ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថាលោកបានប្រាប់នាយកប្រតិបត្តិក្រុមហ៊ុន Apple លោក Tim Cook ថាលោកមិនចង់ឱ្យក្រុមហ៊ុនផលិតទូរស័ព្ទ iPhone ពង្រីក ផលិតកម្មរបស់ខ្លួននៅប្រទេសឥណ្ឌាទេ និងស្នើឱ្យ Apple បង្កើនការផលិតនៅសហរដ្ឋអាមេរិកជំនួសវិញ។
ការលើកឡើងរបស់លោក ត្រាំ ធ្វើឡើងបន្ទាប់ពីមានរបាយការណ៍ថាក្រុមហ៊ុន Apple កំពុងសម្លឹងមើលការរើរោងចក្រផលិតទូរស័ព្ទ iPhone របស់សហរដ្ឋអាមេរិកពីប្រទេសចិនទៅឥណ្ឌា ដើម្បីគេចពីពន្ធនាំចូលខ្ពស់របស់សហរដ្ឋអាមេរិក។
ថ្លែងក្នុងព្រឹត្តិការណ៍ជំនួញមួយនៅប្រទេសកាតាកាលពីថ្ងៃព្រហស្បតិ៍ លោក ត្រាំ បាននិយាយថា លោកបានជជែកជាមួយលោក Cook ហើយបានប្រាប់គាត់ថា៖ «មិត្តភ័ក្តិ! ខ្ញុំបានធ្វើល្អណាស់ចំពោះអ្នក … ប៉ុន្តែឥឡូវខ្ញុំឮថាអ្នកកំពុងសាងសង់រោងចក្រនៅទូទាំងប្រទេសឥណ្ឌា… ខ្ញុំមិនចង់ឱ្យអ្នកសាងសង់នៅឥណ្ឌាទេ»។
លោក ត្រាំ ទទួលស្គាល់ថា Apple មានផែនការវិនិយោគ ៥០០ ពាន់លានដុល្លារនៅសហរដ្ឋអាមេរិក ប៉ុន្តែ លោកនៅតែមិនចង់ឲ្យក្រុមហ៊ុននេះពង្រីកនៅឥណ្ឌានោះទេ។
លោក ត្រាំ អះអាងថា ឥណ្ឌាបានយល់ព្រមកិច្ចព្រមព្រៀងមួយដែលមិនយកពន្ធពីសហរដ្ឋអាមេរិកទាល់តែសោះ។ អាមេរិកបានអត់ទ្រាំជាមួយនឹងរោងចក្រទាំងអស់ដែល Apple បានសាងសង់នៅប្រទេសចិនអស់រយៈពេលជាច្រើនឆ្នាំ។ យ៉ាងណាក៏ដោយ ការអះអាងរបស់លោក ត្រាំ ដែលថា ឥណ្ឌាមិនយកពន្ធនោះត្រូវបានរដ្ឋាភិបាលឥណ្ឌាបដិសេធ។
បន្ទាប់ពីការសន្ទនានៅក្នុងព្រឹត្តិការណ៍ជំនួញនេះ លោក ត្រាំ បានអះអាងថា លោក Cook បានប្រាប់គាត់ថា Apple នឹង «បង្កើនការផលិតរបស់ពួកគេនៅសហរដ្ឋអាមេរិក»។
ក្នុងករណីដែល Apple នឹងផលិតទូរស័ព្ទ Iphone នៅសហរដ្ឋអាមេរិកមែននោះ អ្នកជំនាញព្យាករណ៍ថា តម្លៃផលិតផលរបស់ក្រុមហ៊ុន Apple នឹងឡើងថ្លៃខ្លាំង។ ភាគហ៊ុនរបស់ Apple បានធ្លាក់ចុះមកនៅត្រឹម ២១០ ដុល្លារក្នុងការជួញដូរមុនបើកទីផ្សារនៅព្រឹកថ្ងៃព្រហស្បតិ៍ គឺធ្លាក់ចុះ ១% បើធៀបនឹងតម្លៃបិទនៅថ្ងៃមុន៕
