​យោងតាម​ក្រុមមន្ត្រី​នៃ​ប្រទេស​ឥណ្ឌា​បានឱ្យដឹង​កាលពី​ថ្ងៃទី​​​​ ៣ ខែមិថុនាថា មនុស្ស​យ៉ាងហោចណាស់ ២៨៨​​​ នាក់​បាន​ស្លាប់​នៅក្នុង​ឧបទ្ទវហេតុ​រថភ្លើង​បើក​ធ្លាក់​ផ្លូវ និង​បុក​ជាមួយនឹង​រថភ្លើង​មួយ​ផ្សេងទៀត ដោយសារ​ឧបករណ៍​បញ្ជូន​សញ្ញា​មាន​បញ្ហា​ដែល​វា​ជាហេតុ​ការណ៍​ដ៏​អាក្រក់​បំផុត​មួយ របស់​ប្រទេស​ឥណ្ឌា​ក្នុង​រយៈពេល​ជាង​ ២​ ទសវត្សរ៍​ចុងក្រោយ​នេះ​។​

​រថភ្លើង​ដែល​បង្កឱ្យមាន​ឧបទ្ទវហេតុ​ដោយ​ការបើក​ធ្លាក់​ផ្លូវ​កាលពី​ថ្ងៃ​សុក្រ​នៅក្នុង​ស្រុក​បា​ឡា​ស័​រ ក្នុង​រដ្ឋ​អូ​ឌី​សា ភាគ​ខាងកើត​នៃ​ប្រទេស​ឥណ្ឌា​បាន​ជ្រុល​ទៅបុក​រះ​ទៅលើ​រថភ្លើង​ដឹកទំនិញ​ដែល​ចត​នៅក្បែរនោះ ដោយ​បង្កឱ្យមាន​ការខូចខាត​យ៉ាង​ធំធេង រហូត​មាន​អ្នកស្លាប់​ជាច្រើន​រយ​នាក់ និង​មនុស្ស​​រងរបួស​ជាង​ ៨០០ ​នាក់​។​

​លោក K. S. Anand ប្រធាន​ផ្នែក​ទំនាក់ទំនង​សាធារណៈ​នៃ​ក្រុមហ៊ុន South East Railway បាន​និយាយថា អ្នកស្លាប់​បាន​កើនឡើង​ដល់​ជិត ​៣០០ នាក់ ហើយ​សាកសព​ខ្លះ​ក៏​នៅមាន​ជាប់​នៅក្នុង​ទូរថភ្លើង​នៅឡើយ ខណៈ​ប្រតិបត្តិការ​ជួយសង្គ្រោះ​កំពុង​បន្ត បូករួម​នឹង​ចំនួន​មនុស្ស​ស្លាប់​ត្រូវបាន​គេ​រំពឹងថា​នឹង​កើនឡើង​បន្ថែមទៀត​។ នេះ​បើតាម​អ្នកតាមដាន​ព្រឹត្តិការណ៍​របស់​សារព័ត៌មាន Reuters​។​

​ការបុក​គ្នា​នេះ​បាន​កើតឡើង​នៅ​ម៉ោង​ប្រហែល​៧​យប់​កាលពី​ថ្ងៃ​សុក្រ នៅពេលដែល​រថភ្លើង Howrah Superfast Express ធ្វើដំណើរ​ចេញពី​ទីក្រុង​បេង​ហ្គា​លូ​រូ ឆ្ពោះទៅ​ហូ​រ៉ា ក្នុង​រដ្ឋ​បេង​ហ្គា​ល់​ភាគ​ខាងលិច បាន​បុក​ជាមួយ​រថភ្លើង Coromandel Express ដែល​ធ្វើ​​ដំណើរ​ពី​ទីក្រុង Kolkata ឆ្ពោះទៅ​ទីក្រុង​ចេ​ន​ណៃ​។​

​ប្រព័ន្ធ​ផ្សព្វផ្សាយ​ឥណ្ឌា​បាន​និយាយថា មន្ត្រី និង​រដ្ឋមន្ត្រី​ផ្លូវដែក​លោក Ashwini Vaishnaw បាន​អមដំណើរ នា​យក​រដ្ឋមន្ត្រី​ឥណ្ឌា​លោក Narendra Modi ដែល​ចុះ​ត្រួតពិនិត្យ​ដល់ទី​តាំង​កន្លែងកើតហេតុ បាន​ប្រាប់​ឱ្យ​អាជ្ញាធរ​មូលដ្ឋាន​ធានាថា ក្រុមគ្រួសារ​រងគ្រោះ​ទាំងអស់ នឹង​ទទួលបាន​ជំនួយ​។​

​លោក Ashwini Vaishnaw រដ្ឋ​មន្ត្រី​ផ្លូវដែក​ឥណ្ឌា បានបញ្ជាក់​ឱ្យដឹងថា​៖ «​គ្រួសារ​សព​នៃ​ឧបទ្ទវ​ហេតុនេះ​នឹង​ទទួលបាន​ជំនួយ ១​ លាន​រូពី ឬ​ ១២១៣៥​ដុល្លារ​អាមេរិក ខណៈ​អ្នករបួស​ធ្ងន់ធ្ងរ​នឹង​ទទួលបាន ២០ ​ម៉ឺន​រូពី ឬ​ជាង ២​ ពាន់​ដុល្លារ និង​ ៥ ​ម៉ឺន​រូពី ឬ​ជាង ​៦០០​ ដុល្លារ​សម្រាប់​អ្នករងរបួស​ស្រាល​។​

​យោងតាម​ក្រុមហ៊ុន Indian Railways បានឱ្យដឹង​ដែរ​ថា បណ្តាញ​រថភ្លើង​មួយ​នេះ​ជួយ​សម្រួលការ​ដឹកជញ្ជូន​មនុស្ស​ជាង​ ១៣ ​លាន​នាក់​ជា​រៀងរាល់ថ្ងៃ​តែ​ភាពផ្តាច់មុខ​ដែល​គ្រប់គ្រង​ដោយ​រដ្ឋ​មិនមាន​កំណត់ត្រា​សុវត្ថិ​ភាពល្អ​ទេ ដោយសារ តែ​ហេដ្ឋារចនាសម្ព័ន្ធ​ចាស់​រេចរឹល​។​

​ស្របពេល​ជាមួយគ្នានេះ មេដឹកនាំ​គណបក្សប្រឆាំង​លោក Jairam Ramesh បាន​ចេញមុខ​និយាយថា ឧបទ្ទវ​ហេតុនេះ​បានធ្វើឱ្យ​លោក​ដឹងថា បណ្តាញ​ផ្លូវដែក គឺជា​រឿង​អាទិភាព​ចម្បង​ជាងគេ​។​

​គួរ​បញ្ជាក់ថា ឧបទ្ទវហេតុ​រថភ្លើង​ដ៏​សាហាវ​បំផុត​របស់​ប្រទេស​ឥណ្ឌា ធ្លាប់បាន​កើតឡើង​ក្នុង​ឆ្នាំ​១៩៨១ នៅពេលដែល​រថភ្លើង​ធ្លាក់​ពីលើ​ស្ពាន​ចូលទៅក្នុង​ទន្លេ​ក្នុង​រដ្ឋ Bihar ដោយបាន​សម្លាប់​មនុស្ស​ប្រមាណ ៨០០ ​នាក់​។​

​ចំណែកឯ ឧបទ្ទវហេតុ​រថភ្លើង​កាលពី​ថ្ងៃទី​ ២ ខែមិថុនា ​កន្លងមកនេះ ​ស្ថិតនៅ​លំដាប់​ទី​៣ តែ​វា​ជា​គ្រោះថ្នាក់​អាក្រក់​បំផុត​ចាប់តាំងពី​ឆ្នាំ​ ១៩៩៥ ពោលគឺ​ពេលដែល​រថភ្លើង​ល្បឿន​លឿន ​២ ​បាន​បុក​គ្នា​នៅ​ទីក្រុង Firozabad ដោយបាន​សម្លាប់​មនុស្ស​ជាង ៣០០​ នាក់​៕