ឥស្សរជនប្រឆាំងរុស្សី លោក Vladimir Kara Murza។ AFP
សកម្មជនប្រឆាំងនឹងរដ្ឋាភិបាលរុស្សីលោក Vladimir Kara Murza កាលពីថ្ងៃទី១៧ ខែមេសា ត្រូវបានកាត់ទោសឱ្យជាប់ពន្ធនាគាររយៈពេល ២៥ ឆ្នាំ និងពិន័យជាទឹកប្រាក់ជាង ៤ ០០០ ដុល្លារ ក្រោយការរិះគន់របស់ខ្លួនទៅ លើសង្គ្រាមលុកលុយអ៊ុយក្រែន។
អតីតអ្នកកាសែតនិងអ្នកនយោបាយជនជាតិរុស្សី-អង់គ្លេស លោក Kara Murza អាយុ ៤១ ឆ្នាំជាគូប្រជែងជាមួយនឹងប្រធានាធិបតីរុស្ស៊ី លោក វ្ល៉ាឌីមៀរ ពូទីន ត្រូវបានចោទប្រកាន់ពីបទក្បត់ជាតិផ្សព្វផ្សាយព័ត៌មានមិនពិតពីកងទ័ពរុស្សីនិងជាប់ពាក់ព័ន្ធអង្គការបរទេសខាងក្រៅ។ កាលពីសប្តាហ៍មុន លោកបានបង្ហោះសារជាសុន្ទរកថា នៅលើប្រព័ន្ធផ្សព្វផ្សាយមួយថា ៖ «ខ្ញុំដឹងថាថ្ងៃណាមួយភាពងងឹតដែលលេបត្របាក់ប្រទេសរបស់យើងនឹងបានធូរស្រាល។សង្គមរបស់យើងនឹងបើកភ្នែកឡើងវិញហើយពិចារណាទៅលើឧក្រិដ្ឋកម្មអ្វីដែលខ្លួនបានប្រព្រឹត្ត»។
ការកាត់ទោសរយៈពេល ២៥ ឆ្នាំ របស់លោក Kara គឺជាទោសរយៈពេលវែងបំផុតមួយ បើប្រៀបធៀបទៅនឹងសកម្មជនដទៃទៀត ដែលបានចាប់ខ្លួនចាត់តាំងពីសង្គ្រាមអ៊ុយក្រែន បានចាប់ផ្តើម។
ការកាត់ទោសដ៏តឹងតែងនេះ ជាសញ្ញាមួយដែលកំពុងបង្ហាញពីសកម្មភាពនយោបាយនៅក្នុងប្រទេសរុស្ស៊ី នាពេលបច្ចុប្បន្ននេះ ដែលអាជ្ញាធរមិនត្រឹមតែបានប្តេជ្ញាចិត្តដើម្បីបំបិទមាត់អ្នករិះគន់ប៉ុណ្ណោះទេ ប៉ុន្តែថែមទាំងព្យាយាមលុបបំបាត់នូវអ្វីៗទាំងអស់ ដែលពួកគេជឿថា ផ្តល់ការគំរាមកំហែងដល់ប្រព័ន្ធនយោបាយផងដែរ។
ក្នុងអំឡុងពេលសវនាការលើលោក Kara មានសារព័ត៌មានបរទេសយ៉ាងច្រើនរួមមាន BBC ផងដែរមិនត្រូវបានអនុញ្ញាតឱ្យចូលទៅក្នុងបន្ទប់ទេ ដោយអាជ្ញាធររុស្ស៊ី កំណត់ត្រឹមតែអ្នកកាសែតមួយចំនួនតូចរបស់រដ្ឋាភិបាលរុស្ស៊ី និងក្រុមគ្រួសាររបស់ចុងចោទប៉ុណ្ណោះ ដែលបានអនុញ្ញាតឱ្យចូលសវនាការ។
ផ្ទុយទៅវិញអ្នកយកព័ត៌មាន និងឯកអគ្គរដ្ឋទូតបរទេសបានប្រមូលផ្តុំគ្នានៅក្នុងបន្ទប់ដាច់ដោយឡែកមួយដើម្បីមើលដំណើរការកាត់ក្តីតាមរយៈកញ្ចក់ទូរទស្សន៍។
មេធាវីរបស់លោក Kara អ្នកនាង Maria Eismon បានប្រាប់ទៅដល់អ្នកសារព័ត៌មាន នៅខាងក្រៅតុលាការថា ការកាត់ទោសទៅលើលោក Kara ពិតជាគួរឱ្យខ្លាចហើយបានបន្ថែមទៀតថា លោក Kara Murza នឹងទទួលខុសត្រូវទៅលើអ្វីដែលខ្លួនបានប្រព្រឹត្ត។
សូមរំឭ កផងដែរថាលោក KaraMurza ធ្លាប់បានដើរតួយ៉ាងសំខាន់ក្នុងការបញ្ចុះបញ្ចូលរដ្ឋាភិបាលលោកខាងលិចឱ្យដាក់ទណ្ឌកម្មមន្ត្រីរុស្ស៊ីចំពោះការរំលោភសិទ្ធិមនុស្សនិងអំពើពុករលួយ។
សូមបញ្ជាក់ថា លោក Kara-Murza ជាសកម្មជនម្នាក់ដែលមកពីគ្រួសារអ្នកប្រឆាំងសូវៀតដ៏ល្បីល្បាញមួយ។ គាត់បានចាប់ផ្តើមអាជីពជាអ្នកសារព័ត៌មាន មុនពេលក្លាយជាទីប្រឹក្សារបស់លោក Boris Nemtsov ដែលជាមេដឹកនាំបក្សប្រឆាំង និងជាអ្នកនយោបាយដ៏លេចធ្លោម្នាក់ទៀតរបស់រុស្ស៊ី ដែលត្រូវបានបាញ់សម្លាប់នៅទីក្រុងម៉ូស្គូ ក្នុងឆ្នាំ២០១៥៕
