សមាជិកនៃកងកម្លាំងប្រដាប់អាវុធចែកស្ករសូកូឡាដល់ពលរដ្ឋអារ៉ាប៊ីសាអ៊ូឌីត និងជនជាតិដទៃទៀតដែលមកដល់មូលដ្ឋានទ័ពជើងទឹក King Faisal។ AFP
រដ្ឋាភិបាលរបស់ប្រទេសកាណាដាកាលពីថ្ងៃទី ២៤ ខែមេសា បាននិយាយថា ខ្លួននឹងដាក់ចេញនូវច្បាប់អន្តោប្រវេសន៍ ថ្មីមួយដើម្បីគាំទ្រជនភៀសខ្លួនពីប្រទេសស៊ូដង់ដែលកំពុងស្នាក់នៅក្នុងប្រទេសកាណាដា ជាបណ្តោះអាសន្ន ដោយសារស្ថានភាពនៅក្នុងប្រទេសកាន់តែអាក្រក់ទៅៗ។
ចាប់តាំងពីថ្ងៃទី ១៥ ខែមេសា មកប្រទេសស៊ូដង់ កំពុងស្ថិត នៅក្នុងសមរភូមិប្រយុទ្ធគ្នាដ៏ធំមួយរវាងកងកម្លាំងប្រដាប់អាវុធរបស់ខ្លួន និងក្រុមទាហានប៉ារ៉ា Rapid Support Forces ឬហៅកាត់ថា RSF។ជាលទ្ធផលការប្រយុទ្ធគ្នានេះ បានបណ្តាលឱ្យមនុស្សរាប់រយនាក់បាត់បង់ជីវិត ហេដ្ឋារចនាសម្ព័ន្ធ និងសេវាកម្មជាច្រើន ត្រូវបានបំផ្លាញ និងបានកែប្រែតំបន់លំនៅឋានប្រជាជន ឱ្យទៅជាតំបន់សង្គ្រាម។
យោងតាមសេចក្តីថ្លែងការណ៍មួយរបស់រដ្ឋាភិបាលកាណាដា បានឱ្យដឹងថា វិធានការថ្មីនេះ នឹងចាប់ផ្តើមអនុវត្តបន្ទាប់ពីត្រូវបានប្រកាសដោយរដ្ឋមន្ត្រីអន្តោប្រវេសន៍កាណាដា លោក Sean Fraser ដោយអនុញ្ញាតឱ្យជនជាតិស៊ូដង់ស្នើសុំការស្នាក់អាស្រ័យជាបណ្តោះអាសន្នក៏ដូចជានឹងទទួលបានសិទ្ធិក្នុងការសិក្សាធ្វើការឬទៅលេងក្រុមគ្រួសារដោយមិនចាំបាច់បង់ថ្លៃសេវាធ្វើដំណើរ។
ម្យ៉ាងវិញទៀតសម្រាប់ជនជាតិកាណាដាដែលកំពុងស្ថិតនៅក្នុងប្រទេសស៊ូដង់ ឬចូល សញ្ជាតិជាប្រជាជនស៊ូដង់រដ្ឋាភិបាល បានលើកឡើងថា ពួកគេទទួលបានអាទិភាពជាធំដោយមិនចាំបាច់ស្នើសុំដាក់ពាក្យត្រឡប់ទៅផ្ទះវិញនោះឡើយ។ មន្ត្រីនៃប្រទេសកាណាដា ក៏បានបន្ថែមទៀតផងដែរថា ខ្លួននឹងលើកលែងថ្លៃលិខិតឆ្លងដែន និងថ្លៃឯកសារធ្វើដំណើរអចិន្រៃ្តយ៍សម្រាប់ពលរដ្ឋ និងអ្នករស់នៅអចិន្រៃ្តយ៍នៃប្រទេសកាណាដាក្នុងប្រទេសស៊ូដង់ដែលមានបំណងចង់ចាកចេញ។
សូមបញ្ជាក់ឱ្យដឹងផងដែរថា កាលពីថ្ងៃចន្ទ សហរដ្ឋអាមេរិក បាននិយាយថា ក្រុមទាហាន ដែលកំពុងធ្វើសង្គ្រាមនៅក្នុងប្រទេសស៊ូដង់មិនយល់ព្រមគោរពតាមសេចក្តីព្រមព្រៀងឈប់បាញ់រយៈពេល ៧២ ម៉ោងនោះទេ ខណៈពេលដែលប្រទេសលោកខាងលិចអារ៉ាប់ និងអាស៊ី កំពុងនាំគ្នាសម្រុកជម្លៀសពលរដ្ឋរបស់ខ្លួនចេញពីទីនោះ។
ជាមួយគ្នានោះដែរ ប្រទេសកាណាដានឹងផ្អាកប្រតិបត្តិការជាបណ្តោះអាសន្នក្នុងប្រទេសស៊ូដង់ហើយសម្រាប់អ្នកការទូត នឹងត្រូវបំពេញការងារជាធម្មតានៅក្នុងទីតាំងណាមួយដែលមានសុវត្ថិភាពខាងក្រៅប្រទេស៕
