ក្រុមធ្វើកោសល្យវិច័យស្វែងរកភ័ស្តុតាងនៅកន្លែងដែលអ្នកនយោបាយ Atiq Ahmad និងបងប្រុសរបស់គាត់ឈ្មោះ Ashraf Ahmad ត្រូវបានបាញ់សម្លាប់ដោយខ្មាន់កាំភ្លើងនៅខាងក្រៅមន្ទីរពេទ្យ Kalvin ខណៈពេលដែលត្រូវបានគេនាំទៅពិនិត្យសុខភាពនៅក្នុងមន្ទីរឃុំឃាំងប៉ូលិសនៅទីក្រុង Prayagraj នៅថ្ងៃទី១៥ ខែមេសា ឆ្នាំ ២០២៣។ AFP .
អតីតសមាជិកសភាប្រទេសឥណ្ឌា លោក Atiq Ahmed និងបងប្រុសរបស់លោក គឺលោក Ahfred Ahmed ត្រូវបានខ្មាន់កាំភ្លើងបាញ់សម្លាប់អំឡុងពេលប៉ូលិសកំពុងនាំខ្លួនទៅពិនិត្យសុខភាពមុនពេលចាប់យកទៅឃុំឃាំងក្រោមបទចាប់ជំរិត កាលពីថ្ងៃសៅរ៍ទី ១៥ ខែមេសា ឆ្នាំ ២០២៣។
ខ្សែរវីដេអូដ៏គួរឱ្យភ្ញាក់ផ្អើលមួយ ត្រូវបានចែកចាយពេញបណ្តាញសង្គមដោយក្នុងនោះត្រូវបានគេមើលឃើញថាខ្មាន់កាំភ្លើងមិនស្គាល់អត្តសញ្ញាណបានឈរនៅជិតប៉ូលិស និងបានបាញ់ចំក្បាលរបស់អ្នកទោសទាំង ២ ដែលបណ្តាលឱ្យពួកគេបាត់បង់ជីវិតភ្លាមៗនៅកន្លែងកើតហេតុ។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកបានឱ្យដឹងថាជនដៃដល់មានគ្នា ៣ នាក់និងបានបន្លំខ្លួនធ្វើជាអ្នកកាសែតដើម្បីចូលទៅទីនោះ។ស្របពេលជាមួយគ្នានោះដែរសមត្ថកិច្ចចាប់បានជនសង្ស័យម្នាក់ភ្លាមៗនិង២ នាក់ទៀតកំពុងរត់គេចខ្លួន។
ក្រោយការធ្វើឃាតទៅលើបុរសទាំង២នេះរដ្ឋាភិបាលនៃរដ្ឋ Uttar Pradesh ប្រទេសឥណ្ឌាបានចេញសេចក្តីប្រកាសរារាំងការប្រមូលផ្តុំគ្នាជាហ្វូងដោយលោកបារម្ភពីការកើនឡើងនៃចលាចលនិងអំពើហិង្សានៅទូទាំងរដ្ឋទាំងមូល។
ក្នុងនោះផងដែរមន្ត្រីប៉ូលិសជាន់ខ្ពស់ម្នាក់បាននិយាយថា៖ «រដ្ឋាភិបាលបានដាក់បញ្ជារឹតបន្តឹងបន្ទាប់ពីការសម្លាប់លោក Atiq Ahmed និងលោក Ashraf Ahmed ដែលជាសមាជិកនៃក្រុមម៉ាហ្វីយ៉ាដ៏ធំដែលពាក់ព័ន្ធនឹងការរំលោភដីធ្លីនិងក្នុងសំណុំរឿងឃាតកម្ម» ។
លោកបានបន្ថែមទៀតថា៖ «យើងមិនចង់ឱ្យទម្រង់នៃការតវ៉ាណាមួយក្លាយទៅជាភាពវឹកវរចលាចលនោះទេ»។
គួរឱ្យដឹងផងដែរថា កាលពីសប្តាហ៍មុនក្រុមប៉ូលិសបានសម្លាប់កូនប្រុសរបស់លោក Atiq Ahmed ក្នុងទីក្រុងJhansi ជុំវិញករណីឃាតកម្មនិងការពាក់ព័ន្ធជាមួយនឹងក្រុមឧក្រិដ្ឋកម្មម៉ាហ្វីយ៉ាដែលកំពុងមានប្រតិបត្តិការយ៉ាងធំនៅក្នុងរដ្ឋ Uttar Pradesh។
សូមរំឭកផងដែរថាកាលពី៦ឆ្នាំមុនប៉ូលិសឥណ្ឌាបានបាញ់សម្លាប់ក្រុមឧក្រិដ្ឋកម្មជាង១៨០នាក់អំឡុងពេលពេលប៉ះទង្គិចគ្នាមួយ។
ប្រធានគណបក្សប្រឆាំង Samajwadi លោក Akhilesh Yadav បានរិះគន់ការបាញ់សម្លាប់អតីតសមាជិកសភាថាជាការបរាជ័យរបស់គណបក្សកាន់អំណាចBharatiya Janata ក្នុងការនាំយកច្បាប់និងសណ្តាប់ធ្នាប់ជូនទៅដល់ប្រជាពលរដ្ឋក្នុងរដ្ឋ Uttar Pradesh៕
