ចំណាប់ខ្មាំងជនជាតិអាមេរិកាំងដើមកំណើតអ៊ីស្រាអែល Edan Alexander បានជួបជុំគ្រួសាររបស់គាត់ឡើងវិញក្នុងប្រទេសអ៊ីស្រាអែល បន្ទាប់ពីត្រូវបានក្រុមហាម៉ាសចាប់ឃុំខ្លួននៅហ្គាហ្សាអស់រយៈពេល ១៩ ខែ។
បុរសអាយុ ២១ ឆ្នាំរូបនេះបានបម្រើក្នុងជួរកងទ័ពអ៊ីស្រាអែលនៅតាមព្រំដែននៃតំបន់ Gaza មុនពេលដែលលោកត្រូវបានចាប់ខ្លួនដោយពួកសកម្មប្រយុទ្ធហាម៉ាសនៅថ្ងៃទី៧ ខែតុលាឆ្នាំ ២០២៣ ។
កាលពីថ្ងៃចន្ទ អ៊ីស្រាអែលបានផ្អាកប្រតិបត្តិការយោធារបស់ខ្លួននៅតំបន់ហ្គាហ្សារយៈពេលពីរ ទៅ បីម៉ោង ដើម្បីសម្រួលដល់ការផ្ទេរចំណាប់ខ្មាំង។ មន្ត្រីជាន់ខ្ពស់ក្រុមហាម៉ាស់បានប្រាប់ BBC ថា ដោះលែងនេះគឺជាកាយវិការសុច្ឆន្ទៈ និងជាផ្នែកមួយនៃកិច្ចខិតខំប្រឹងប្រែងដើម្បីសម្រេចបានកិច្ចព្រមព្រៀងបទឈប់បាញ់ថ្មី មុនពេលដំណើរទស្សនកិច្ចរបស់លោកប្រធានាធិបតីអាមេរិក ដូណាល់ ត្រាំ ទៅកាន់តំបន់មជ្ឈិមបូព៌ា។
លោក Alexander ត្រូវបានគេគិតថាជាពលរដ្ឋអាមេរិកចុងក្រោយដែលក្រុមហាម៉ាសឃុំខ្លួនដែលនៅមានជីវិត។ ប្រធានាធិបតីលោក ដូណាល់ ត្រាំ បានសម្តែងការអបអរសាទរដល់គ្រួសាររបស់លោកចំពោះការដោះលែងនេះ។
រូបភាពទូរទស្សន៍បង្ហាញពី Edan Alexander ញញឹមនៅពេលគាត់ឱបឪពុកម្តាយនិងបងប្អូនរបស់គាត់នៅឯមូលដ្ឋានយោធាអ៊ីស្រាអែល។
នៅក្នុងសេចក្តីថ្លែងការណ៍មួយ ក្រុមគ្រួសាររបស់ Edan Alexander បានថ្លែងអំណរគុណដល់ប្រធានាធិបតីសហរដ្ឋអាមេរិក ក្នុងនោះដែរក៏បានជំរុញឱ្យរដ្ឋាភិបាលអ៊ីស្រាអែល បន្តធ្វើការចរចាដើម្បីដោះលែងចំណាប់ខ្មាំងដែលនៅសល់ ៥៨នាក់ទៀត។
លោក Alexander គឺជាចំណាប់ខ្មាំងដំបូងគេដែលត្រូវបានដោះលែងដោយក្រុមហាម៉ាសចាប់តាំងពីអ៊ីស្រាអែលបានចាប់ផ្តើមការវាយលុកយោធារបស់ខ្លួនឡើងវិញនៅថ្ងៃទី១៨ ខែមីនា បន្ទាប់ពីបទឈប់បាញ់រយៈពេលពីរខែត្រូវបានបញ្ចប់។
កាលពីថ្ងៃចន្ទ លោកត្រូវបានគេឃើញពាក់ម៉ាស់ជាមួយក្រុមយុទ្ធជនហាម៉ាស ខណៈពួកគេបានប្រគល់គាត់ទៅឲ្យបុគ្គលិកកាកបាទក្រហមនៅទីក្រុង Khan Younis ភាគខាងត្បូងនៃតំបន់ Gaza។
បន្ទាប់មក លោកត្រូវបានផ្ទេរទៅអាជ្ញាធរអ៊ីស្រាអែលនៅតំបន់ហ្គាហ្សា មុនពេលត្រូវបានជួបជុំជាមួយគ្រួសាររបស់គាត់នៅភាគខាងត្បូងអ៊ីស្រាអែល។ យោធាអ៊ីស្រាអែលបាននិយាយថា ខ្លួនបានផ្តល់ច្រករបៀងសុវត្ថិភាពសម្រាប់ការដោះលែងលោក Alexander។
នាយករដ្ឋមន្ត្រីអ៊ីស្រាអែលលោក Benjamin Netanyahu បានហៅការវិលត្រឡប់របស់លោក Alexander ថា «ជាពេលវេលាដ៏រំជើបរំជួល» ហើយបានថ្លែងអំណរគុណដល់លោក ដូណាល់ ត្រាំ សម្រាប់ការគាំទ្ររបស់លោក។
លោក Netanyahu បាននិយាយថា ការដោះលែងនេះអាចធ្វើទៅបានដោយសារតែសម្ពាធយោធាលើក្រុមហាម៉ាស់ និងសម្ពាធនយោបាយដែលបានដាក់ចេញដោយប្រធានាធិបតីអាមេរិកលោក។
លោក Netanyahu បានបន្ថែមថា អ៊ីស្រាអែលមានបំណងបន្តផែនការពង្រឹងសកម្មភាពយោធារបស់ខ្លួននៅតំបន់ហ្គាហ្សា ហើយនឹងមិនមានបទឈប់បាញ់ឡើយ។
ក្រុមហាម៉ាសបាននិយាយថា ការដោះលែងលោក Alexander គឺមានបំណងជួយសម្រួលដល់កិច្ចព្រមព្រៀងមួយសម្រាប់ការបញ្ចូនជំនួយមនុស្សធម៌ចូលទៅក្នុងតំបន់នោះ។
គួរឲ្យដឹងផងដែរថា អ៊ីស្រាអែលបានបិទច្រកដឹកជញ្ចូនស្បៀងអាហារ ថ្នាំពេទ្យ និងការផ្គត់ផ្គង់មនុស្សធម៌ផ្សេងទៀតចូលទៅក្នុងតំបន់ហ្គាហ្សារយៈពេល ៧០ថ្ងៃ ដែលទីភ្នាក់ងារផ្តល់ជំនួយនិយាយថា វាជាគោលនយោបាយធ្វើឲ្យមានភាពអត់ឃ្លាន និងជាឧក្រិដ្ឋកម្មសង្គ្រាម ហើយអ៊ីស្រាអែលបានធ្វើការបន្តទម្លាក់គ្រាប់បែកពីលើអាកាស និងប្រតិបត្តិការយោធាផ្សេងទៀតនៅទីនោះតាំងពីពាក់កណ្តាលខែមីនា៕
