នាថ្ងៃសៅរ៍កន្លងទៅថ្មីៗនេះ ក្រុមអ្នកតវ៉ាបានប្រមូលផ្តុំគ្នានៅក្រុង សេអ៊ូល នៃប្រទេស កូរ៉េខាងត្បូង ដើម្បីទាមទារឱ្យរដ្ឋាភិបាលចាត់វិធានការចំពោះការបង្ហូរទឹកចេញពីរោងចក្រថាមពល នុយក្លេអ៊ែរ របស់ជប៉ុនចូលទៅក្នុងសមុទ្រ។
ការព្រួយបារម្ភបែបនេះ ដោយសារតែប្រជនជន កូរ៉េខាងត្បូង យល់ថា វាអាចជាគ្រោះមហន្ដរាយដល់មនុស្សជាតិ។
លោក Choi Kyoung-sook អ្នកឃ្លាំមើលវិទ្យុសកម្មកូរ៉េ និងជាអ្នកប្រមូលផ្ដុំក្រុមបាតុករនេះបាននិយាយថា ៖ «យើងនឹងមិនឃើញគ្រោះមហន្តរាយភ្លាមៗ ដូចជា ការរកឃើញសារធាតុវិទ្យុសកម្មនៅក្នុងអាហារសមុទ្រនោះទេ ប៉ុន្តែវាហាក់បីដូចជាជៀសមិនរួចទេ ដែលការបញ្ចេញទឹកនេះ នឹងបង្កហានិភ័យដល់ឧស្សាហកម្មនេសាទក្នុងស្រុក ដូច្នេះហើយរដ្ឋាភិបាលចាំបាច់ត្រូវរកដំណោះស្រាយ» ។
ដោយឡែក នៅក្នុងការតវ៉ារបស់ប្រជាជន កូរ៉េខាងត្បូងនេះ គឺមានមនុស្សប្រហែល ៥ម៉ឺននាក់បានចូលរួម។ ប៉ុន្តែយ៉ាងណា ប្រទេសជប៉ុន និងអង្គការវិទ្យាសាស្ត្រអះអាងថា ទឹកទាំងនោះគឺមានសុវត្ថិភាព ពោលគឺមិនប៉ះពាល់ដល់សុខភាពមនុស្សនោះទេ។ មានសុវត្ថិភាពព្រោះថា ជប៉ុនបានប្រើប្រាស់ឧបករណ៍សម្រាប់ត្រងសារធាតុវិទ្យុសកម្មចេញ ដោយបន្សល់ទុកតែសារធាតុដែលពិបាកបំបែកប៉ុណ្ណោះ។
ម្យ៉ាងទៀត ទីភ្នាក់ងារជលផលជប៉ុនបាននិយាយកាលពីថ្ងៃសៅរ៍ដែរថា ត្រីដែលបានសាកល្បងក្នុងទឹកជុំវិញរោងចក្រនោះមិនមានផ្ទុកនូវសារធាតុពុលក្នុងកម្រិតណាមួយនោះទេ។
ទាក់ទិននឹងចំណុចនេះដែរ ប្រទេស កូរ៉េខាងត្បូង បាននិយាយថា ខ្លួនក៏មិនបានមើលឃើញពីបញ្ហាខាងវិទ្យាសាស្ត្រលើការបង្ហូរទឹកនេះដែរ ប៉ុន្តែសកម្មជនបរិស្ថានអះអាងថា ប្រទេស ជប៉ុន នៅមិនទាន់បានសិក្សាអំពីផលប៉ះពាល់គ្រប់ជ្រុងជ្រោយនៅឡើយទេ។
គួរបញ្ជាក់ថា ប្រទេសជប៉ុន បាននិងកំពុងបូមទឹកវិទ្យុសកម្មជាងមួយលានតោនចេញពីរោងចក្រថាមពលនុយក្លេអ៊ែរ Fukushima Daiichi ខណៈដែលអាងស្តុកទឹកនៅក្នុងរោងចក្រនេះពេញ ហើយដែលត្រូវការរំដោះទឹកចេញ។
ក្នុងការបង្ហូរទឹកទាំងនេះចូលទៅសមុទ្រភាគខាងជើងនៃទីក្រុង តូក្យូ ជប៉ុនបានប្រើប្រាស់ឧបករណ៍ក្នុងការបំបែកសារធាតុពុល ទាំងឡាយដែលអាចប៉ះពាល់ដល់បរិស្ថាន និង សុខភាពមនុស្ស។
ប៉ុន្តែយ៉ាងណាក៏ដោយ ឧបករណ៍ទាំងនោះក៏នៅតែមិនអាចបំបែកសារធាតុ Tritium ដែលជាសារធាតុមានកម្រិតប៉ះពាល់ទាប។
នៅក្នុងអត្ថបទវិទ្យាសាស្ត្រអាមេរិកដែលបានចេញផ្សាយក្នុងឆ្នាំ ២០១៤ បាននិយាយថា ការបរិភោគទឹក ឬត្រីដែលមានសារធាតុ Tritium លើសកម្រិត វាអាចបង្កើនហានិភ័យនៃជំងឺមហារីក៕
