វីតធឺរ​ ​ដោយ​​សំដៅ​ជាក់​ស្ដែង​​លើ​ទស្សនកិច្ច​ទៅ​រុស្ស៊ី​របស់​​លោក ស៊ី​ ថា​​៖ «​រាល់​​ពេល​​​​នរណា​ម្នាក់​​​ព្យាយាម​​ស្តាប់​​ពាក្យ​​ថា​ «​សន្តិភាព​»​ នៅ​​​ទីក្រុង​​ម៉ូស្គូ» គឺ​មាន​បញ្ជា​មួយ​ទៀត​ដែល​ចេញ​ពី​ក្រុង​នេះ​ដែរ​ ​ដើម្បី​​វាយ​ប្រហារ​​ឧក្រិដ្ឋកម្ម​លើ​អ៊ុយក្រែន​៕