អគារ ៣០ជាក់កំពុងសាងសង់ដែលបាក់រលំកាលពីខែមីនា។ បាងកកប៉ុស្តិ៍
តុលាការថៃបានចេញដីកាចាប់ខ្លួនមនុស្សចំនួន ១៧ ដែលជាប់ពាក់ព័ន្ធនឹងការសាងសង់អគារខ្ពស់មួយដែលបានដួលរលំក្នុងអំឡុងពេលកើតមានការរញ្ជួយដីកាលពីខែមីនា។
អគារកម្ពស់ ៣០ ជាន់ដែលកំពុងសាងសង់ដើម្បីធ្វើជាទីស្នាក់ការរដ្ឋបាលសវនកម្មរបស់រដ្ឋ បានដួលរលំនៅពេលដែលទីក្រុងបាងកកបានទទួលរងនូវឥទ្ធិពលគ្រោះរញ្ជួយដីដែលមានកម្រិត ៧.៧ រ៉ិចទ័រដែលបានវាយប្រហារប្រទេសមីយ៉ាន់ម៉ា ដែលនៅជិតខាង។
យ៉ាងណាក៏ដោយ ដីកាចាប់ខ្លួនបញ្ចេញឈ្មោះតែបុគ្គលម្នាក់ដែលជាប់ពាក់ព័ន្ធក្នុងការរចនា ការសាងសង់ និងការត្រួតពិនិត្យការសាងសង់អគារនេះ។ បុគ្គលនោះគឺលោក Premchai Karnasuta ដែលជាអ្នកជំនួញនិងជាអតីតប្រធានក្រុមហ៊ុន Italian-Thai Development PLC. ដែលជាក្រុមហ៊ុនសំណង់ធំជាងគេមួយនៅប្រទេសថៃ។
សារព័ត៌មានថៃបានរាយការណ៍កាលពីថ្ងៃព្រហស្បតិ៍ថា អ្នកស៊ើបអង្កេតបានរកឃើញចំណុចខ្វះខាតនៃរចនាសម្ព័ន្ធនៅក្នុងបំពង់ជណ្តើរយន្តនៃអគារនេះ ប៉ុន្តែអាជ្ញាធរថៃនៅមិនទាន់បានបញ្ចេញលទ្ធផលនៃការស៊ើបអង្កេតលើមូលហេតុទាំងស្រុងនៅឡើយ។
សារព័ត៌មានបាងកកប៉ុស្តិ៍រាយការណ៍ថា ការដួលរលំនៃអគារកម្ពស់ ៣០ ជាន់នេះបានបណ្តាលឱ្យមនុស្ស ៩២ នាក់ស្លាប់, ៩ នាក់រងរបួស និង ៤ នាក់បាត់ខ្លួន។
យោងតាមក្រសួងការងារនិងបណ្ដុះបណ្ដាលវិជ្ជាជីវៈ ពលរដ្ឋកម្ពុជាចំនួន ៤នាក់ក៏បានបាត់បង់ជីវិតពីការបាក់រលំអាគារនេះដែរ និង២នាក់រងរបួស៕
