ប្រធានអង្គការ Interpol កាលពីថ្ងៃពុធ ទី ២៧ ខែមីនា កន្លងទៅថ្មីៗនេះបាននិយាយថា រង្វង់ឧក្រិដ្ឋកម្មរៀបចំឡើងដែលជំរុញឱ្យមានការផ្ទុះឡើងនៃការជួញដូរមនុស្ស និងមជ្ឈមណ្ឌលបោកប្រាស់តាមអ៊ីនធឺណិត ក្នុងអំឡុងពេលជំងឺរាតត្បាតកូវីត ១៩ បានពង្រីកចេញពីតំបន់អាស៊ីអាគ្នេយ៍ទៅជាបណ្តាញសកលដែលរកប្រាក់ចំណូលបានរហូតដល់ ៣ ពាន់ពាន់លានដុល្លារក្នុងមួយឆ្នាំ។
អគ្គលេខាធិការ Interpol លោក Jurgen Stock នៅក្នុងសន្និសីទសារព័ត៌មានមួយនៅឯការិយាល័យសម្របសម្រួលប៉ូលិសពិភពលោករបស់ប្រទេសសិង្ហបុរី បានឱ្យដឹងថា៖ «វាបំផុសបំផុលដោយភាពអនាមិកតាមអ៊ីនធឺណិត។ វាបំផុសគំនិតគំរូអាជីវកម្មថ្មីនេះ និងវិវត្តយ៉ាងលឿនដោយសារកូវីត ១៩។ ក្រុមឧក្រិដ្ឋជនដែលបានរៀបចំសកម្មភាពទាំងនេះ បច្ចុប្បន្ននេះពួកគេកំពុងធ្វើការក្នុងកម្រិតមួយដែលយើងនឹកស្មានមិនដល់បើប្រៀបនឹងកាលពីមួយទសវត្សរ៍មុន»។
អគ្គលេខាធិការអង្គការមួយនេះបន្តថា៖ «អ្វីដែលបានចាប់ផ្តើមដោយសារការគំរាមកំហែងឧក្រិដ្ឋកម្មក្នុងតំបន់នៅអាស៊ីអាគ្នេយ៍ ពេលនេះបានក្លាយទៅជាវិបត្តិការជួញដូរមនុស្សទូទាំងពិភពលោកដែលមានជនរងគ្រោះរាប់លាននាក់ ជាប់ខ្លួនជាមនុស្សក្នុងមជ្ឈមណ្ឌលបោកប្រាស់តាមអ៊ីនធឺណិតនិងមនុស្សខ្លះទៀតកំពុងក្លាយជាគោលដៅរបស់ពួកគេ»។
លោក Jurgen Stock បាននិយាយថាមជ្ឈមណ្ឌលបោកប្រាស់តាមអ៊ីនធឺណិតថ្មីៗ ជារឿយៗមានបុគ្គលិកដែលមិនមានឆន្ទៈដោយពួកគេត្រូវបានជួញដូរជាមួយនឹងការសន្យាទទួលបានការងារស្របច្បាប់ ក៏ប៉ុន្តែពួកគេនេះហើយបានជួយក្រុមឧក្រិដ្ឋកម្មរកចំណូលរួមទាំងពីវិធីផ្សេងទៀតដូចជាការជួញដូរគ្រឿងញៀន។ ក្នុងនោះអាជីវកម្មជួញដូរគ្រឿងញៀននៅតែចូលរួមចំណែកពី ៤០% ទៅ ៧០% នៃប្រាក់ចំណូលក្រុមឧក្រិដ្ឋជន។
លោក Stock ថា ក្រុមមនុស្សទាំងនេះជួយរកចំណូលឱ្យអាជីវកម្មឧក្រិដ្ឋកម្មរបស់ពួកគេដោយប្រើផ្លូវជួញដូរគ្រឿងញៀនរួមជាមួយនឹងការជួញដូរមនុស្សការជួញដូរអាវុធកម្មសិទ្ធិបញ្ញាផលិតផលលួចរថយន្តចោរលួចជាដើម។
ទឹកប្រាក់ចំណូលខុសច្បាប់ប្រហែល ២ ពាន់ពាន់លានដុល្លារទៅ ៣ ពាន់ពាន់លានដុល្លារ ត្រូវបានបញ្ជូនតាមរយៈប្រព័ន្ធហិរញ្ញវត្ថុពិភពលោកជារៀងរាល់ឆ្នាំ ហើយក្រុមឧក្រិដ្ឋកម្មអាចរកប្រាក់បាន ៥០ ពាន់ លានដុល្លារក្នុង ១ ឆ្នាំ។
ស្របពេលជាមួយគ្នានេះដែរលោក Stock បានកោតសរសើរប្រទេសសិង្ហបុរី ចំពោះភាពជោគជ័យរបស់ខ្លួនក្នុងការរកឃើញករណីលាងលុយកខ្វក់កាលពីឆ្នាំមុនពាក់ព័ន្ធនឹងការរឹបអូសទ្រព្យសម្បត្តិដែលមានតម្លៃជាង ៣ ពាន់លានដុល្លារសិង្ហបុរី ឬ ២.២៣ ពាន់លានដុល្លារអាមេរិក៕