ប្រធានាធិបតីរុស្ស៊ី វ្លាឌឺមៀ ពូទីន បដិសេធមិនទទួលយកបទឈប់បាញ់គ្នាពេញលេញភ្លាមៗនៅអ៊ុយក្រែន ដោយយល់ព្រមត្រឹមតែឈប់វាយប្រហារទៅលើហេដ្ឋារចនាសម្ព័ន្ធថាមពលរបស់អ៊ុយក្រែន ដែលនេះគឺជាលទ្ធផលនៃកិច្ចសន្ទនាតាមទូរស័ព្ទជាមួយលោក ត្រាំ។
មេដឹកនាំរុស្ស៊ីបដិសេធមិនចុះហត្ថលេខាលើសំណើឈប់បាញ់គ្នារយៈពេល ៣០ ថ្ងៃដែលក្រុមការងាររបស់ប្រធានាធិបតីសហរដ្ឋអាមេរិក ដូណាល់ ត្រាំ បានស្នើកាលពីសប្ដាហ៍មុននៅប្រទេសអារ៉ាប៊ីសាអូឌីត ដោយដាក់លក្ខខណ្ឌថា កិច្ចឈប់បាញ់គ្នាអាចធ្វើទៅបានលុះត្រាតែជំនួយយោធា និង ការចែករំលែកព័ត៌មានចារកម្មពីរដ្ឋបរទេសបានបញ្ចប់ជាមុនសិន។
ការលើកឡើងរបស់លោក ពូទីន បែបនេះធ្លាប់ត្រូវបានសម្ព័ន្ធមិត្តអ៊ុយក្រែនគឺប្រទេសនៅទ្វីបអឺរ៉ុបបដិសេធ។ ការសន្ទនាតាមទូរស័ព្ទរវាងលោក ត្រាំ និងលោក ពូទីន មិនទទួលបានលទ្ធផលអំពីបញ្ហាអ៊ុយក្រែន ប៉ុន្តែភាគីទាំងពីរបានយល់ស្របគ្នាថា នឹងមានកិច្ចប្រជុំឆាប់ៗនេះអំពីបញ្ហានៅតំបន់មជ្ឈិមបូព៌ា។
បន្ទាប់ពីកិច្ចសន្ទនានេះ ប្រធានាធិបតីអ៊ុយក្រែនVolodymyr Zelensky និយាយថា អ៊ុយក្រែនក៏សុខចិត្តទទួលយកបទឈប់បាញ់ទៅលើហេដ្ឋារចនាសម្ព័ន្ធថាមពល ប៉ុន្តែលោកចង់ឃើញសេចក្ដីលម្អិតអំពីកិច្ចព្រមព្រៀងនេះសិន។
លោកក៏បានចោទភាគីរុស្ស៊ីថា មិនព្រមទទួលយកកិច្ចព្រមព្រៀងរយៈពេលមួយខែ បន្ទាប់ពីរុស្ស៊ីបានវាយប្រហារដោយប្រើដ្រូនទៅលើអ៊ុយក្រែន ដោយមានទាំងទៅលើមន្ទីរពេទ្យ និងកន្លែងផ្គត់ផ្គង់ថាមពល មួយចំនួនទៀត។
លោក Zelensky បង្ហោះនៅលើបណ្ដាញសង្គម X ថា៖ «ជាអកុសល មានការវាយប្រហារ ជាពិសេសទៅលើហេដ្ឋារចនាសម្ព័ន្ធស៊ីវិល។ លោក ពូទីន ពិតជាបានច្រានចោលទាំងស្រុងទៅលើសំណើឈប់បាញ់ពេញលេញ»៕
