លោក Viktor Sokolov ជាមេបញ្ជាការកងទ័ពជើងទឹករុស្ស៊ីប្រចាំសមុទ្រខ្មៅ ដែលអ៊ុយក្រែងអះអាងថា បានសម្លាប់កាលពីសប្តាហ៍មុន។ Sniptool
សេចក្តីរាយការណ៍របស់ទីភ្នាក់ងារព័ត៌មានរ៉យទ័រនៅមុននេះ បានអះអាងថា លោក Viktor Sokolov ជាមេបញ្ជាការកងទ័ពជើងទឹករុស្ស៊ីប្រចាំសមុទ្រខ្មៅ និងជាមន្ត្រីកងទ័ពជើងទឹកជាន់ខ្ពស់បំផុតរបស់រុស្ស៊ី ត្រូវបានគេថតបានចូលរួមក្នុងសន្និសីទវីដេអូមួយនៅថ្ងៃអង្គារ ដែលជារយៈពេលមួយថ្ងៃបន្ទាប់ពីកងកម្លាំងពិសេសអ៊ុយក្រែនបាននិយាយថា ពួកគេបានសម្លាប់មេបញ្ជាការរូបនេះ។
នៅក្នុងរូបថតដែលចេញផ្សាយដោយក្រសួងការពារជាតិរុស្ស៊ី លោក Sokolov ត្រូវបានបង្ហាញជាក់ស្តែងចូលរួមក្នុងសន្និសីទវីដេអូជាមួយរដ្ឋមន្ត្រីក្រសួងការពារជាតិលោក Sergei Shoigu និងឧត្តមនាវី និងមេទ័ពកំពូលផ្សេងទៀត។
កងកម្លាំងពិសេសរបស់អ៊ុយក្រែនបាននិយាយកាលពីថ្ងៃចន្ទថា ពួកគេបានសម្លាប់លោក Sokolov ដែលជាឧត្តមនាវីកំពូលរបស់ទីក្រុងម៉ូស្គូនៅ គ្រីមា (Crimea) រួមជាមួយនឹងមន្ត្រីចំនួន៣៣នាក់ផ្សេងទៀតនៅក្នុងការវាយប្រហារដោយមីស៊ីលកាលពីសប្តាហ៍មុនលើទីស្នាក់ការកណ្តាលនៃកងនាវាជើងទឹកសមុទ្រខ្មៅរបស់រុស្ស៊ីនៅក្នុងកំពង់ផែ Sevastopol ៕
