រដ្ឋមន្ត្រី​ការបរទេស​ចិន​លោក ឈីន ហ្គាំង (Qin Gang) បាននិយាយ​នៅថ្ងៃ​សុក្រ ទី២១ មេសា​នេះ​ថា​ផ្នែក​ទាំងពីរ​នៃ​ច្រក​សមុទ្រ​តៃវ៉ាន់​គឺជា​កម្មសិទ្ធិ​របស់​ចិន ហើយ​ថា​វាជា​រឿង​ត្រឹមត្រូវ និង​សមរម្យ​សម្រាប់​ទីក្រុង​ប៉េកាំង​ក្នុង​ការថែរក្សា​អធិបតេយ្យភាព​របស់​ខ្លួន។

លោក ឈីន បានលើក​ឡើង​បែប​នេះ​នៅ​ឯវេទិកា “Lanting” ក្នុង​ទីក្រុង​សៀងហៃ​ជាកន្លែង​ដែលលោក​បានជជែក​ពិភាក្សា​អំពី​ប្រធានបទ​ជាច្រើន​មានតាំង​ពី​បញ្ហា​បំណុល សេដ្ឋកិច្ច​ពិភពលោក និង​សំណុំ​រឿង​តៃវ៉ាន់។

លោកបាន​និយាយ​ថា៖ “ថ្មីៗ​នេះ មាន​ការលើកឡើង​មិន​សមហេតុផល​ដែលចោទប្រកាន់​ចិន​ថា​ជាអ្នក​ធ្វើ​ឱ្យ​ស្ថានភាព​បច្ចុប្បន្ន​ច្របូកច្របល់ រំខាន​ដល់​សន្តិភាព និង​ស្ថិរភាព​នៅ​ទូទាំង​ច្រក​សមុទ្រ​តៃវ៉ាន់។ “ពាក្យ​សម្តី​នេះ​មិនទំនង​ទាល់តែ​សោះ ហើយ​ជាការសន្និដ្ឋាន​គ្រោះថ្នាក់”។

សម្រាប់​លោក​រដ្ឋមន្ត្រី​ការបរទេស​ចិន គឺ​កង​កម្លាំង​បំបែក​ខ្លួន​ឯករាជ្យ​របស់​តៃវ៉ាន់ និង​ប្រទេស​មួយចំនួន​ផ្សេងទៀត​ទៅវិញ​នោះទេ​ដែល​ព្យាយាម​បង្អាក់​រំខាន​ដល់​ស្ថានភាព​បច្ចុប្បន្ន។ លោកបាន​សង្កត់ធ្ងន់​ទៀត​ថា​អ្នកដែល​លេង​ភ្លើង​ក្នុង​សំណុំ​រឿង​តៃវ៉ាន់ នៅទីបំផុត​ទៅ​នឹង​ឆេះ​ខ្លួនឯង​ជាមិនខាន​ឡើយ។

គួរជ្រាប​ថា កាលពី​ពេលថ្មីៗ​នេះ ប្រទេស​ចិន​បាន​ធ្វើ​សមយុទ្ធ​យោធា​នៅជុំវិញ​កោះ​តៃវ៉ាន់ នៅបន្ទាប់​ពី​ប្រធានាធិបតី​តៃវ៉ាន់​លោកស្រី សៃ អ៊ីងវេន បានវិលត្រឡប់​មក​ដល់​ទីក្រុង​តៃប៉ិ​វិញក្រោយ​បានចូលរួម​ក្នុងកិច្ចប្រជុំ​មួយ​នៅឯ​ទីក្រុង Los Angeles ជាមួយ​នឹង​ប្រធាន​សភា​តំណាង​សហរដ្ឋ​អាមេរិក​លោក Kevin McCarthy។

ចិន​ដែលចាត់ទុក​កោះតៃវ៉ាន់​ថា​ជាទឹកដី​របស់​ខ្លួន តែងតែ​ថ្កោលទោស​ចំពោះ​រាល់កិច្ច​ប្រជុំ​កម្រិត​ខ្ពស់​រវាង​មេដឹកនាំ​និង​មន្ត្រី​បរទេស​ជាមួយនឹង​ថ្នាក់​ដឹកនាំ​តៃវ៉ាន់៕​