លោកស្រី Yulia Svyrydenko ឧបនាយករដ្ឋមន្ត្រីទី១ និងជារដ្ឋមន្ត្រីក្រសួងសេដ្ឋកិច្ចអ៊ុយក្រែន និងលោក Scott Bessent រដ្ឋមន្ត្រីហិរញ្ញវត្ថុសហរដ្ឋអាមេរិកចុះកិច្ចព្រមព្រៀងរ៉ែអ៊ុយក្រែន នៅរដ្ឋធានីវ៉ាស៊ីនតោន កាលពីថ្ងៃទី១ ខែឧសភា។ Yulia Svyrydenko
អ៊ុយក្រែន និងសហរដ្ឋអាមេរិកបានឈានដល់កិច្ចព្រមព្រៀងរ៉ែនៅប្រទេសអ៊ុយក្រែន ជាអ្វីដែលប្រធានាធិបតីអ៊ុយក្រែនថ្លែងថាជា «ដៃគូស្មើភាពគ្នា» ទោះបីជាកិច្ចព្រមព្រៀងនេះមិនបានបញ្ចូលពីការធានាសន្តិសុខសម្រាប់អ៊ុយក្រែន។
ប្រធានធិបតីអ៊ុយក្រែន Volodymyr Zelensky បានថ្លែងនៅលើបណ្ដាញសង្គម X ថា កិច្ចព្រមព្រៀងដែលធ្វើឡើងនៅរដ្ឋធានីវ៉ាស៊ីនតោន និងត្រូវដាក់ទៅសភាអ៊ុយក្រែនដើម្បីអនុម័ត។
លោក Zelensky ថ្លែងថា៖ «កិច្ចព្រមព្រៀងនេះមានការប្រែប្រួលច្រើននៅក្នុងដំណាក់កាលរៀបចំ។ ឥឡូវនេះ វាគឺជាភាពជាដៃគូស្មើភាពគ្នាពិតប្រាកដ ដែលបង្កើតឱកាសសម្រាប់ការវិនិយោគច្រើនគួរសមនៅអ៊ុយក្រែន និងជាការធ្វើទំនើបកម្មក្នុងកម្រិតបង្គួរទៅសម្រាប់ឧស្សាហកម្មរបស់អ៊ុយក្រែន ហើយអ្វីដែលកាន់តែពិសេសនោះគឺវាបង្កើតបានជាការអនុវត្តផ្នែកច្បាប់»។
លោកបន្តថា កិច្ចព្រមព្រៀងនេះមិនបានដាក់បញ្ចូលរឿងបំណុលនោះទេ ប៉ុន្តែ ផ្ដល់ផលប្រយោជន៍ដល់អ៊ុយក្រែន និងផ្ដល់ផលប្រយោជន៍ដល់អាមេរិកដូចគ្នា។ លោកថា លោកបានពិភាក្សាជាមួយលោក ដូណាល់ ត្រាំ នៅបុរីវ៉ាទិកង់ កាលពីពេលថ្មីៗនេះ ហើយនេះជាលទ្ធផលជាក់ស្ដែងចេញពីកិច្ចពិភាក្សានោះ។
យ៉ាងណាក៏ដោយ កិច្ចព្រមព្រៀងដែលត្រូវបានឃើញដោយសារព័ត៌មាន មិនបានបង្ហាញពីការធានាផ្នែកសន្តិសុខរបស់សហរដ្ឋអាមេរិកសម្រាប់អ៊ុយក្រែននោះទេ។ សារព័ត៌មាន CNN លើកឡើងថា កិច្ចព្រមព្រៀងនេះហាក់ដូចជាកិច្ចព្រមព្រៀង «និមិត្តរូប» ដែលនឹងជួយឲ្យទំនាក់ទំនងប្រទេសទាំងពីរកាន់តែជិតស្និទ្ធជាងមុន។
លោកស្រី Yulia Svyrydenko ឧបនាយករដ្ឋមន្ត្រីទី១ និងជារដ្ឋមន្ត្រីក្រសួងសេដ្ឋកិច្ចអ៊ុយក្រែនថ្លែងថា តាមរយៈកិច្ចព្រមព្រៀងនេះ សហរដ្ឋអាមេរិកអាចនឹងផ្ដល់ជំនួយថ្មីសម្រាប់អ៊ុយក្រែន ដូចជាប្រព័ន្ធការពារដែនអាកាសជាដើម បន្ថែមទៅលើការរួមចំណែកផ្នែកហិរញ្ញវត្ថុផ្ទាល់៕
