.jpg)
ឡូហ្គោតិកតុក ត្រូវបង្ហាញនៅលើអេក្រង់ទូរស័ព្ទ iPhone នៅពីមុខទង់ជាតិអាមេរិក និងចិន ក្នុងទីក្រុងវ៉ាស៊ីនតោន។ AFP
ប្រធាននាយកដ្ឋានសន្តិសុខតាមអ៊ីនធឺណិតរបស់ទីភ្នាក់ងារសន្តិសុខជាតិអាមេរិក លោក Rob Joyce បាននិយាយកាលពីថ្ងៃចន្ទ ទី ២៧ មីនាថា តិកតុក (TikTok) តំណាងឱ្យបញ្ហាជាយុទ្ធសាស្រ្ត ជាជាងការគំរាមកំហែងជាយុទ្ធសាស្រ្តភ្លាមៗសម្រាប់សហរដ្ឋអាមេរិក។
ថ្លែងក្នុងសន្និសីទគោលនយោបាយដែលរៀបចំឡើងនៅតំបន់កាលីហ្វ័រនីញ៉ាខាងជើង លោក Joyce បានរំឭកឡើងវិញពីការអះអាងកាលពីលើកមុនរបស់ទីភ្នាក់ងារចារកម្មអាមេរិកថា កម្មវិធីបណ្តាញសង្គមដែលគ្រប់គ្រងដោយចិន គឺស្រដៀងទៅនឹង «កាំភ្លើងដាក់គ្រាប់» ដែលរដ្ឋាភិបាលចិនអាចប្រើដើម្បីមានឥទ្ធិពលលើព័ត៌មានដែលជនជាតិអាមេរិកាំងបានឃើញ។
លោកJoyce បានបន្តថា ចិនអាចប្រើប្រាស់ឥទ្ធិពលរបស់ខ្លួនលើតិកតុកដើម្បីរឹតត្បិតលើព័ត៌មានដែលអាចធ្វើឱ្យប្រទេសជាតិរបស់ខ្លួន មើលទៅអាក្រក់ក្នុងភ្នែកជនជាតិអាមេរិក។
ការលើកឡើងរបស់លោក Joyce បានបន្ទរពីលើការព្រមានមុននោះ ដោយប្រធានការិយាល័យស៊ើបអង្កេតសហព័ន្ធ (FBI) លោកChristopher Wray និងនាយកទីភ្នាក់ងារសន្តិសុខជាតិលោកPaul Nakasone ដែលបានប្រាប់ទៅសមា ជិកសភាអាមេរិកថា តិកតុក អាចត្រូវបានប្រើប្រាស់ ដើម្បីអនុវត្តយុទ្ធនាការ ដើម្បីបន្សាយឥទ្ធិពល។
ចំណែកឯប្រធានាធិបតីអាមេរិក លោក ចូ បៃដិន វិញ បានបង្ហាញពីការគាំទ្ររបស់លោកចំពោះច្បាប់ដែលបង្កើតឡើងដោយសមាជិកព្រឹទ្ធសភារាប់សិបរូប ដែលនឹងផ្តល់ឱ្យលោកនូវអំណាចក្នុងការហាមឃាត់កម្មវិធីតិកតុក និងបច្ចេកវិទ្យាបរទេសផ្សេងទៀត ប្រសិនបើវាបង្កហានិភ័យដល់សន្តិសុខជាតិ។
យ៉ាងណាមិញ ក៏គួរបញ្ជក់ផងដែរថា កាលពីថ្ងៃព្រហស្បតិ៍សប្ដាហ៍មុន សមាជិកសភាតំណាងរាស្រ្តអាមេរិកជំរុញឱ្យនាយកប្រតិបត្តិក្រុមហ៊ុនតិកតុក លោកChew Shou Zi បង្ហាញអំពីការអនុវត្តការគ្រប់គ្រងទិន្នន័យរបស់កម្មវិធី ដោយឆ្លុះបញ្ចាំងពីការព្រួយបារម្ភដែលកំពុងកើនឡើងចំពោះអ្នកប្រើប្រាស់ ប្រមាណ ១៥០ លាននាក់នៅសហរដ្ឋអាមេរិកតែ១។ អំឡុងពេលផ្តល់សក្ខីកម្មក្នុងសភាពេលនោះ លោកChew បានបដិសេធម្តងហើយម្តងទៀតថា តិក តុកមិនចែករំលែកទិន្នន័យ ឬមានទំនាក់ទំនងជាមួយបក្សកុម្មុយនីស្តចិន ដែលកំពុងដឹកនាំប្រទេសនោះទេ៕
