ទីក្រុងប៉េកាំង​បាន​និយាយ​នៅថ្ងៃចន្ទ​ ទី ២៤​ មេសានេះ​ថា​ ចិន​គោរព​ឋានៈ​ជារដ្ឋ​អធិបតេយ្យ​នៃបណ្តាប្រទេស​អតីត​សហភាព​សូវៀត​ទាំងអស់​។ ​ការ​លើកឡើង​បែបនេះ​ធ្វើឡើង​បន្ទាប់​ពី​ឯក​អគ្គ​រដ្ឋទូត​របស់​ទីក្រុងប៉េកាំង​ប្រចាំ​ប្រទេស​បារាំង​បាន​បង្កឱ្យមាន​ការផ្ទុះ​កំហឹង​នៅ​អឺរ៉ុប​ដោយ​ការចោទ​ជា​សំណួរ​អំពី​អធិប​តេយ្យភាព​របស់​ប្រទេស​ទាំងនោះ។

អ្នក​នាំ​ពាក្យ​ក្រសួង​ការ​បរទេស​ចិនលោកស្រី​ ម៉ៅ នីង​(Mao Ning)បាន​ប្រាប់​ក្រុម​អ្នក​យក​ព័ត៌មានថា​៖ «ប្រទេសចិន​ គោរព​ឋានៈជា​រដ្ឋ​អធិបតេយ្យ​របស់​បណ្តា​ប្រទេស​អតីតសូវៀត​ បន្ទាប់ពី​ការ​ដួលរលំ​នៃ​សហភាព​សូវៀត»​។

គួរបញ្ជាក់ជូនថា​ ឯក​អគ្គរដ្ឋទូតចិន​ប្រចាំ​ប្រទេស​បារាំង​លោក ​លូហ្សេ (Lu Shaye)​កាល​ពីសប្តាហ៍​មុន​បាន​បង្កឱ្យ​មានការ​ខឹងសម្បា​នៅ​ទូទាំង​អឺរ៉ុប​បន្ទាប់​ពី​លោក​បាន​លើក​ឡើងថា​ប្រទេស​ដែល​កកើត​ក្រោយ​ការ​ដួលរលំ​នៃ​សហ​ភាព​សូវៀត​គ្មាន​ស្ថានភាព​សមស្រប​ក្រោម​ច្បាប់​អន្តរជាតិ​ទេ​ពីព្រោះ​ថា​មិនមាន​កិច្ច​ព្រមព្រៀង​អន្តរជាតិ​ណា​មួយ​បញ្ជាក់​ពី​ឋានៈ​របស់​ពួកគេជា​ប្រទេស​អធិបតេយ្យ​ឡើយ។

លោក ​ហ្សូសេព​បូរែល​ ប្រមុខ​ការ​ទូតអឺរ៉ុប​ បាន​និយាយថា​ការ​លើកឡើង​របស់​មន្ត្រី​ចិន​នេះ​ជា​រឿង​មិន​អាច​​ទទួលយក​បានឡើយ​។ លោក​ប្រមុខ​ការទូត​អឺរ៉ុប​ ថែមទាំង​បាន​សរសេរ​នៅ​ក្នុង​សារ​ធ្វីត​ដែរថា​​ សហភាព​អឺរ៉ុប​គ្រាន់តែ​អាច​គិតថា​ការ​ប្រកាស​បែបនេះ​ មិន​តំណាងឱ្យ​គោល​នយោបាយ​ផ្លូវការ​របស់​ប្រទេស​ចិន​ឡើយ។

ចំណែក​ទីក្រុង​ប៉េកាំងវិញ​ នៅ​ថ្ងៃចន្ទនេះ​បាន​បង្ហាញ​ពីជំហរ​មិន​ជាប់ពាក់ព័ន្ធ​នឹង​ការ​កត់​សម្គាល់​របស់លោកលូ ​ឡើយ ​ហើយ​ស្របពេល​ជា​មួយគ្នានេះ​ចិន​ក៏​បាន​ការពារ​គោល​ជំហរ​អព្យាក្រឹត​របស់​ខ្លួន​ទាក់ទង​នឹង​សង្រ្គាម​របស់​រុស្ស៊ី​នៅ​អ៊ុយក្រែន​ផងដែរ៕