ភ្នំភ្លើងផ្ទុះនៅឥណ្ឌូនេស៊ី។ AFP
ក្រុមមន្ត្រីបាននិយាយថា ភ្នំភ្លើងមួយនៅភាគខាងលិចប្រទេសឥណ្ឌូនេស៊ី បានផ្ទុះឡើងកាលពីថ្ងៃទី៣ខែធ្នូ ដោយផ្ទុះផេះភ្នំភ្លើងប្រហែល ៣ គីឡូម៉ែត្រទៅលើមេឃ និងមិនទាន់មានរបាយការណ៍បឋមអំពីការខូចខាតនិងការបាត់បង់អាយុជីវិតនៅឡើយទេ។
ទីភ្នាក់ងារព័ត៌មានបារាំង AFP ស្រង់សម្តី លោក Hendra Gunawan ប្រធានមជ្ឈមណ្ឌលនៃភ្នំភ្លើង និងគ្រោះមហន្តរាយភូមិសាស្ត្ររបស់ប្រទេសឥណ្ឌូនេស៊ី ដោយអះអាងថា ផេះពីភ្នំ Marapi នៅលើកោះស៊ូម៉ាត្រាត្រូវបានគេសង្កេតឃើញនៅកម្ពស់ ៣០០០ ម៉ែត្រពីលើកំពូលភ្នំនេះ។
មិនទាន់មានរបាយការណ៍ភ្លាមៗអំពីការខូចខាតឬអ្នកស្លាប់និងរបួសបន្ទាប់ពីការផ្ទុះនៅម៉ោង ២ និង ៥៤ នាទីរសៀលនោះទេ។
លោក Gunawan បាននិយាយថា៖«កម្ពស់ផេះបាញ់ទៅលើត្រូវបានគេសង្កេតឃើញមានពណ៌ប្រផេះជាមួយនឹងអាំងតង់ស៊ីតេក្រាស់ខ្មឹកឆ្ពោះទៅទិសខាងកើត»។
ភ្នំភ្លើងដែលមានកម្ពស់ ២៨៩១ ម៉ែត្រស្ថិតក្នុងកម្រិតប្រកាសអាសន្នខ្ពស់បំផុតទីបីនៃប្រព័ន្ធ៤ ជំហានរបស់ប្រទេសឥណ្ឌូនេស៊ី ហើយអាជ្ញាធរបានដាក់តំបន់មិនរាប់បញ្ចូលជុំវិញរណ្ដៅភ្នំភ្លើង Marapi ។
លោក Gunawan បាននិយាយថា «សហគមន៍ជុំវិញភ្នំភ្លើង Marapi និងអ្នកទេសចរមិនត្រូវបានអនុញ្ញាតឱ្យឡើងភ្នំភ្លើង Marapi ក្នុងកាំបីគីឡូម៉ែត្រពីមាត់ភ្នំភ្លើង ឬកំពូលភ្នំនោះទេ»។
លោក Ahmad Rifandi មន្ត្រីនៅស្ថានីយ៍ត្រួតពិនិត្យ Mount Marapi បាននិយាយថា ភ្លៀងផេះត្រូវបានគេសង្កេតឃើញធ្លាក់ចុះយ៉ាងក្រាស់បន្ទាប់ពីការផ្ទុះ។
លោក បាននិយាយថា «សម្រាប់ភ្លៀងផេះ វាបានទៅដល់ទីក្រុង Bukittinggi» ដោយសំដៅទៅលើទីក្រុងធំទីបីនៅស៊ូម៉ាត្រាខាងលិចដែលមានប្រជាជនច្រើនជាង ១០ម៉ឺននាក់។
«គេសង្ឃឹមថាអ្នកដែលមានសកម្មភាពនៅជុំវិញភ្នំ Marapi ត្រូវពាក់មួក វ៉ែនតា និងម៉ាស»។
Mount Marapi ដែលមានន័យថា «ភ្នំភ្លើង»គឺជាភ្នំភ្លើងសកម្មបំផុតនៅលើកោះស៊ូម៉ាត្រា៕
