លោកប្រធានាធិបតី អ៊ូហ្គង់ដា Yoweri Museveni បាននិយាយថា កងកម្លាំងរក្សាសន្តិភាពអ៊ូហ្គង់ដា ប្រហែល ៥៤នាក់ បានស្លាប់នៅពេលដែលក្រុម សកម្មប្រយុទ្ធបានឡោមព័ទ្ធមូលដ្ឋានសហភាពអាហ្រ្វិកក្នុងប្រទេសសូម៉ាលីកាលពីសប្តាហ៍មុននេះ ជាក្នុងការវាយប្រហារនាពេលថ្មីៗនេះដ៏អាក្រក់បំផុតមួយដោយក្រុមជីហាដ Al-Shabaab។
លោក Museveni បាននិយាយនៅក្នុងការបង្ហោះនៅលើគណនីTwitter ផ្លូវការរបស់លោក កាលពីល្ងាចថ្ងៃសៅរ៍ថា៖«យើងបានរកឃើញសាកសពទាហានចំនួន ៥៤នាក់ ក្នុងនោះមានមេបញ្ជាការម្នាក់»។
ក្រុម Al-Shabaab ដែលបានធ្វើការបះបោរយ៉ាងសាហាវប្រឆាំងនឹងរដ្ឋាភិបាលកណ្តាលដ៏ផុយស្រួយរបស់សូម៉ាលីអស់រយៈពេលជាង១ទសវត្សរ៍ បានអះអាងទទួលខុសត្រូវចំពោះការវាយប្រហារ កាលពីថ្ងៃទី ២៦ ឧសភា ដោយនិយាយថា ខ្លួនបានវាយលុកមូលដ្ឋានទ័ព។
អ្នកស្រុកនិងមេបញ្ជាការយោធាសូម៉ាលី បានប្រាប់សារព័ត៌មានAFPថា ក្រុមសកម្មប្រយុទ្ធ បានបើកឡាន ដែលផ្ទុកសារធាតុផ្ទុះចូលទៅក្នុងមូលដ្ឋាននៅ Bulo Marer ចម្ងាយ១២០គីឡូម៉ែត្រ ភាគនិរតីនៃរដ្ឋធានី Mogadishu ដែលនាំឱ្យមានការប្រយុទ្ធគ្នាដោយកាំភ្លើង។
ចំនួននេះ គឺជាចំនួនដ៏ច្រើនបំផុត ចាប់តាំងពីកងកម្លាំងគាំទ្ររដ្ឋាភិបាលគាំទ្រដោយកងកម្លាំង AU ដែលគេ ស្គាល់ថា ATMIS បានបើកការវាយលុកកាលពីខែសីហា ឆ្នាំមុន ប្រឆាំងនឹងក្រុមAl-Shabaab។
នេះក៏ជាការទទួលស្គាល់ដ៏កម្រនៃចំនួនអ្នកស្លាប់ដ៏ច្រើន ក្នុងចំណោមយោធាផងដែរ។
លោក Museveni បាននិយាយរួចហើយកាលពីសប្តាហ៍មុនថា ប្រតិកម្មភ័យស្លន់ស្លោដំបូងចំពោះការវាយប្រហារនេះបានរួមចំណែកដល់ចំនួនអ្នកស្លាប់នេះ។
លោក Museveni បាននិយាយនៅក្នុងសេចក្តីថ្លែងការណ៍មួយថា៖ «កំហុសនេះ បានធ្វើឡើងដោយមេបញ្ជាការ២ រូបគឺលោក Maj Oluka និង Maj Obbo ដែលបានបញ្ជាឱ្យទាហានដកថយ ដោយបន្ថែមថា ពួកគេនឹងប្រឈមមុខនឹងការចោទប្រកាន់នៅក្នុងតុលាការអាជ្ញាសឹក»។
ទោះជាយ៉ាងណាក៏ដោយ ទាហានរបស់យើងបានបង្ហាញពីភាពធន់គួរឱ្យកត់សម្គាល់និងរៀបចំខ្លួនពួកគេឡើង វិញ ដែលនាំឱ្យដណ្តើមយកបានមូលដ្ឋានមកកាន់កាប់ឡើងវិញ៕