ក្រុមអ្នកជួយសង្គ្រោះដែលកំពុងធ្វើការលើគំនរបាក់បែកនៃអគារលំនៅឋានដែលរងការខូចខាតពីការវាយប្រហារដោយមីស៊ីលនៅជាយក្រុង Dniproកាលពីថ្ងៃទី៣ ខែមិថុនា។ AFP
ការវាយប្រហារផ្លូវអាកាស បានត្រូវចំសង្កាត់លំនៅឋានមួយក្នុងទីក្រុង Dnipro ភាគកណ្តាលនៃប្រទេសអ៊ុយក្រែន កាលពីយប់ថ្ងៃសៅរ៍ ដោយបានបណ្តាលឱ្យមនុស្សចំនួន ២០នាក់ រងរបួស និងក្មេង៣នាក់ ស្ថិតក្នុងស្ថានភាពធ្ងន់ធ្ងរ។
លោកប្រធានាធិបតី វ៉ុលឌីមៀរ ហ្សេលេនស្គី បានស្តីបន្ទោសរុស្ស៊ីចំពោះការវាយប្រហារ ដោយនិយាយថា មនុស្សកាន់តែច្រើន បានជាប់នៅក្រោមបំណែកយន្តហោះ។
ការវាយប្រហារផ្លូវអាកាសរបស់រុស្សីលើអ៊ុយក្រែន បានផ្ទុះឡើងក្នុងប៉ុន្មានសប្តាហ៍ថ្មីៗនេះ ដូចជាមានការញុះញង់ក្នុងទិសដៅផ្ទុយ។
ទីក្រុងកៀវ បាននិយាយជាច្រើនខែហើយថា ខ្លួនកំពុងរៀបចំសម្រាប់ការវាយលុកទ្រង់ទ្រាយ ធំមួយប្រឆាំងនឹងកងកម្លាំងកាន់កាប់របស់ទីក្រុងម៉ូស្គូ ខណៈដែលខ្លួនមានផែនការ ទាមទារយកមកវិញនូវទឹកដីដែលបាត់បង់ចាប់តាំងពីប្រទេសរុស្ស៊ី បានលុកលុយក្នុងខែកុម្ភៈ ឆ្នាំ ២០២២។
លោកប្រធានាធិបតី បាននិយាយថា ការវាយប្រហារកាលពីថ្ងៃសៅរ៍ បានប៉ះពាល់ដល់អគារលំនៅឋាន ចំនួន២។
លោកហ្សេលេនស្គី បានបង្ហោះនៅលើហ្វេសប៊ុកកាលពីថ្ងៃសៅរ៍ថា៖«ជនជាតិរុស្ស៊ី បានវាយប្រហារទីក្រុង»។ «ការវាយប្រហារនោះ បានត្រូវចំចន្លោះអគារលំនៅឋាន២ជាន់។ ជាអកុសល មានមនុស្សនៅក្រោមគំនរបាក់បែក»។
វីដេអូដែលបង្ហោះដោយហ្សេលេនស្គី បានបង្ហាញពីអ្នកជួយសង្គ្រោះដែលកំពុងស្វែងរកអគារដែលត្រូវបានបំផ្លាញ។
លោក Serhiy Lysak អភិបាលនៃតំបន់ Dnipropetrovsk បាននិយាយថា៖«ក្មេង ៥នាក់ ត្រូវបានរងរបួសដោយសត្រូវនៅក្នុងសហគមន៍ Pidhorodnenska។
ស្ថានភាពក្មេងប្រុសទាំង៣ នាក់ឥឡូវ ត្រូវបានគ្រូពេទ្យវាយតម្លៃថា ធ្ងន់ធ្ងរ។ពួកគេកំពុងស្ថិតក្នុងបន្ទប់វះកាត់»។
លោកបានបន្ថែមថា៖«ចំនួនអ្នករងរបួសសរុប បានកើនឡើងដល់ ២០នាក់ហើយក្នុងនោះ ១៧នាក់ កំពុងសម្រាកព្យាបាល នៅមន្ទីរពេទ្យ»។
នៅក្រោមគំនរបាក់បែកនៃផ្ទះមួយខ្នង អ្នកជួយសង្គ្រោះនៅតែបន្តស្វែងរកមនុស្ស ប្រហែលជាមានក្មេងនៅទីនោះ។
អភិបាលតំបន់ បាននិយាយកាលពីថ្ងៃសៅរ៍ផងដែរថា ការបាញ់ផ្លោងរបស់អ៊ុយក្រែនបានបណ្តាលឱ្យ មនុស្ស២ នាក់ស្លាប់នៅក្នុងតំបន់ Belgorod របស់ប្រទេសរុស្ស៊ី ជាតំបន់ព្រំដែនដែលត្រូវបានវាយប្រហារដោយការវាយ ប្រហារម្តងហើយម្តងទៀតក្នុងសប្តាហ៍នេះ។
ភូមិនៅតាមព្រំដែន Belgorod ត្រូវរងការវាយប្រហារដោយការបាញ់ផ្លោងមិនធ្លាប់មានពីមុនមក ហើយការស្លាប់ចុងក្រោយនេះ បានធ្វើឱ្យចំនួនអ្នកស្លាប់សរុបកើនឡើងដល់ ៧នាក់ ក្នុងសប្តាហ៍នេះ៕
