ស្រ្តីម្នាក់រងរបួស អំឡុងពេលមានខ្មាន់កាំភ្លើងបាញ់សម្លាប់ ប្រធានាធិបតីអេក្វាឌ័រ លោក Fernando Villavicencio នៅទីក្រុង Quito កាលពីថ្ងៃទី ៩ ខែសីហា ឆ្នាំ ២០២៣។ រូបថត AFP
សហរដ្ឋអាមេរិក កាលពីថ្ងៃទី ២៨ ខែកញ្ញា បានប្រកាសពីការផ្តល់ប្រាក់រង្វាន់ចំនួន ៥ លានដុល្លារ សម្រាប់ប្ដូរយកព័ត៌មាននៅពីក្រោយការសម្លាប់បេក្ខជនប្រធានាធិបតីអេក្វាឌ័រ គឺលោក Fernando Villavicencio។ នេះបើតាមការបញ្ជាក់របស់រដ្ឋលេខាធិការក្រសួងការបរទេសអាមេរិក លោក អាន់តូនី ប្លីងគិន។
លោក Villavicencio ដែលជាអតីតសមាជិកសភា និងជាអ្នកប្រឆាំងអំពើពុករលួយដ៏សកម្មនោះ ត្រូវបានខ្មាន់កាំភ្លើងបាញ់សម្លាប់នៅទីក្រុង Quito កាលពីថ្ងៃទី ៩ ខែសីហា គឺពីរសប្តាហ៍មុនការបោះឆ្នោតជ្រើសរើសប្រធានាធិបតីនៅប្រទេសអេក្វាឌ័រ។ ក្រោយហេតុការណ៍នេះប៉ូលិសអេក្វាឌ័របានចាប់ខ្លួនជនសង្ស័យចំនួន ៦ នាក់ ដែលជាជនជាតិកូឡុំប៊ី និងដែលជាសមាជិកក្រុមឧក្រិដ្ឋជន។
ដោយឡែក បន្ថែមពីលើរង្វាន់ ៥ លានដុល្លារ លោក ប្លីងគិន ក៏បានប្រកាសផ្តល់រង្វាន់ ១ លានដុល្លារបន្ថែមទៀតសម្រាប់ព័ត៌មាននានាដែលអាចទាញទៅដល់ការកំណត់អត្តសញ្ញាណ ឬទីតាំងរបស់បុគ្គលណាមួយដែលទទួលខុសត្រូវចំពោះការស្លាប់របស់លោក Villavicencio។
ជាមួយនឹងការចេញជាសកម្មភាពយ៉ាងដូច្នេះ លោក ប្លីងគិន បាននិយាយនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិកនឹងបន្តគាំទ្រប្រជាជនអេក្វាឌ័រ និងធ្វើការដើម្បីនាំមករកយុត្តិធម៌ដល់បុគ្គលដែលព្យាយាមធ្វើឱ្យខូចដំណើរការប្រជាធិបតេយ្យតាមរយៈឧក្រិដ្ឋកម្មដ៏ឃោរឃៅ»។
គួរបញ្ជាក់ថា អេក្វាឌ័រ និងសហរដ្ឋអាមេរិក បានរក្សាទំនាក់ទំនងជិតស្និទ្ធដោយផ្អែកលើផលប្រយោជន៍ទៅវិញទៅមកក្នុងការថែរក្សារបបលទ្ធិប្រជាធិបតេយ្យ។ កន្លងមក ប្រទេសទាំងពីរនេះ សហការគ្នាក្នុងការធ្វើសកម្មភាពប្រយុទ្ធប្រឆាំងសារធាតុញៀនដូចជាកញ្ឆា និងកូកាអ៊ីន ការកសាងទំនាក់ទំនងពាណិជ្ជកម្ម ការវិនិយោគ និងហិរញ្ញវត្ថុ កិច្ចសហប្រតិបត្តិការក្នុងការជំរុញការអភិវឌ្ឍសេដ្ឋកិច្ចរបស់អេក្វាឌ័រ និងចូលរួមក្នុងអង្គការអន្តរអាមេរិកជាដើម។
គួររំឭកថា បេក្ខភាពប្រធានាធិបតីអេក្វាឌ័រដ៏មានប្រជាប្រិយភាព គឺលោក Villavicencio ត្រូវបានបាញ់សម្លាប់នៅពេលដែលលោកចាកចេញពីការជួបជុំមួយក្នុងរដ្ឋធានី Quito។
លោក Fernando Villavicencio បេក្ខភាពប្រធានាធិបតីដែលមានអាយុ ៥៩ ឆ្នាំ ជាអ្នកប្រឆាំងអំពើពុករលួយដ៏សកម្ម។
យ៉ាងណាមិញ លោកក៏ធ្លាប់បានលើកឡើងផងដែរ ពីការទទួលបានការគំរាមកំហែងដល់អាយុជីវិតក្នុងអំឡុងពេលដែលលោកកំពុងរៀបចំធ្វើយុទ្ធនាការបោះឆ្នោតនៅក្នុងទីក្រុង Quito កាលពីពេលកន្លងទៅ៕
