ប្រធានាធិបតីសហរដ្ឋអាមេរិក ដូណាល់ ត្រាំ ត្រៀមខ្លួនទទួលយកយន្តហោះដ៏ប្រណីត Boeing 747-8 តម្លៃ ៤០០លានដុល្លារ ជាអំណោយពីគ្រួសារគ្រប់គ្រងប្រទេសកាតាក្នុងដំណើរទស្សនកិច្ចរបស់លោកទៅកាន់តំបន់មជ្ឈិមបូព៌ានៅសប្តាហ៍ក្រោយ។
មន្ត្រីសហរដ្ឋអាមេរិកនិយាយថា យន្តហោះនេះអាចត្រូវបានប្តូរទៅជាយន្តហោះប្រធានាធិបតីក្នុងអាណត្តិលោក ត្រាំ។
រដ្ឋាភិបាលកាតាបាននិយាយថា ការសម្រេចចិត្តចុងក្រោយមិនទាន់ត្រូវបានធ្វើឡើងនៅឡើយទេ។ ទោះជាយ៉ាងណា លោក ត្រាំ បានការពារគំនិតនេះដែលមានន័យថា លោកនឹងទទួលយកអំណោយដ៏មានតម្លៃខ្ពស់ពីរដ្ឋាភិបាលបរទេស។
លោក ត្រាំ ថ្លែងថា ការទទួលយកយន្តហោះនេះមកជំនួស Air Force One ដោយឥតគិតថ្លៃពីប្រទេសកាតាគឺ «គ្មានអ្វីត្រូវគិតច្រើននោះទេ»។
លោកបានប្រាប់អ្នកសារព័ត៌មាននៅថ្ងៃចន្ទថា៖ «ខ្ញុំមិនដែលជាមនុស្សដែលបដិសេធការផ្តល់អំណោយបែបនេះទេ។ ខ្ញុំអាចជាមនុស្សល្ងង់ បើខ្ញុំនិយាយថាទេ យើងមិនចង់បានយន្តហោះដ៏ថ្លៃដោយឥតគិតថ្លៃនេះ»។
លោក ត្រាំ និយាយថា លោកនឹងមិនហោះហើរជាមួយយន្តហោះ Boeing 747 ដែលជាអំណោយនេះនៅពេលអាណត្តិរបស់លោកដល់ទីបញ្ចប់នោះទេ។ ផ្ទុយទៅវិញ យន្តហោះនេះនឹងត្រូវបរិច្ចាគទៅឱ្យបណ្ណាល័យប្រធានាធិបតីនាពេលអនាគត គឺស្រដៀងនឹងយន្តហោះ Boeing 707 ដែលប្រើដោយប្រធានាធិបតី Ronald Reagan ដែលត្រូវបានបញ្ឈប់ដំណើរការ និងដាក់តាំងបង្ហាញនៅសារមន្ទីរ។
អ្នករិះគន់ផែនការទទួលអំណោយនេះបារម្ភថា ការទទួលយកយន្តហោះនេះអាចប៉ះពាល់ដល់និមិត្តសញ្ញានៃអំណាចរបស់អាមេរិកជាសកល ពាក់ព័ន្ធនឹងបញ្ហាសីលធម៌ ច្បាប់ សន្តិសុខ និងការព្រួយបារម្ភផ្នែកស៊ើបការណ៍ផងដែរ។
លោក ត្រាំ ចង់យកយន្តហោះនេះមកប្រើប្រាស់ជំនួសយន្តហោះប្រធានាធិបតី Air Force One ដែលបានដាក់ប្រតិបត្តិការ ៤០ឆ្នាំមកហើយ៕
