លោក Manoj Pande និងលោក Randy George ប្រមុខកងទ័ពឥណ្ឌា និងអាមេរិក។ AFP
ប្រមុខកងទ័ពឥណ្ឌា ដែលជាប្រទេសលេខ១ ផ្អែកលើចំនួនប្រជាជន បាននិយាយកាលពីថ្ងៃអង្គារថា ឥណ្ឌា បានប្តេជ្ញារក្សាឥណ្ឌូប៉ាស៊ីហ្វិក ឱ្យមានសេរីភាព និងប្រកបដោយស្ថិរភាព ដែលអធិបតេយ្យភាព និងបូរណភាពទឹកដីនៃប្រទេសទាំងអស់ ត្រូវបានគោរព ខណៈការព្រួយបារម្ភជាសកលអំពីការកើនឡើងនៃឥទ្ធិពលរបស់ចិន ក្នុងតំបន់កើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។
ឥណ្ឌាដែលជាប្រទេសមហាអំណាចលេខ១ លើចំនួនប្រជាជន ជាប់ចំណាត់ថ្នាក់ទី៤ ផ្នែកសេដ្ឋកិច្ចសកល និងជាប្រទេសទើបបានបង្ហាញការជំទាស់ចំពោះប្រទេសចិន ដែលបានចេញផែនទីស្តង់ដាថ្មីមួយ ដែលក្រសោបយកទឹកដីដែលមានជម្លោះនៅតំបន់ភ្នំហិមាល័យជាមួយប្រទេសឥណ្ឌា។
ប្រមុខកងទ័ពឥណ្ឌា លោក ManojPande បានថ្លែងបែបនេះក្នុងសន្និសីទប្រធានកងទ័ពឥណ្ឌូប៉ាស៊ីហ្វិក ដែលរៀបចំដោយឥណ្ឌា និងសហរដ្ឋអាមេរិកហើយផ្តោតលើការជំរុញការទូត និងកិច្ចសហប្រតិបត្តិការយោធា ក៏ដូចជាការលើកកម្ពស់សន្តិភាព និងស្ថិរភាពនៅក្នុងតំបន់ឥណ្ឌូប៉ាស៊ីហ្វិក។
ប្រមុខកងទ័ព និងគណៈប្រតិភូមកពីប្រទេសចំនួន ៣០ កំពុងចូលរួមជំនួបរយៈពេល ២ ថ្ងៃដែលបញ្ចប់នៅថ្ងៃពុធ។
ទាំងលោក Pande និងប្រមុខកងទ័ពអាមេរិក លោក Randy George មិនបាននិយាយអំពីប្រទេសចិន ឱ្យចំៗនៅក្នុងសុន្ទរកថារបស់ពួកគេទេ។
នៅពេលសួរអំពីការពង្រីកឥទ្ធិពលរបស់ប្រទេសចិន លោក George បាននិយាយថា តំបន់ឥណ្ឌូប៉ាស៊ីហ្វិក គឺជាអាទិភាពដ៏សំខាន់សម្រាប់សហរដ្ឋអាមេរិក នេះជាមូលហេតុដែលមានវត្តមានអាមេរិក ក្នុងតំបន់ ហើយឧស្សាហ៍ធ្វើសមយុទ្ធយោធាជាងផ្នែកណាៗទាំងអស់នៅប៉ាស៊ីហ្វិក។
ចំណែកឯលោក Pande បាននិយាយថា ទស្សនវិស័យរបស់ប្រទេសឥណ្ឌា គឺផ្តោតលើការដោះស្រាយជម្លោះដោយសន្តិវិធី ចៀសវាងការបង្ខិតបង្ខំ និងការប្រកាន់ខ្ជាប់នូវច្បាប់អន្តរជាតិ។
លោកបានបន្ថែមថា បន្ថែមពីលើបញ្ហាប្រឈមក្នុងសន្តិសុខដែនសមុទ្រតំបន់ឥណ្ឌូប៉ាស៊ីហ្វិក ក៏ប្រឈមមុខនឹងបញ្ហាសន្តិសុខ និងបញ្ហាមនុស្សធម៌លើដីគោក រួមទាំងជម្លោះដែនដី និងលើកោះសិប្បនិមិត្ត ដែលមានមូលដ្ឋានទ័ព។ ត្រង់ចំណុចនេះ លោកចង់សំដៅលើការធ្វើយោធាកម្មលើកោះផ្សេងៗរបស់ប្រទេសចិន ជាពិសេសនៅសមុទ្រចិនខាងត្បូង។
ការទាមទារទឹកដីរបស់ចិននៅសមុទ្រចិនខាងកើត និងសមុទ្រចិនខាងត្បូង បានធ្វើឱ្យប្រទេសជិតខាងជុំវិញសមុទ្រចិនខាងត្បូងនៅអាស៊ីអាគ្នេយ៍ រួមមាន ឥណ្ឌូនេស៊ី ម៉ាឡេស៊ី ហ្វីលីពីន វៀតណាម និងប្រ៊ុយណេ ក៏ដូចជាប្រទេសជប៉ុន មានការព្រួយបារម្ភ។
ទន្ទឹមនឹងនេះទំនាក់ទំនងរវាងទីក្រុងញូវដេលី និងក្រុងប៉េកាំងបានធ្លាក់ចុះចាប់តាំងពីឆ្នាំ ២០២០ នៅពេលដែលទាហានឥណ្ឌា និងចិនបានប៉ះទង្គិចគ្នានៅតាមព្រំដែនចម្រូងចម្រាសរបស់ភាគីទាំង ២ នៅតំបន់ភ្នំហិមាល័យ (Himalayan Ladakh) ដែលបណ្តាលឱ្យទាហានឥណ្ឌា ២០ នាក់ និងចិន ៤ នាក់ បានស្លាប់៕
