ទាហានឥណ្ឌាឃ្លាំមើលនៅព្រំដែនតំបន់កាស្មៀរ កាលពីថ្ងៃទី១៩ ឧសភា។ AFP
រដ្ឋលេខាធិការក្រសួងការបរទេសឥណ្ឌា Vikram Misri បានប្រាប់ អង្គសភាកាលពីថ្ងៃចន្ទថា សហរដ្ឋអាមេរិកគ្មានតួនាទីអ្វីលើបទឈប់បាញ់គ្នារវាងឥណ្ឌានិងប៉ាគីស្ថានទេ ហើយសំណើបទឈប់បាញ់គឺបានមកពីការអង្វរចេញពីអគ្គនាយកប្រតិបត្តិការយោធាប៉ាគីស្ថានទៅសមភាគីឥណ្ឌា។
លោក Vikram បានបង្ហាញខ្លួននៅចំពោះមុខគណៈកម្មាធិការអចិន្ត្រៃយ៍សភាទទួលបន្ទុកកិច្ចការបរទេស ដែលដឹកនាំដោយលោក Shashi Tharoor សមាជិកសភាជាន់ទាប Lok Sabha ដើម្បីផ្តល់ការសង្ខេបយ៉ាងអំពីប្រតិបត្តិការ Sindoor និងភាពតានតឹងថ្មីៗរវាងឥណ្ឌា និងប៉ាគីស្ថាន។
លោកបានបញ្ជាក់ថា ប៉ាគីស្ថានបានស្នើសុំឲ្យឥណ្ឌាបញ្ឈប់ការប្រយុទ្ធ បន្ទាប់ពីកងកម្លាំងយោធាឥណ្ឌាបានវាយប្រហារយ៉ាងខ្លាំងក្លាទៅលើគោលដៅយោធារបស់ប៉ាគីស្ថាន ដែលរួមមានប្រព័ន្ធការពារកាំជ្រួចដែលផលិតដោយចិននៅ Lahore និងមូលដ្ឋានទ័ពអាកាស Nur Khan ដ៏សំខាន់។
ការបំភ្លឺរបស់រដ្ឋលេខាធិការការបរទេសដែលថា អាមេរិកគ្មានតួនាទីលើបទឈប់បាញ់គ្នារវាងឥណ្ឌានិងប៉ាគីស្ថាន ធ្វើឡើងបន្ទាប់ពីប្រធានាធិបតីសហរដ្ឋអាមេរិកលោក ដូណាល់ ត្រាំ បានអួតអាងថាអាមេរិកគឺជាអ្នកជំរុញឲ្យមានការឈប់បាញ់រវាងឥណ្ឌា និងប៉ាគីស្ថាន។
ថ្លែងនៅក្នុងវេទិកាវិនិយោគអាមេរិក-អារ៉ាប៊ីសាអូឌីត កាលពីថ្ងៃពុធសប្តាហ៍មុន លោក ត្រាំ បានអះអាងថា លោកបានបញ្ចុះបញ្ចូលទាំងឥណ្ឌា និងប៉ាគីស្ថានឱ្យធ្វើពាណិជ្ជកម្មទំនិញ មិនមែនមីស៊ីលនុយក្លេអ៊ែរទេ។
លោក ត្រាំ ថា លោកបានផ្តល់កិត្តិយសដល់ការទូតពាណិជ្ជកម្មដែលជាចំណុចស្នូលនៃកិច្ចខិតខំប្រឹងប្រែងសម្រាប់ការបន្ធូរបន្ថយភាពតានតឹង។ លោកក៏បានសរសើរមេដឹកនាំនៃប្រទេសទាំងពីរថាជាមនុស្សឆ្លាតវៃ និងមានសមត្ថភាពខ្លាំងផងដែរ។
សភាឥណ្ឌាបានចោទជាសំណួរទៅលោក Vikram ថា «តើនាយករដ្ឋមន្ត្រី និងរដ្ឋមន្ត្រីការបរទេស មានអ្វីនិយាយអំពីការបង្ហើបនេះដែរឬទេ? តើពួកគេបានដាក់បញ្ចាំផលប្រយោជន៍សន្តិសុខរបស់ឥណ្ឌា ទល់នឹងសម្ពាធពីសហរដ្ឋអាមេរិកដែរឬទេ?»
ក្រសួងការបរទេសបានបដិសេធលើការលើកឡើងអំពីឥទ្ធិពលនៃការធ្វើពាណិជ្ជកម្មរបស់អាមេរិក ហើយអះអាងថា អាមេរិកគ្មានតួនាទីលើបទឈប់បាញ់គ្នារវាងឥណ្ឌានិងប៉ាគីស្ថាននោះទេ៕ ANN/ The Statesman
