ប្រព័ន្ធផ្សព្វផ្សាយឥណ្ឌូនេស៊ីផ្សាយថា រដ្ឋាភិបាលឥណ្ឌូនេស៊ីបាននិយាយថា ខ្លួននឹងដំណើរការកម្មវិធី «ទិដ្ឋាការមាស» ដែលអនុញ្ញាតឱ្យជនបរទេសអាចស្នាក់នៅក្នុងប្រទេសរហូតដល់ ១០ ឆ្នាំ ក្នុងកិច្ចខិតខំប្រឹងប្រែងដើម្បីទាក់ទាញភ្ញៀវទេសចរ ក៏ដូចជាជំរុញកំណើនសេដ្ឋកិច្ច។
លោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិតនៃប្រទេសឥណ្ឌូនេស៊ី បានថ្លែងបន្ទាប់ពីកិច្ចប្រជុំគណៈរដ្ឋមន្ត្រីជាមួយប្រធានាធិបតី ចូកូ វីដូដូ ថា កម្មវិធីទិដ្ឋាការមាស នឹងជួយទាក់ទាញជនបរទេស និងការវិនិយោគ ដែលជាលទ្ធផលនឹងបង្កើតឱកាសការងារកាន់តែច្រើន។
លោក Sandiaga បានថ្លែងយ៉ាងដូច្នេះថា៖ «ទិដ្ឋាការមាសគឺជាគោលនយោបាយថ្មីមួយ ដែលយើងនឹងចាប់ផ្តើមក្នុងពេលឆាប់ៗនេះ ដើម្បីទាក់ទាញអ្នកមានទេពកោសល្យប្រកបដោយគុណភាពក្នុងវិស័យឌីជីថល សុខាភិបាល ការស្រាវជ្រាវ និងបច្ចេកវិទ្យា។ [គោលនយោបាយនេះ] នឹងក្លាយជាការផ្លាស់ប្តូររបត់ដែលនឹងពាំនាំជនបរទេសកាន់តែច្រើន រួមទាំងវិស័យឌីជីថល និងសហគ្រិន ឱ្យមកបណ្តាក់ទុននៅប្រទេសឥណ្ឌូនេស៊ី»។
ទោះយ៉ាងណា តម្រូវការលម្អិតដើម្បីឱ្យជនបរទេសទទួលបានទិដ្ឋាការមាស មិនទាន់ត្រូវបានចេញផ្សាយនៅឡើយទេ។ គួរគូសបញ្ជាក់ថា កម្មវិធីទិដ្ឋាការមាស នឹងក្លាយជាគំនិតផ្តួចផ្តើមទី២ ដែលរដ្ឋាភិបាលឥណ្ឌូនេស៊ីបានបង្កើតឡើងក្នុងពេលប៉ុន្មានខែថ្មីៗនេះ បន្ទាប់ពីបានដាក់ដំណើរការ កម្មវិធីទិដ្ឋាការ «ផ្ទះទី២» កាលពីខែតុលាឆ្នាំមុន។
កម្មវិធីទិដ្ឋាការ «ផ្ទះទី២» អនុញ្ញាតឱ្យជនបរទេសដាក់ពាក្យសុំសិទ្ធិស្នាក់នៅរហូតដល់ ១០ ឆ្នាំ ប្រសិនបើពួកគេមានទិដ្ឋាការស្រាប់ និងមានប្រាក់ក្នុងធនាគារ ១២៨ ៥៥៩ ដុល្លារអាមេរិក) ឬភាពជាម្ចាស់នៃគេហដ្ឋានប្រណីតៗនៅក្នុងប្រទេស៕