.jpg)
មេដឹកនាំកូរ៉េខាងជើង លោក គីម ជុងអ៊ុន (កណ្តាល) ត្រួតពិនិត្យគម្រោងផលិតអាវុធនុយក្លេអ៊ែរ នៅទីតាំងមួយដែលមិនស្គាល់នៅក្នុងប្រទេសកូរ៉េខាងជើង។ AFP
បណ្ដាញផ្សព្វផ្សាយព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃអង្គារទី ២៨ ខែមីនា នេះថា លោកប្រធានាធិបតីកូរ៉េខាងជើង គីម ជុងអ៊ុន បានអំពាវនាវឱ្យបង្កើនការផលិតបរិក្ខារនុយក្លេអ៊ែរដែលអាចប្រើធ្វើអាវុធបាន ដើម្បីពង្រីកឃ្លាំងអាវុធរបស់ប្រទេស ដោយនិយាយថា ក្រុងព្យុងយ៉ាង គួរតែត្រៀមខ្លួនរួចរាល់ក្នុងការប្រើប្រាស់អាវុធផ្សេងៗគ្រប់ពេលវេលា។
KCNA បានរាយការណ៍ថា លោក គីម បានលើកឡើងយ៉ាងដូច្នេះនៅពេលត្រួតពិនិត្យកម្មវិធីអាវុធនុយក្លេអ៊ែររបស់ប្រទេស រួមទាំងអាវុធនុយក្លេអ៊ែរតាកទិកថ្មី និងបច្ចេកវិទ្យាសម្រាប់ដំឡើងក្បាលគ្រាប់នៅលើមីស៊ីលផ្លោង និងពិនិត្យមើលផែនការប្រតិបត្តិការវាយប្រហារនុយក្លេអ៊ែរ។
បណ្ដាញផ្សព្វផ្សាយដដែលថា លោក គីម បានបញ្ជាឱ្យផលិតបរិក្ខារដែលអាចប្រើធ្វើអាវុធបាន ក្នុង«វិធីដែលមើលឃើញឆ្ងាយ» ដើម្បីបង្កើនឃ្លាំងអាវុធនុយក្លេអ៊ែររបស់ប្រទេសឱ្យបានកាន់តែច្រើន និងផលិតអាវុធកាន់តែមានឥទ្ធិពលជាងមុន។
លោក គីម បានលើកឡើងទៀតថា សត្រូវនៃកងកម្លាំងនុយក្លេអ៊ែររបស់ប្រទេសនេះ មិនមែនជារដ្ឋ ឬក្រុមជាក់លាក់ណាមួយនោះទេ ប៉ុន្តែជា«សង្គ្រាម និងគ្រោះមហន្តរាយនុយក្លេអ៊ែរ» ហើយគោលនយោបាយពង្រីកឃ្លាំងអាវុធរបស់កូរ៉េខាងជើង គឺសំដៅតែ១គត់ គឺដើម្បីការពារប្រទេស និងសន្តិភាព និងស្ថិរភាពក្នុងតំបន់។
គួរគូសបញ្ជាក់ថា កូរ៉េខាងជើង បាននិងកំពុងបង្កើនការសាកល្បងអាវុធរបស់ខ្លួន រួមទាំងការបាញ់សាកល្បងមីស៊ីលផ្លោងរយៈចម្ងាយខ្លីកាលពីថ្ងៃចន្ទ និងការធ្វើសមយុទ្ធយោធា ដើម្បីធ្វើការវាយប្រហារដោយនុយក្លេអ៊ែរ «ក្លែងក្លាយ» កាលពីសប្តាហ៍មុនប្រឆាំងនឹងសហរដ្ឋអាមេរិក និងកូរ៉េខាងត្បូង ដែលរងការចោទប្រកាន់ពីក្រុងព្យុងយ៉ាងថា ធ្វើសកម្មភាពយោធាដើម្បីត្រៀមឈ្លានពានកូរ៉េខាងជើង៕
