នាយករដ្ឋមន្ត្រីថៃ Paetongtarn Shinawatra ជួបជាមួយមេប៉ូលិសថៃ ដើម្បីធ្វើបច្ចុប្បន្នភាពនៃការបង្ក្រាបការលក់ Vape នៅថ្ងៃទី១៤ ខែមីនា។ Paetongtarn Shinawatra via FB
នាយករដ្ឋមន្ត្រីថៃ Paetongtarn Shinawatra ប្រកាសបន្តបង្ក្រាបបារីអេឡិចត្រូនិច ឬ វ៉ែប (Vape) មិនថាអ្នកផលិត ឬអ្នកលក់នោះទេ បន្ទាប់ពីប្រតិបត្តិការជាង ២ សប្ដាហ៍ សមត្ថកិច្ចរឹបអូសវ៉ែបបានជាង ៩០ម៉ឺនដើម មានតម្លៃជាង ៣,៥លានដុល្លារ។
ថ្លែងនៅលើបណ្ដាញសង្គមនៅថ្ងៃទី១៤ ខែមីនានេះ លោកស្រី Paetongtarn បញ្ជាក់ថា ជាង២សប្ដាហ៍កន្លងទៅ បទបញ្ជាក្នុងការបង្ក្រាបវ៉ែប ត្រូវបានអនុវត្តយ៉ាងម៉ឺងម៉ាត់ ដោយតួលេខដែលបង្ក្រាបបានកាន់តែប្រសើរ ហើយគួរឲ្យពេញចិត្ត។
លោកស្រីថា ករណីល្មើសច្បាប់ចំនួន ១០៧៨ ត្រូវបានបង្ក្រាប ហើយជនសង្ស័យចំនួន ១១០៤នាក់ ត្រូវបានចាប់ខ្លួន រួមជាមួយនឹងការរឹបអូសវ៉ែបជាង ៩០ម៉ឺនដើម ដែលមានតម្លៃជិត ១១៨លានបាត ឬ ប្រមាណជាង ៣,៥លានដុល្លារ។
លោកស្រីចាត់តាំង រដ្ឋមន្ត្រីខុទ្ទកាល័យនាយករដ្ឋមន្ត្រីនិងអគ្គស្នងការប៉ូលិសថៃ ឲ្យបន្តវិធានការបង្ក្រាបនេះ និងធ្វើបច្ចុប្បន្នភាពលើលទ្ធផលដែលសម្រេចបាន ជាពិសេសការនាំចូល ការផ្គត់ផ្គង់ក្នុងស្រុក ជាពិសេសការដាក់លក់វ៉ែបនៅលើបណ្ដាញសង្គម។
លោកស្រីថា៖ «បញ្ហានេះត្រូវតែចាត់វិធានការឲ្យបានលឿន។ អ្វីដែលខ្ញុំចង់ប្រាប់ទៅរដ្ឋមន្ត្រី និងអគ្គស្នងការគឺថា វ៉ែបខ្លះមានគ្រឿងញៀន។ មនុស្សជាច្រើនប្រើវ៉ែបដែលដូចនឹងគ្រឿងញៀនដែរ ហើយវាជាការចាប់ផ្ដើមនៃការញៀនថ្នាំរបស់ក្មេងៗ។ ទាំងការជក់វ៉ែប និងការប្រើប្រាស់គ្រឿងញៀន យើងត្រូវតែបន្តវិធានការមឺងម៉ាត់ ពីព្រោះនេះជាទុកលំបាកសម្រាប់បងប្អូនយើង»។
កាលពីចុងខែកុម្ភៈ រដ្ឋាភិបាលថៃបានដាក់យុទ្ធនាការរយៈពេល ១ខែដើម្បីបង្ក្រាបទៅលើការនាំចូល និង ការលក់ដូរបារីអេឡិចត្រូនិចនេះ៕
