អាជ្ញាធរវៀតណាមកាលពីថ្ងៃចន្ទ បានចាប់ខ្លួនម្ចាស់ក្សត្រីសម្រស់ និងជាមនុស្សមានភាពល្បីល្បាញនៅលើបណ្ដាញសង្គម ពីបទក្លែងបន្លំអ្នកប្រើប្រាស់ បន្ទាប់ពីនាងបានផ្សព្វផ្សាយលក់អាហារបំប៉នហ្វាយប័រ ដែលត្រូវបានរកឃើញថាក្លែងក្លាយ។
អ្នកស្រី Nguyen Thuc Thuy Tien បានផ្សព្វផ្សាយលក់ស្ករគ្រាប់ដែលអះអាងថាសម្បូរទៅដោយជាតិសរសៃហ្វាយប័រនៅលើបណ្ដាញសង្គម ប៉ុន្តែសាធារណជនបានផ្ទុះការតវ៉ា បន្ទាប់ពីការធ្វើតេស្តផលិតផលរបស់នាងដែលមានម៉ាក Kera Supergreens Gummies បង្ហាញថា ផលិតផលទាំងនោះក្លែងក្លាយ។
Nguyen Thuc Thuy Tien គឺជាអតីតម្ចាស់ជ័យលាភីនៃកម្មវិធីប្រកួតសម្រស់ Miss Grand International នៅឆ្នាំ ២០២១ និងជាបុគ្គលមានឥទ្ធិពលលើបណ្ដាញសង្គមនៅវៀតណាម និងធ្លាប់ទទួលបានការសរសើរពីរដ្ឋាភិបាលទៀតផង។
ការលក់ផលិតផល Kera Supergreens Gummies ក្លែងក្លាយនេះ មិនមែនអ្នកស្រីធ្វើតែម្នាក់ឯងនោះទេ គឺអ្នកស្រីបានធ្វើការផ្សព្វផ្សាយលក់ រួមជាមួយអ្នកមានឥទ្ធិពលលើបណ្តាញសង្គម ២នាក់ទៀតគឺឈ្មោះ Pham Quang Linh និងឈ្មោះ Hang Du Muc ដែលជាម្ចាស់ក្រុមហ៊ុនតែម្ដង។
អ្នកទាំងនេះធ្លាប់បានអះអាងថា ផលិតផលស្ករគ្រាប់នីមួយៗរបស់ពួកគេមានជាតិសរសៃស្មើនឹងបន្លែមួយចាន ឬ មានកម្រិតជាតិសរសៃ ២០០មីលីក្រាម។ ប៉ុន្តែ អ្នកប្រើប្រាស់ម្នាក់បានរកឃើញថា ស្ករគ្រាប់នីមួយៗមានសរសៃត្រឹម ១៦ មីលីក្រាមប៉ុណ្ណោះ គឺឆ្ងាយពីកម្រិត ២០០ មីលីក្រាមដែលពួកគេបានអះអាង។
បន្ទាប់មក អាជ្ញាធរបានបើកការស៊ើបអង្កេត ហើយរកឃើញថា គ្រឿងផ្សំដែលត្រូវបានប្រើប្រាស់ដើម្បីផលិតស្ករគ្រាប់នោះមានជាតិសរសៃទាប។ លើសពីនេះទៀត កញ្ចប់ផលិតផលក៏មិនបានបញ្ជាក់ពីបរិមាណសរសៃនេះដែរ។ លើសពីនេះទៀត ផលិតផលទាំងនោះថែមទាំងមានប្រើសារធាតុ sorbitol កម្រិតខ្ពស់ដែលជាទូទៅប្រើក្នុងថ្នាំបញ្ចុះលាមក។
អ្នកមានឥទ្ធិពលលើបណ្ដាញសង្គមទាំង ៣នាក់នេះត្រូវបានផាកពិន័យនៅក្នុងខែមីនា ម្ដងហើយ ហើយពួកគេបានសុំទោសជាសាធារណៈ។ នៅខែមេសា អាជ្ញាធរវៀតណាមបានចាប់ខ្លួនលោក Pham និងលោកស្រី Hang Du Muc ព្រមទាំងបុគ្គលិកក្រុមហ៊ុនរបស់ពួកគេ និងក្រុមហ៊ុនផលិតស្ករគ្រាប់។ ពួកគេត្រូវបានចោទប្រកាន់ពីបទផលិតផលិតផលក្លែងក្លាយ និងបោកប្រាស់អ្នកប្រើប្រាស់៕
