លោក Evan Gershkovich អ្នកកាសែត The Wall Street Journal ។
ប្រធានាធិបតីអាមេរិកលោក ចូបៃ ដិន (Joe Biden) កាលពីថ្ងៃសុក្រនេះ អំពាវនាវឱ្យរដ្ឋាភិបាលរុស្ស៊ីលើកលែងទោសដល់អ្នកកាសែតជនជាតិអាមេរិកលោក Even Gershkovich បន្ទាប់ពីត្រូវបានចាប់ខ្លួននៅទីក្រុងម៉ូស្គូ ពីបទចារកម្មក្នុងផលប្រយោជន៍នៃប្រទេសរបស់ខ្លួន។ នេះបើយោងតាមការដកស្រង់សម្តីចេញពីភ្នាក់ងារស៊ើបអង្កេត FSB របស់ទីភ្នាក់ងារសារព័ត៌មានរដ្ឋរុស្ស៊ី TASS។
ការចាប់ខ្លួនអ្នកកាសែតដែលបម្រើការងារនៅស្ថាប័ន The Wall Street Journal នេះផ្ទុះឡើងពេញប្រព័ន្ធផ្សព្វផ្សាយ រួមជាមួយការកំណត់ចំនួនព័ត៌មានដែលត្រូវចុះផ្សាយពីសំណាក់រដ្ឋាភិបាលរុស្ស៊ី ដែលធ្វើឱ្យករណីនេះទទួលបានការរិះគន់យ៉ាងខ្លាំងពីសំណាក់ក្រុមសិទ្ធិមនុស្ស ជាពិសេសមន្ត្រីរដ្ឋាភិបាលនៅទីក្រុងវ៉ាស៊ីនតោន ដោយពួកគេមើលឃើញថា វាគឺជាការបញ្ឈប់សិទ្ធិសេរីភាពអ្នកសារព័ត៌មានរបស់ប្រទេសខ្លួន។
ថ្លែងតាមការដកស្រង់របស់សារព័ត៌មានរដ្ឋរុស្ស៊ី TASS បានឱ្យដឹងថាលោក Gershkovich បានបដិសេធរាល់ការចោទប្រកាន់ទាំងអស់។
កាលពីថ្ងៃសុក្រនេះ មេដឹកនាំសំឡេងភាគច្រើនក្នុងព្រឹទ្ធសភាសហរដ្ឋអាមេរិក លោក Chuck Schumer និងមេដឹកនាំគណបក្សសាធារណរដ្ឋក្នុងព្រឹទ្ធសភាអាមេរិកលោក Mitch McConnell បាននិយាយនៅក្នុងសេចក្តីថ្លែងការណ៍ដ៏កម្រមួយថា ៖«យើងថ្កោលទោសយ៉ាងដាច់អហង្ការចំពោះការឃុំឃាំងដោយខុសឆ្គងលើពលរដ្ឋអាមេរិក ជាពិសេសអ្នករាយការណ៍ព័ត៌មាន Wall Street Journal លោក Evan Gershkovich ហើយទាមទារឱ្យមានការដោះលែងអ្នកសារព័ត៌មានឯករាជ្យដែលល្បីល្បាញនេះជាបន្ទាន់»។
អ្នកទាំងពីរក៏បានបញ្ជាក់បន្ថែមទៀតដែរថា ការចាប់ខ្លួនអ្នកសារព័ត៌មានរូបនេះពីសំណាក់រដ្ឋាភិបាលរុស្ស៊ី គឺជាការគំរាមកំហែង ការគាបសង្កត់ និងដាក់ទណ្ឌកម្មអ្នកសារព័ត៌មានឯករាជ្យ និងសំឡេងសង្គមស៊ីវិល។
សូមជម្រាបផងដែរថា ការចាប់ខ្លួនលោក Gershkovich បានបង្កការភ្ញាក់ផ្អើលយ៉ាងខ្លាំង ចំពេលសម្ព័ន្ធមិត្តរវាងប្រទេសទាំងពីរកំពុងស្ថិតក្នុងសភាពទន់ខ្សោយ ដោយសារសង្គ្រាមរវាងរុស្ស៊ីនិងអ៊ុយក្រែន៕
